Miswaangano Yamulimo ya September
Nsondo Iitalika mu September 7
Lwiimbo 15
10 min: Zyakwaambilizya zyambungano. Zyakwaambilizya Zisalidwe mu Mulimo Wesu Wabwami. Makani Aateokrasi.
15 min: “Tulakonzya Kucita Milimo Mipati.” Kubuzya akwiingula. Amubakulwaizye boonse kulibikkila mbaakani zikonzyeka mumwaka wamulimo mupya alimwi akubona kwaamba kuti zyacitwa.—Amubone Mulimo Wesu, mapeeji 116-18.
20 min: “Ibapainiya Bagwasilizya Bamwi.” Imwaalu apandulule kuti kunze lyalwiiyo lupegwa mu Cikolo Camulimo Wateokrasi, kwacitwa bubambe bwakuti bapainiya bagwasilizye bamwi cacigaminina mumulimo. Wabuzya mibuzyo kujatikizya cibalo akutamba baswiilizi kuti baingule, ikapati ibapainiya alimwi abasikumwaya ibajatikizidwe mupulogilamu. Amwaambe umwi aumwi mbwanga wagwasigwa kapati mupulogilamu eyi. Ibapainiya balakonzya kuluula mbuli mbobakkomana alimwi ambobagwasigwa kwiinda mukutola lubazu mukugwasya bamwi. Basikumwaya ibagwasigwa balakonzya kwaamba mbuli mbobacilumba cipego eci caluyando akwaamba twaambo itwakabagwasya kuzwidilila kapati alimwi ambobakkomana mumulimo.
Lwiimbo 21 amupailo wakujala.
Nsondo Iitalika mu September 14
Lwiimbo 13
10 min: Zyakwaambilizya zyambungano. Ilipooti yamaakkaunti.
15 min: Ncinzi Leza Ncayanda Kulindiswe? Imakani. Tuyootalika kwiiya broshuwa eyi mvwiki iboola aciiyo cabbuku. Amubakulwaizye boonse kulibambilila limwi alimwi akujanika aciiyo cimwi acimwi ikutegwa baizyibile ibroshuwa eyi akwiiya mbobanga baibelesya nobaiyaa bamwi. Amubale muncali aakatwe kakuti “Mbwiibelesegwa Broshuwa Eyi.” Amubelesye twaambo tuli mu Ngazi Yamulindizi ya February 1, 1997 mapeeji 9-10 kuti mukankaizye mbokuyandika ikuyiisya kwiinda mukubelesya mibuzyo, magwalo alimwi azifwanikiso zili mubroshuwa. Ibacitya ziiyo zyabbuku beelede kuba cikozyanyo cibotu cabaabo ibacitya ziiyo zya Bbaibbele zyaaŋanda, kwiinda mukutabandika kapati amukutaleta makani aambi aatamo mucibalo.—Amubone Mulimo Wesu Wabwami wa June 1996, peeji 3, muncali 5.
20 min: Ino Twakacita Buti Mwakali? Imulembi amulangizi wamulimo babandika makani aajatikizya mulimo wamumuunda wambungano alimwi amyeelwe yabaabo ibakajanika ciindi camiswaangano mwakali. Baamba zibeela zimwi izyalipooti izikulwaizya alimwi babikkila maanu aambazu ziyandika kucita kabotu kwiinda waawo. Sena basikumwaya boonse bakatola lubazu mumulimo mumweezi wa August? Amubandike mbaakani ibaalu nzobatibikkile maanu mumyeezi iitobela, kubikkilizyaa kugwasya boonse kuba basikumwaya batasotauki. Amwaambe twaambo tweelede kuzwa kulipooti yamulangizi wabbazu yaciindi cakuswaya cainda.
Lwiimbo 23 amupailo wakujala.
Nsondo Iitalika mu September 21
Lwiimbo 9
10 min: Zyakwaambilizya zyambungano. Amubandike “Ipulogilamu Mpya Yamuswaangano Wabuzuba Bwaalubazu.”
15 min: Iziyandika zyambungano.
20 min: “Amubazyibe Ibanyoko.” Kubuzya akwiingula. Amubikkilizye atwaambo tuli mu Ngazi Yamulindizi ya October 1, 1988 mapeeji 10-11. Amubakulwaizye boonse ikuyandisisya kuzyibilana kabotu.
Lwiimbo 7 amupailo wakujala.
Nsondo Iitalika mu September 28
Lwiimbo 14
12 min: Zyakwaambilizya zyambungano. Amubayeezye basikumwaya ikutola malipooti aabo aamumulimo aamu September. Amubakulwaizye boonse ikubaa makanze aakubikkila maanu kapati kumulimo wakuŋanda aŋanda mu October ikutegwa ikumwaya mamagazini kukayungizigwe. Kujatikizya mizeezo yakulibambila ntalisyo zyamakani amubone Mulimo Wesu Wabwami, wa October 1996 apeeji 8. Amucite citondezyo cakusiya mamagazini mapya. Amubweze mamagazini aakubelesya mumulimo kumamanino aansondo.
20 min: “Ibalangizi Basololela—Imulangizi Wamulimo.” Imakani aayoopegwaa mulangizi wamulimo. Aakumana kubandika mikuli njajisi, uyoopandulula inzila zimwi zigaminide imbungano mboinga ilabelekelaamwi ikutegwa imulimo wamucilawo cinyenzi ukomene akuyaambele.
13 min: Ncinzi Ciyandika Kutegwa Ube Sikumwaya Wambungano Uuzwidilila? Makani mobatola lubazu baswiilizi. Takuyandiki kubaa luzibo lwaatala; muciindi caboobo kuyandika kuti toonse tube aaluyandisisyo lutondezya luyando, kulifwiinsya alimwi akulumba. Amulombe baswiilizi baambe twaambo ncoziyandika zintu ezi zitobela: (1) kubaa muuya wakusangaalizya, (2) kujanika lyoonse alimwi akutola lubazu aamiswaangano, (3) ikuyandisisya kutambula mikuli akwiizuzikizya, (4) ikubelekelaamwi abaalu alimwi akutobela bubambe bwambungano, (5) ikuyandisisya kugwasya bamwi alimwi (6) akutola lubazu lyoonse mumulimo wamumuunda akutola lipooti cakufwambaana mweezi amweezi.
Lwiimbo 29 amupailo wakujala.