Amukulwaizyanye Kwiinda Mukwiingula Aamiswaangano
1 Ku Ba-Hebrayo 10:24 tulaililwa kuti ‘katubusyanya-busyanya mukuyandana akucita milimo mibotu.’ Eci cijatikizya kukulwaizyanya kwiinda mukwiingula ciindi camiswaangano yambungano. Ino nkaambo nzi ncotweelede kwiingula? Mbuti mbotunga twaingula? Ino nguni uugwasigwa?
2 Amuyeeye mbomugwasigwa ziindi zinji nomumvwa bamwi kabaingula mumajwi masyoonto, aamvwika, aayungizya luzibo lwanu alimwi aamuyumya munzila yakumuuya. Mulijisi coolwe cakubacitila mbubwena obo abalo. Nomutola lubazu, mutondezya kuyandisisya kwanu ‘kwakwaabila cimwi cipo camuuya cakubayumya’ kutegwa boonse bajanika bakulwaizigwe.—Rom. 1:11, 12.
3 Mbomunga Mwapa Bwiinguzi Bubotu: Bwiinguzi bwanu butalampisyi cakumanizya twaambo toonse tuli mumuncali. Bwiinguzi bulamfwu kanjikanji tabukagami kaambo kayandika alimwi bulakonzya kutyompya bamwi kutola lubazu. Bwiinguzi butaanzi mumuncali bweelede kufwiimpa, kabwiingula mubuzyo uusimbidwe cacigaminina. Aabo ibapa bwiinguzi buyungizidwe balakonzya kwaamba mbwaanga abelesyegwa makani aayo naa kutondezya magwalo mbwaakonzya kubelesyegwa. Amubone Bukhu Lolangiza la Sukulu, mapeeji 91-2.
4 Ikuti naa makani aakupa bwiinguzi alamulibilisya, amulibambile bwiinguzi bufwaafwi kakucili ciindi, alimwi amwaambile sikucitya ciiyo kumutomona mumuncali ooyo. Naa mwacita boobu mumiswaangano iili mbwiibede, ikutola lubazu kuyoomuubila-ubila. Kamuyeeya kuti Musa a Jeremiya tiibakalisyoma kuti inga bakanana kubuleya. (Kul. 4:10; Jer. 1:6) Pele Jehova wakabagwasya kuti bamubandikile, aboobo anywebo uyoomugwasya.
5 Mbaani Bayoogwasigwa Abwiinguzi Bwanu? Ilwanu mulagwasigwa nkaambo ibwiinguzi bwanu busitikizya kasimpe mumizeezo amoyo wanu calo cicitya kuti cikamuubile-ubile ikwaayeeya makani aayo kumbele. Alimwi abambi balagwasigwa nobamvwa twaambo twanu tukulwaizya. Tulakulwaizigwa ciindi bantu ibazyibide, ibakubusi, ibafwa nsoni nobaba ibapya boonse nobasoleka kutondezya lusyomo lwabo ciindi camiswaangano.
6 Tuyoojana kuti ‘majwi aambwa kuciindi ceelede mabotu loko’ iciindi naabelesyegwa kukulwaizya ciindi camiswaangano!—Tus. 15:23.