Boonse Beelede ‘Kwaazumina Makani Camoyo Woonse’!
1 Ibantu babalilwa kutuulunzuma tuli mbotubede bali mukwiiya Bbaibbele a Bakamboni ba Jehova. Ikutegwa beelele kuyoopona kukabe kutamani, beelede ‘kwaazumina makani camoyo woonse,’ mbubwena bwakacita ibali 3,000 ibakeempwa akubbapatizigwa mubuzuba bwa Pentekoste mu 33 C.E. (Mili. 2:41, Ci) Ino eci citupa mulimo nzi sunu?
2 Tweelede kugwasya mbotwiiya limwi Bbaibbele ikuyandisisya kubelekela Jehova. (1 Tim. 4:7-10) Ikutegwa eco cikonzyeke ipepa lyamukati lya Mulimo Wesu Wabwami lyamu June 1996, muncali 20 lyaamba kuti: “Kuzwa kumatalikilo kusikila kumamanino aaciiyo, amubone mbomunga mwakulwaizya muntu oyo kuyandisisya kwiiya bube bwa Jehova. Amutondezye mbomulimvwa kujatikizya Leza. Amugwasye sikwiiya kuyeeya mbwanga wapanga cilongwe cibotu cacigaminina a Jehova.”
3 Ibuyumuyumu Mbotujisi: Akaambo kakuyungwaa bukombi bwakubeja, ibukombi bwabantu banji mbwakuwayawaya, tabasanduki cini-cini mubukkale bwabo. (2 Tim. 3:5) Ibuyumuyumu mbotujisi mbwakugwasya mbotwiiya limwi Bbaibbele kubona kuti nzinji zijatikizidwe mubukombi bwakasimpe, takuli kwiile buyo kumvwa makani aa Leza. Nzyobaiya beelede kuzibelesya mubukkale bwabo. (Jak. 1:22-25) Ikuti naa cimwi mubukkale bwabo taceendelani anzyayanda Leza, beelede ‘kusanduka’ akutalika kucita ziluleme kutegwa bamukkomanisye. (Inc. 3:19) Ikutegwa bakajane buumi butamani, beelede ‘kusolekesya’ akwiiminina kasimpe.—Lk. 13:24, 25.
4 Nomubandika zyabukkale bwiindene-indene, amumubuzye ngomwiiya limwi Bbaibbele mbwaabona makani aaya alimwi ancayelede kucita ikuti wabona kuti kuyandika kucinca kumwi mubuumi bwakwe. Amugamike mizeezo yakwe kumbunga kwalo nkwali mukujana kasimpe nkali mukwiiya alimwi amumukulwaizye kunoojanika amiswaangano yambungano lyoonse.—Heb. 10:25.
5 Aibe mbaakani yesu kunjila myoyo yabaabo mbotwiiya limwi mukuyiisya kwesu. Tunookkomene mbotuzumanana kukulwaizya bapya kuzumina jwi lya Leza camoyo woonse akubbapatizigwa!—1 Tes. 2:13.