Amubazyibe Ibanyoko
1 Imulongwe mwini-mwini Ibbaibbele limupandulula kuti mmuntu uukakatila kwiinda mukwesu wakumubili, uuzumanana muluyando akusyomeka alimwi uugwasya mweenzinyina iciindi camapenzi. (Tus. 17:17; 18:24) Taakwe notutibule balongwe bali boobu mumbungano kuti katusolekesya ikuzyibana alimwi akuyandana.—Joh. 13:35.
2 Iziindi zibotu zyakuzyibana kabotu abakwesu nkozili miswaangano noitanatalika anoyamana. Ino kayi kutafwambaana kusika alimwi akwiima-ima yamana kutegwa mukkomane akuyanzana ikukulwaizya alimwi ikukkomanisya? Amubasikile bakwesu baindene-indene kuti mubandike ambabo, kubikkilizyaa bacembele ibaongola mukasimpe alimwi abakubusi naa aabo ibafwa insoni.
3 Amwiitalisye Mibandi: Mutaile kubaanzya buyo ibanyoko mpoona camana. Mulakonzya kutalisya mubandi kwiinda mukwaamba cakuluula cimwi camumulimo wamumuunda, imakani aakkomanisya mumagazini impya naa ikaambo kamwi kajatikizya muswaangano wazwaa kucitwa. Mulakonzya kwiiya zinji kujatikizya ibanyoko kwiinda mukuba muntu uuswiilisisya, uubakulwaizya kubandika kujatikizya zyakuluula zyabo alimwi azintu nzyobali mukwiiya. Ikwiile kubuzya mbuli umwi mbwaakajana luzibo lwa Jehova kulakonzya kuyubununa zinji. Bamwi bakainda muzintu ziyumya-yumya lusyomo mubuumi bwabo, alimwi bamwi bali mukuzumanana mubukkale bubyaabi noliba ono ibanji mbobatakonzyi kuyeeyela. Ikuzyiba zintu zili boobu kuyootugwasya, mbotuli balongwe beni-beni kuti tubikkile maanu alimwi akubona ncotunga twacita kujatikizya zintu bamwi nzyobayandika kapati.
4 Amuzyibilane Kabotu: Ikuzwa ciindi mwanaakwe naakafwa, imucizi umwi cakamuyumina kapati ikwiimba nyimbo zya Bwami izyakali kwaamba makani aabubuke. Ulayeeya ategwa: “Cimwi ciindi, imucizi umwi iwakakkede kulubazu lumwi wakandibona kandilila. Wakaboola wandikumbatila, amane wakaimba lwiimbo loonse mbolubede andime. Ndakabayanda cini-cini bakwesu abacizi alimwi ndakakkomana kapati kuti ndakajanika kumiswaangano, mbwaanga ndakalizyi kuti ku Ŋanda ya Bwami nkokujanika lugwasyo.” Tweelede kuzyibilana kabotu abakwesu kwiinda mukubaumbulizya iciindi nokuyandika alimwi akubakulwaizya ciindi coonse.—Heb. 10:24, 25.
5 Inyika ino iikulumpele mboyiindila kubija, atukanze kubazyiba kabotu ibakwesu. Ooku kuyumizyanya kwiinda mukukulwaizya kwini-kwini kuyooba cilongezyo kuli boonse.—Rom. 1:11, 12.