Balangizi Basololela—Imulangizi Weendelezya
1 Ikuba umwi wabalangizi mumbungano mmukuli mupati. (Inc. 20:28; 1 Tim. 3:1) Eeci ncibalo citaanzi mumulongo wazibalo izipandulula milimo iyiindene-indene baalu Banakristo njobacita ikutegwa toonse twiizyibe milimo mipati njobatucitila.
2 Iba Sosaiti mbabasala mulangizi weendelezya kuti kabeleka muciimo eco kwaciindi cili mbocibede. Mulangizi weendelezya mbwaayendelezya kabotu makani oonse aayandika, eci baalu cilabagwasya ikwiibikkila maanu kabotu mikuli yabo njobapedwe. (Mulimo Wesu, p. 42) Ino eci cijatikizya nzi?
3 Mulangizi weendelezya nguutambula maŋwadi aalembelwa mbungano alimwi cakufwambaana ubona kwaamba kuti mulembi waatambula kutegwa alanganye zilembedwe. Iciindi nalibambila muswaangano wabaalu, imulangizi weendelezya ulabweza mizeezo kuzwa kubaalu aamakani aayandika kubandika elyo ulabamba mulongo wamakani aayandika kubandika. Alimwi ngosicuuno lyamuswaangano wabaalu. Nokwasalwa kucita zintu zimwi, ulabona kwaamba kuti zyoonse zyacitwa mbuli mbozyeelede. Ngomulangizi wabubambe bwa Muswaangano wa Mulimo alimwi nguubamba mulongo wamakani aakubuleya. Nguuzumizya kwaambilizya koonse kucitwa kumbungano, nguuzumizya ikubbadelwa kwamali kuzintu ziyandika alimwi ubona kwaamba kuti ikulangwa-langwa kwamaakkaunti aambungano ikucitwa ziindi zyone amwaka kulacitwa.
4 Mbwaanga ngosicuuno, mulangizi weendelezya nguuendelezya mulimo wa Kkomitii Yambungano Yamulimo. Iciindi sikwiiya Bbaibbele nalomba kuba umwi wabasikumwaya uutanabbapatizigwa naa iciindi sikumwaya uutanabbapatizigwa nayanda kubbapatizigwa, mulangizi weendelezya nguucita bubambe bwakuti baalu baswaangane amuntu oyo. Alimwi mulangizi weendelezya nguulaambele mububambe bwakuswaya kwamulangizi wabbazu ikutegwa mbungano igwasigwe kapati munsondo yaalubazu yamulimo.
5 Imilimo iicita mulangizi weendelezya minji alimwi iliindene-indene. Nalanganya mikuli yakwe cakulifwiinsya ‘acabusungu,’ toonse tulakonzya kutola lubazu kwiinda mukutobela nzyobaamba baalu. (Rom. 12:8) Ikuti ‘twaswiililisya’ alimwi ‘akulitesya’ kuli baabo ibatusololela, bayooucita mulimo wabo kabakkomene kapati.—Heb. 13:17.