Ibuumi Bwanu Amubuyakile Mumulimo wa Jehova
1 Ibaswiilizi bakwe Jesu wakabakozyanisyaa bayaki bamisyobo yobile. Umwi buumi bwakwe wakabuyakila atala amwala wabbwe uujatikizya kumvwida Kristo, elyo wakali kukonzya kukakatila ciindi camvwula yaguwo lyakukazigwa. Uumbi wakayakila amusenga uujatikizya kutamvwa, elyo taakali kukonzya kukakatila ciindi nokwakaboola mapenzi. (Mt. 7:24-27) Mumazubaa mamanino aabweende bwazintu ngotupona, tuswaanganaa mvwula zyaguwo zyamasukusyo manji. Makumbi aasiya aamapenzi mapati atalika kuvwuzyanya cakufwambaana kusingu. Sena tuyookakatila kusikila kumamanino ilusyomo lwesu kalucili luyumu nta? (Mt. 24:3, 13, 21) Ciya mbuli mbotuli mukuyaka buumi bwesu lino. Aboobo, tutamuki kulibuzya kuti, ‘Sena buumi bwangu bwa Bunakristo ndimukubuyakila mumulimo wa Leza?’
2 Ino caamba nzi kuyaka buumi bwesu mumulimo wa Jehova? Caamba kuti Jehova abe ngomusemu wabuumi bwesu. Caamba kuti ncotweelede kubikkila maanu kapati Mbwami. Caamba kumvwida Leza muzintu zyoonse nzyotucita zyabuzuba abuzuba. Kuyandika kuliyiisya Bbaibbele tobeni alimwi akuliiya caantoomwe amukwasyi alimwi amumbungano akucita mulimo wakukambauka camoyo woonse, kuzicita kuti zibe nzezintu nzyotusaanguna kucita. (Muk. 12:13; Mt. 6:33) Ikupona munzila eyi kupa kuti tube alusyomo luyumu nta mbuli bbwe alimwi lusyomo luli boobo talukadiliki ciindi camvwula yaguwo yamapenzi iili yoonse iinga yatusikila.
3 Ncintu cikondelezya kubona kuti tuulunzuma twabantu balimukuyaka buumi bwabo abulangizi bwabo bwakumbele mukucita mulimo wa Leza mbubonya mbuli mbwaakacita Jesu. (Joh. 4:34) Balabutobela bubambe boonse bwazyakucita zyateokrasi, elyo babaa zileleko zinji. Umwi mutumbu wakaluula mbuli mbobakakomezya bana babo bobile basankwa amulumaakwe mubukkale bwakubelekela Jehova: “Bukkale bwesu bwali bwakukutauka mukasimpe—twali kuunka kumiswaangano mipati yoonse, twalikulibambila miswaangano yambungano alimwi akujanika mulinjiyo alimwi lyoonse twali kuunka mumulimo wamumuunda.” Mulumi wakayungizya kuti: “Kasimpe takabujatikizyi buya buumi bwesu, mbuumi bwesu. Zyoonse nzyotucita tulazicita kweelana ankako.” Sena andinywe mwaubikka ambele mulimo wa Jehova mumukwasyi wanu?
4 Amubambe Mulongo Wazyakucita iwa Nsondo Ansondo Uubeleka: Mbunga ya Jehova ilatugwasya kutobela bubambe bwazyakucita munzila yakumuuya kwiinda mumiswaangano yosanwe yansondo ansondo. Ibanakristo ibayaka buumi bwabo mukukomba Jehova balacita zintu zyakumubili alimwi azijatikizya mukwasyi munzila iibazumizya kujanika kumiswaangano yoonse eyi iiyandika kapati. Tabazumizyi zintu zitayandiki kapati kubalesya kujanika kumiswaangano lyoonse.—Flp. 1:10; Heb. 10:25.
5 Ibanakristo basimide balizi kuti kubaa bubambe bwamuntu amuntu bwakuliyiisya Bbaibbele alimwi abwakwiiya caantoomwe amukwasyi kubikkilizya akulibambila miswaangano kulayandika kapati mbubonya mbuli mbokuyandika kulya lyoonse muziindi zimwi abuzuba. (Mt. 4:4) Sena inga tamukonzyi kubikka ambali maminiti aali 15 naa 20 buzuba abuzuba aakuliyiisya nobeni? Icintu cipati nkutalekela zintu zimwi kutola busena bwaciiyo. Acibe ciyanza canu cigwasya. Eci inga cayanda kuti kamufwuma kubuka kwiinda mbomucita lino. Ibamukwasyi wa Beteli ibasika ku 17,000 nyika yoonse mbwiizulwa balafwuma kubuka kuseeni kuti babandike lugwalo lwabuzuba. Aino, ikutegwa mucikonzye kufwuma muyandika kuya kukoona masiku muciindi ceelede kutegwa mukabuke kamulimvwide kabotu kamutakatede pe.
6 Ikuti naa kamuli basilutwe bamukwasyi, amutalisye kucita bubambe bwamukwasyi bwazyakucita zyateokrasi. Imikwasyi imwi ilabala caantoomwe Bbaibbele, Yearbook, naa bbuku limbi buyo ciindi nobalyookezya nobamana kulya mangolezya. Ibazyali banji ibalaa bana bakomena kusikila baba Banakristo bayumu munzila yakumuuya baamba kuti cimwi cintu cagwasya kuti bazwidilile nciyanza camukwasyi cakubikka ambali ciindi cimwi masiku nsondo ansondo ncobakali kulanganya zintu zyakumuuya caantoomwe. Umwi wisi bana akati kabaaba wakati: “Ndiyeeya kuti cintu cipati cakapa kuti bana besu baye ambele munzila yakumuuya nciiyo camukwasyi ncotwakali kucita nsondo ansondo muli Bwatatu masiku ncotwakatalisya myaka iili 30 yainda.” Boonse bana bakwe botatwe bakabbapatizigwa kabacili baniini, alimwi boonse botatwe bakazoonjila mulimo waciindi coonse. Kunze lyaciiyo camukwasyi, mulakonzya kamulibambila caantoomwe ntalisyo zyamakani zyamumuunda naa zibeela zyamuswaangano kubikkilizya azimbi zintu zibotu nzyomunga mwacita caantoomwe.
7 Mulizyakucita zyanu zyansondo ansondo, sena ‘mwacibelesya kabotu ciindi’ mukukambauka makani aa Bwami? (Kol. 4:5) Ibunji bwandiswe tujisi bubi akaambo kamikuli yamukwasyi alimwi ayambungano. Ikuti tatuciti bubambe bwini-bwini bwakutola lubazu mumulimo wakukambauka akuyiisya nsondo ansondo, mulabona zintu zimwi zyanjila akusinkila mulimo oyu mupati. Muntu umwi wakajisi cilawo cipati cakucezezya ŋombe wakati: “Mumwaka wa 1944 ndakabona kuti inzila ilikke njondakali kunga ndakonzya kuya mumulimo wakukambauka njakubikka ambali buzuba bumwi bwamulimo oyu. Kusikila lino ndicizumanana kuunka mumulimo buzuba bomwe ansondo.” Umwi mwaalu Munakristo wabona kuti ikubikka ciindi cabumboni cimugwasya kubaa mawoola akati-kati aasika ku 15 amwezi mumulimo wakukambauka. Ikuti kajisi mulimo wakumubili mu Mujibelo, ulaucita amana mulimo wakwe wamumuunda mafwumofwumo. Sena nywebo amukwasyi wanu tamukonzyi kubikka ambali buzuba bomwe nsondo ansondo bwakuya mumulimo wamumuunda akucicita kuti eci cibe mbobukkale bwanu munzila yakumuuya?—Flp. 3:16.
8 Amuzilingule Zyakucita Zyanu: Kuli zintu zikasya kuti tuyake buumi bwesu mukucita mulimo wa Jehova. Izintu nzyotutayeeyeli zilakonzya kucitika izinga zyanyonganya bubambe bwesu bwakwiiya, kuya kumiswaangano alimwi amumulimo. Awalo Satani Sinkondoma ulasola mbuli mbwakonzya ‘kutukasya’ akunyonganya makanzeesu. (1 Tes 2:18; Ef. 6:12, 13) Mutalekeli zintu ezi kuti zimutyompye akucileka. Amusole kucinca zintu munzila iiyandika kutegwa mucite mulimo wanu ngomwalibambilide. Kulayandika kuzumanana kutegwa muzuzikizye cintu ciyandika cini-cini.
9 Tatweelede kuzumizya muuya wanyika alimwi azisinkilizyo zyanyama yesu iitalondokede kunjizya milimo iitali yakumuuya iinga yatumanina ciindi. Kuyandika kulilingula, tulibuzye mibuzyo mbuli yakuti: ‘Sena bukkale bwangu bwatalika kunyongana? Sena ndatalika kuyaka buumi bwangu muzintu zyanyika eyi izitimane? (1 Joh. 2:15-17) Ino ndisowa ciindi cinji buti muzintu zijatikizya makanze aangu ndemwini, kweendeenda kwakulikondelezya, zisobano, naa kulikondelezya kumbi—kubikkilizya akweebela televisyini naa kubona-bona zyamu Internet—kweelana aciindi nconditola kucita zintu zyakumuuya?’
10 Ikuti naa mwabona kuti muyabufwundilizigwaa zintu zitayandiki, ino cinzi ncomunga mwacita? Sena inga tamukonzyi kupaila kuli Jehova kuti amugwasye kululamika buumi bwanu mumulimo wakwe mbuli mbwaakapaila Paulo naakalomba kuti buumi bwababunyina “bubambwe kabotu,” naa kuti ‘bapangike myoyo yabo’? (2 Kor. 13:9, 11) Mpoonya amukanze kutobela nzila njomwasala akululamika zintu ziyandika kululamika. (1 Kor. 9:26, 27) Jehova ulamugwasya kutaleya kululyo naa kulumwensi kumakani aamulimo ngomumubelekela.—Amweezyanisye Isaya 30:20, 21.
11 Amujate Bubi Mumulimo wa Leza Uukkomanisya: Ituulunzuma twabantu balapenga kuyandaula lukkomano, pele kumamanino aabuumi bwabo bajana kuti zintu zyakumubili nzyobasungweede kubelekela teezyabaletela lukkomano lukkalilila. Zyoonse zyali “zyabuyo.” (Muk. 2:11) Pele kuti naa buumi bwesu bwaba bwakubelekela Jehova, ‘katumubikkide kubusyu bwesu lyoonse,’ tulakkalwa moyo. (Int. 16:8, 11) Nkaambo kakuti Jehova ngotuponena. (Ciy. 4:11) Ibuumi tabukonzyi kubaa mpindu kuti ooyu Simakanze Mupati katutamulanganyi. Ikubelekela Jehova kupa kuti tujate bubi mumilimo ipa mpindu iitugwasya kubikkilizya abamwi kukabe kutamani.
12 Tatweelede kulengaana akuleka kulangila mamanino aabweende bwa Sataani aaswena afwaafwi kapati. Ibukkale bwesu bwabuzubaa buzuba bulajatikizigwa abulangizi bwesu bwakumbele. Ibantu bakuciindi ca Nowa ibatakali kusyoma kuti kunooli zambangulwe lyanyika yoonse mbwiizulwa “teebakezi,” bakali kwiide kulya akunywa akukwata akukwatizigwa kusikila mane “kupaya kwamaanzi kwakasika akubatola” nkaambo bakabikkila buyo maanu kumilimo yabo. (Mt. 24:37-39) Sunu, aabo basungwaalila buyo zintu zyanyika eyi bayoojana kuti bulangizi bwabo bwakumbele boonse bwamana lwaakusika lunyonyooko lupati kapati muntu ndwatanabona ilujatikizya “buzuba bwa-Jehova.”—2 Pet. 3:10-12.
13 Aboobo amuzumanane kuyaka buumi bwanu mukubelekela Leza uupona Jehova alimwi akucita luyando lwakwe. Ncecisyomezyo cilikke mubuumi obuno ncomunga mwabaacalo icijisi Mugwasyi uusyomeka Jehova. Tabeji—zyoonse nzyasyomezya ziyoozuzikizigwa. (Tit. 1:2) Tafwi—taakwe cintu cibikkwa mumaanzaa Jehova icitazuzikizigwi. (Hab. 1:12; 2 Tim. 1:12) Ibuumi bwakumvwa akusyoma mbotuyaka lino mmatalikilo buyo aabuumi buyoozumanana kukabe kutamani mumulimo uukkomanisya wakubelekela Leza wesu uukondwa!—1 Tim. 1:11; 6:19.
Majwi aakwelelezya sikubala aali apeeji 3]
“Kasimpe takabujatikizyi buya buumi bwesu, mbuumi bwesu.
Zyoonse nzyotucita tulazicita kweelana ankako.”