Amukulwaizye Bantu Kutobela Muntu Mupati Kwiinda
1 Ikweelana amajwi aalembedwe kuli Matayo 5:14, Jesu wakaambila basikwiiya bakwe kuti: “Ndinywe mumuni wanyika.” Basikumutobela Jesu bakeelede kukambauka makani aa Bwami bwa Jehova alimwi anzila yakwe yalufwutuko kwiinda muli Jesu. Akaambo kamulimo oyu ngotupedwe, mumwezi wa December tulangila kumwaya bbuku lya The Greatest Man Who Ever Lived. Ikuti kamutalijisi bbuku eli mumwaambo wanu, mulakonzya kumwaya bbuku lya Luzibo Lutola Kubuumi Butamani alimwi abroshuwa yakuti Ncinzi Leza Ncayanda Kulindiswe? Njeeyi mizeezo njomunga mwabelesya.
2 Ikuti naa kamuyanda kumwaya bbuku lya “Greatest Man” kumuntu inga mwabuzya kuti:
■“Ibanji balalibuzya naa Jesu wakali buti ciindi naakali muntunsi. Muunzila nzi nzyomuyeeya kuti wakaliindene abantu bamwi? [Amulindile kwiingula.] Eeli bbuku likondelezya lyakuti, The Greatest Man Who Ever Lived, lipandulula bukkale bwakwe amulimo, alimwi lilatutondezya mbwaakabede. Bamwi nobamana kulibala, balimvwa mbuli kuti bakali kuyanzana buya cakaanzambwene anguwe, kababona mapenzi aakwe, alimwi akulibonena mbwaakali kucita mulimo wakwe.” Amutondezye cifwanikiso cakusaanguna cili mubbuku icaamba mutwe wamakani. Mpoonya muye kuntalisyo yamakani mubale muncali wabili wakatwe kakuti “Benefit by Learning About Him.” (Amugwasigwe Kwiinda Mukwiiya Kujatikizya Nguwe) Ikuti naa muntu watondezya luyandisisyo, amulisiye bbuku.
3 Naa mulakonzya kwaamba kuti:
■“Ino mumuyeeyela buti Jesu Kristo? [Amulindile kwiingula.] Ibanji basikwiiya zyansiku balasyoma kuti Jesu wakali muntu mupati kwiinda iwakaponede. [Amuzubulule cikozyanyo kuzwa muntalisyo yamakani mubbuku lya Greatest Man.] Ibbaibbele litondezya kuti buumi bwa Jesu cakali citondezyo cakuti katutobela.” Amubale 1 Petro 2:21 amuncali wakusaanguna waapeeji lyamamanino lyamakani aantalisyo mubbuku lya Greatest Man. Ikuti naa siŋanda ulayanda kwiiya makani aa Jesu, amulimwaye bbuku. Kamutanaunka, amubale Johane 17:3 akubuzya kuti, “Ino mbuti mbotunga twabaa luzibo olu lutola kubuumi butamani?” Amucite bubambe bwini-bwini bwakuti mukapilukile kuzooingula mubuzyo oyu.
4 Nomwapilukila kuyoopandulula mbokujanwa luzibo lupa buumi, inga mwaamba kuti:
■“Ndakasyomezya kubweeda kutegwa ndizoomutondezye mbotunga twajana luzibo lutola kubuumi butamani.” Amumupe bbuku lya Luzibo, mpoonya amutondezye mbocicitwa ciiyo kwiinda mukubelesya cibalo cakusaanguna.
5 Ikuti kamuyanda kumwaya broshuwa ya Ncayanda inga mwabuzya kuti:
■“Iciindi muntu naamba Jesu Kristo, ibanji bamuyeeyela kuba kana kavwanda naa muntu uuli mukupenga uuyanda kufwa. Cilikke ncobazi kujatikizya Jesu nkuzyalwa akufwa kwakwe. Izintu zibotu nzyaakaamba akucita ciindi ncaakali kupona tazibikkilwi amaanu kanjikanji. Ncaakacita cijatikizya muntu amuntu iwakapona ansi ano. Nkakaambo kaako tweelede kuziiya kapati zintu zibotu nzyaakatucitila.” Amuvwunune kupeeji 7 yabroshuwa mubale muncali 5. Amubandike muncali wa 6 akupandulula Intembauzyo 37:9-11. Amupandulule mboinga yabelesegwa broshuwa muciiyo.
6 Amubone kwaamba kuti mwalemba zyoonse zyacitika kubikkilizya amabbuku ngomwasiya kutegwa mukapilukile alimwi. Nociciliko ciindi, atusungwaale kuyandaula bantu basinizizye akubagwasya kuba basikutobela Jesu Kristo Mufwutuli wesu.—Mt. 16:24.