Kabbokesi Kamubuzyo

◼ Ncinzi bazyali ncobayelede kucenjezya bana babo baniini nobatola lubazu mumulimo wamumuunda?

Ibazyali Banakristo bacita kabotu kubatoleezya bana babo mumulimo wamumuunda, ikubayiisya kukambaukila beenzinyina makani mabotu aa Bwami. Nobacita boobo, kuyandika kunoobalanga lyoonse bana babo baniini akaambo kantenda zinga zyabacitikila mucilawo cibelekelwa nomuba mumasena “mutalibilisyi.” Ibana bacisigwa alimwi banjila mumapenzi akaambo kabulyato alimwi abantu bajata bana bayabuvwula muziindi zino zikatazya motupona. (2 Tim. 3:1-5) Ibazyali beelede kucenjela kutegwa bakwabilile bana babo baniini kuli baabo banga babanjizya mumapenzi. Ino ncinzi cinga cacitwa?

Ibbaibbele lilacenjezya kabotu kuti tucenjele akupakamana kutegwa tubone ntenda ilangilwa kucitika. (Tus. 22:3; Mt. 10:16) Aawa tatuli mukubikka milawo pe, pele inga cagwasya kuti muzyali naa muntu mupati wamusindikila mwana natola lubazu mumulimo wamumuunda. Kuti naa bana baniini bobile basikumwaya ibalaa maanu kababeleka antoomwe, cilagwasya kuti muzyali naa muntu mupati kababwene mpobabelekela ciindi coonse. Aino, mwana mbwayaabukomenena akubaa maanu, ibazyali inga babona naa uciyandika kulangwa abazyali.—Amubone alimwi Kabbokesi Kamubuzyo kamu Mulimo Wesu Wabwami wamu October 1992.

Cili kabotu kulangisya kubona kuti taakwe ntenda iliko netweenda amootokala alimwi anotweenda amaulu. Ikubweza ntaamu yeelede kanjikanji kulakwabilila kuntenda alimwi amapenzi ausisya aanga atucitikila amali akutola kucibbadela antoomwe amulandu ngotunga twabaawo munyika motukkala, ibantu mobayile kupana milandu lyoonse.

Ncibotu kuti banikenike “batembaule izina lya-Jehova.” (Int. 148:12, 13) Majwi abo akondelezya alimwi akulilemeka kwabo ciindi nobali mumuunda zilabakondelezya bamwi akulemya Jehova. Nobazyali, amubagwasye bana benu lyoonse kutola lubazu mukukambauka makani mabotu antoomwe akulibambila kubakwabilila ciindi coonse kuntenda zyoonse zinga zyaba!