Nobazyali—Amubayiisye Bana Benu Kuzwa Kubuvwanda
1 “Iyisya mwana aende munzila iielede, lino akomena takooyooleya mulinjiyo.” (Tus. 22:6) Nobazyali, ikuti kamuyanda bana benu kuti ‘batakaleyi’ munzila yakasimpe, ino ndiilili nomweelede kutalika kubayiisya? Mweelede kutalika kabacili bavwanda!
2 Paulo nakaamba kuti, ilwiiyo lwa Timoteo lwakumuuya lwakatalika ‘kuzwa kuciindi naakacili mwana,’ wakali kwaamba kuti, lwakatalika kubuvwanda. (2 Tim. 3:14, 15) Cakatobela ncakuti, Timoteo wakaba mwaalumi uuli kabotu munzila yakumuuya. (Flp. 2:19-22) Nobazyali, andinywe mweelede kutalika kubayiisya zyiyandika ‘kabacili bavwanda’ bana benu ikutegwa ‘bakomene mumeso aa Jehova.’—1 Sam. 2:21.
3 Amubape Maanzi Ngobayandika Kutegwa Bakomene: Mbubona tusamu tucili tuniini mbotuyandika maanzi lyoonse kutegwa tukomene kuba masamu mapati, abana bamisela yoonse bayandika kupegwa imaanzi aakasimpe ka Bbaibbele kutegwa bakomene kabali babelesi ba Leza basimide. Inzila iiyandika kapati mukuyiisya bana kasimpe alimwi akubagwasya kuti babe aacilongwe cini-cini a Jehova, beelede kubaa ciiyo ca Bbaibbele lyoonse camukwasyi. Pele nobazyali mweelede kubikkila maanu kubulamfwu bwaciindi mwana umwi aumwi ncakonzya kunoocibikkila maanu kuzintu ziyiigwa. Kubana bacili baniini, iziiyo zinji zikosoodwe muzibeela-beela zifwaafwi inga zyagwasya kwiinda ziiyo zisyoonto zitola ciindi cilamfwu.—Dt. 11:18, 19.
4 Mutazinyansyi nguzu zyabana benu zyakukonzya kwiiya. Amubaambile zyaano zijatikizya bantu bamu Bbaibbele. Amubakulwaizye kuzekaula zifwanikiso zyazintu zyakuciindi ca Bbaibbele naa kusobana zisobano zijatikizya zintu eezyo. Amwaabelesye kabotu mavidiyo alimwi amakkaseeti aakuswiilila kubikkilizya ayaayo aazisobano zyamu Bbaibbele. Amweendelezye ciiyo camukwasyi kweelanaa ziimo zyabana benu alimwi akweelana anzyobakonzya kwiiya. Ikuyiisya kwamatalikilo kuyoojatikizya zintu izisyoonto buyo zitakatazyi; pele mwana mbwayaabukomena, kuyiisyigwa kwakwe kunoojatikizya zintu zinji alimwi kunoozumanana. Ikuyiisya Bbaibbele kwanu akube kooko kukondelezya alimwi kujatikizya zintu zisiyene-siyene. Muyanda kuti bana benu ‘kabaliyandisya’ Jwi lya Leza, aboobo amusoleke kusikila mpomugolela ikutegwa ciiyo canu cibote.—1 Pet. 2:2.
5 Amubakulwaizye Kutola Lubazu mu Mbungano: Amubabikkile mbaakani zyakuti baye ambele bana benu kutegwa kabatola lubazu lyoonse mumbungano. Ino nimbaakani nzi yakusaanguna njobeelede kuba anjiyo? Ibazyali bamwi bajisi bana bobile ibacili baniini bakati: “Boonse bobile bakatalika kuyiisyigwa kukkalikila kabatayobeki mu Ŋanda ya Bwami.” Kwamana waawo, mweelede kubayiisya bana benu kuvwiila mibuzyo kumiswaangano cakutabala buya, alimwi aibe mbaakani yabo kulilembya mu Cikolo Camulimo Weendelezyegwaa Leza. Imbaakani zili kabotu zyeelede kucitwa kujatikizya mulimo wamumuunda kwaabila katulakiti kuli basiŋanda, kubala lugwalo, ikwaabila magazini alimwi akwaambaula mibandi iigwasya abaabo basiŋanda bajanika.
6 Amube Cikozyanyo Cikulwaizya: Sena lyoonse bana benu balamumvwa kamwaamba zintu nzyayanda Jehova alimwi akupaila kulinguwe? Sena balamubona kamwiiya Jwi lyakwe, kamujanika kumiswaangano, kamutola lubazu mumulimo wamumuunda alimwi akuyandisisya kucita kuyanda kwa Leza? (Int. 40:8) Cilayandika kapati kuti kabamubona alimwi kamucita zintu eezyi zyoonse antoomwe ambabo. Ikujatikizya banyina ibakakomezya bana bali cisambomwi kuba Bakamboni basyomeka, mwanaabo umwi mukaintu wakati: “Icakatuyumya-yumya kapati ncitondezyo cabo Bamaama cibotu kwiinda majwi aabo.” Imuzyali wabana bone wakati: “Majwi aakuti Jehova weelede kupegwa busena bwakusaanguna teetwakali kwaabelesya buyo pe, pele yakaba njenzila njotwakali kupona.”
7 Nobazyali, mweelede kutalika kuyiisya bana benu kabacili bavwanda, ikubayiisya kasimpe kuzwa mu Jwi lya Leza, ikubabikkila mbaakani kutegwa bayaambele alimwi amube cikozyanyo cibotu ciinda zyoonse kubota kulimbabo. Munookkomene lyoonse kuti mwazicita zintu eezyo!