Nobazyali—Amubayiisye Kukambauka Bana Banu
1 Mbungano zyesu zililongezyedwe abana banji balo balaa luyandisisyo lwakubelekela Leza. (Muk. 12:1) Bali bikkilizidwe akati kabaabo batambidwe a Jehova kuti batole lubazu mukumutembaula. (Int. 148:12-14) Aboobo kuyiisya nkobacita bazyali buzubaa buzuba kubana babo kweelede kubikkilizya malailile aambuli mbobakonzya kwaabila lusyomo lwabo kuli bamwi mumulimo wakukambauka Bwami.—Dt. 6:6, 7.
2 Amubayiisye Bana Bucebuce: Bana balayandika kuyiisya kabacili muciimo ca buniini ikusindikila bazyali babo mumulimo. Kamutaninga unka mumulimo, mweelede kulibambilila limwi abana kutegwa bakatole lubazu munzila iigwasya. Amuzibile limwi ncomuyanda kuti bakacite mumilyango. Ibana basyoonto kapati balakonzya kupa matrakiti alimwi akutamba bantu ku Ŋanda ya Bwami. Ibana basyoonto bacizi kubala kabotu balakonzya kulombwa kubala magwalo kumilyango. Balakonzya kupa mamagazini kubelesya nzila zifwaafwi. Mbobayaabuzibila, amubayiisye kubelesya Bbaibbele munzila nzyobabelesya. Basikumwaya banji bacili bana balijanina masena mubasiya mamagazini akucita nyendo zyakupilukila lyoonse. Ncibotu kwiindilila kuti mwana wabelekaa muntu mupati kwiindaa mwananyina. Oyu mupati ulakonzya kupanduluda siŋanda kuti mwana uyiisigwa mulimo.
3 Umwi mwana musimbi wakalomba lugwasyo kubaalu kutegwa aelele kuba sikumwaya wa Bwami. Nokuba kuti wakajisi buyo myaka yosanwe yakuzyalwa ciindi eco alimwi taakacizi kubala, wakali kukonzya kwaamba mulumbe wa Bwami cabusungu amilyango. Wakalaazi mumutwe aali magwalo wakali kujula akulomba siŋanda kuti abale mpoona wakali kupandulula.
4 Alimwi bana beelede kwiiya kwiinda mucikonzyanyo cabazyali mbuli mbokuyandika kubaa mulongo uuli kabotu wakutola lubazu mumulimo lyoonse. Bazyali beelede kubaa cilengwa cakuunka mumulimo nsondo ansondo akucitobelesya kutegwa bana baciziba cibeela cansondo cizandudwe kuti ncamumulimo wakukambauka.
5 Kuti bana bayiisigwa kuzwa kubuniini ikuyanda akukkomanina mulimo, bayookulwaizigwa kuyanda zyoolwe zipati kumbele antela kubikkilizya mulimo wabupainiya. (1 Kor. 15:58) Toonse tweelede kukulwaizya bana bali akati kesu ikuyaambele kabotu-kabotu kabali basikutembaula Jehova.