Amuyiisye Bana Banu Kutembaula Jehova
1. Sena bana balakonzya kumutembaula Jehova?
1 Intembauzyo 148:12,13 ikulwaizya basankwa abasimbi kuti “batembaule izina lya-Jehova.” Magwalo ajisi zikozyanyo zinji zyabana basyoonto ibakacita boobo. Mucikozyanyo, “Samuele wakali kubeleka milimo kubusyu bwa-Jehova, kali mwana.” (1 Sam. 2:18) Kakali “kasimbi” kakaambila mukaintu wa Naamani kuti musinsimi wa Jehova ku Israyeli wakali kukonzya kuponya cinsenda ca Naamani. (2 Bam. 5:1-3) Jesu naakanjila mutempele akucita maleele aagambya, “bana” mbabakoongolola kuti: “Hosana ku-Mwana a-Davida.” (Mt. 21:15) Mbuti bazyali mbobanga bayiisya bana babo kutembaula Jehova?
2. Nkaambo nzi ncociyandika kubazyali kuba acikozyanyo cibotu kubana babo?
2 Cikozyanyo: Kabatana kuyiisya kasimpe mumyoyo yabana babo, bamatata bana Israyeli cakusaanguna bakayiisyigwa kuyanda Jehova akutobela milawo yakwe mumyoyo yabo beni. (Dt. 6:5-9) Ikuti kamwaambaula munzila iikulwaizya kujatikizya mulimo akuubikka amulongo wanu wazintu zyomucita ansondo, bana banu bayoobona mulimo wakukambauka kuti ulayandika kapati akukkomanisya.
3. Mbuti mucizi umwi mbwaakagwasigwa acikozyanyo cabazyali bakwe?
3 Mucizi umwi uyeeya boobu: “Nondakali kukomena, milimo yakali kucitwa nsondo ansondo yakali kubikkilizya kutola lubazu mumulimo wamumuunda kumamanino aansondo aimwi. Ndali kukonzya kubona kuti bazyali bangu bakali kukukkomanina kukambauka. Twakakomena katubona mulimo wakukambauka kuba cintu cikkomanisya kapati.” Mucizi ooyo wakaba sikumwaya uutabbapatizidwe naakajisi myaka iili ciloba alimwi wabeleka mumulimo waciindi coonse kwamyaka yiinda ku 32.
4. Ino ncinzi ciyandika mukuyiisya bana kuyaambele?
4 Lwiiyo Luyaambele: Amubatolelezye bana banu nomuunka mumulimo. Ambweni balakonzya kukonkomona acijazyo, kupa uuli aŋanda katulakiti naa kubala lugwalo. Eeci ciyoobapa kukkomana akubagwasya kuba basicamba ciindi nobakambauka mulumbe wa Bwami. Nobaya bukomena, bayooyaambele mukutola lubazu mumulimo wakukambauka. Aboobo, amubagwasye kuyaambele akubona mbaakani zyakumuuya nzyobeelede kuba anzizyo kutegwa bayaambele mumulimo.
5. Ino ncinzi ciyandika kutegwa mwana ayelele kuba sikumwaya uutanabbapatizigwa?
5 Amubandike abaalu cakufwambaana mbomwabonena buyo kuti bana banu baleelela kuba basikumwaya batanabbapatizigwa aleelyo nobaamba kuti bayanda kucita boobo. Kuba sikumwaya kuyoobapa kubona mukuli ngobajisi wakutembaula Jehova. Katana kweelela, kamuyeeya kuti mwana tayandiki kuti mane azibe zintu zinji mbuli kuti muntu mupati uubbapatizidwe. Sena mwana wanu ulamvwisya njiisyo zyantalisyo zyamu Bbaibbele? Sena ulazitobela zyeelelo zyakulilemeka zyamu Bbaibbele? Sena ulayanda kutola lubazu mumulimo alimwi akuzibisigwa kuti ngumwi wa Bakamboni ba Jehova? Ikuti naa kacili boobo, baalu balakonzya kubona naa uleelela kuba sikumwaya uutanabbapatizigwa.—Amubone bbuku lya Bakamantene Mukucita Kuyanda kwa Jehova, pp. 79-82.
6. Nkaambo nzi ncocigwasya kubazyali kuti bayiisya bana babo?
6 Ikuyiisya bana kutembaula Jehova kuzwa mumyoyo yabo mmulimo mupati. Nokuba boobo, cilabakkomanisya kapati bazyali kubona bana babo kabayaambele kumuuya ikwiinda zintu zimwi zinji nzyobakonzya kucita. Iciinda kukkomanisya, Jehova ulakkomana nabona bana kabaambilizya milimo yakwe iitaliboteli.