Tulakonzya Kucita Milimo Mipati
1 Imulimo wa Jesu Kristo wakazwide micito iigambya. Camaleele wakasanina bantu babalilwa kuzyuulu-zyuulu, wakaponya banji alimwi bamwi ibakafwide wakababusya. (Mt. 8:1-17; 14:14-21; Joh. 11:38-44) Imulimo wakwe wakaduma mucisi coonse. Pele, imangolezya aamamanino katanafwa, wakaambila basikumutobela bakwe basyomeka kuti: “Oyo uundisyoma, uyoocita milimo iili mbuli njencita, mane do akiicite mipati iinda eyi.” (Joh. 14:12) Mbuti mbotunga twacita milimo “mipati?”
2 Nkwiinda Mukubeleka Cilawo Cipati: Imulimo wa Jesu wakacitwa buyo mu Palesitaini, pele basikwiiya bakwe bakusaanguna bakalaililwa kukambauka “mane kusikila kumamanino aanyika,” ikule cini-cini kwiinda mwaakakambaukila Jesu lwakwe. (Inc. 1:8) Imulimo wakukambauka ngwaakatalisya ono ulacitwa munyika yoonse mbwiizulwa, muzisi zili 232. (Mt. 24:14) Sena muli mukutola lubazu cakumaninina mukubelekela mucilawo mbungano yanu ncoipedwe.
3 Nkwiinda Mukusikila Bantu Banji: Basikwiiya Jesu mbaakasiya kuti bazumanane kukambauka bakali basyoonto buyo. Pele, akaambo kakukambauka kwabo nkobakacita cabusungu lya Pentekoste 33 C.E., ibantu ibakatambula kasimpe akubbapatizyigwa buzuba obo bakasika kuzyuulu zyotatwe. (Inc. 2:1-11, 37-41) Ikuyobolola baabo “abasalidwe buumi butamani” kwazumanana kusikila sunu, iciindi notuli mukubbapatizya bantu ibainda kumweelwe waakati-kati wa 1,000 abuzuba. (Inc. 13:48) Sena muli mukusolekesya kusikila bantu babombe myoyo kufwumbwa nkobakonzya kujanwa alimwi akupilukila cakufwambaana kuli baabo ibakatondezya luyandisisyo?
4 Nkwiinda Mukutola Ciindi Cilamfwu Katukambauka: Imulimo wa Jesu waanyika wakacitwa buyo kwamyaka yotatwe acisela. Ibunji bwesu twali kukambauka kwaciindi cilamfwu kwiinda waawo. Kunyina makani abulamfwu bwaciindi ncotucinoozumizidwe mumulimo oyu, tulakukkomanina kugwasya sikwiiya umwi aumwi mupya ikuba munzila iisololela kubuumi. (Mt. 7:14) Sena amweezi mujisi bubi mumulimo wa Mwami?—1 Kor. 15:58.
5 Toonse inga katusyomede kuti kwiinda mukugwasilizyigwaa Jesu, tulakonzya kucita milimo mipati katuli basikwiiya bakwe ibeni-beni.—Mt. 28:19, 20.