Kabbokesi Kamubuzyo

◼ Sena mulilibambilide kujanika muntenda iiyandika lugwasyo lwakufwambaana?

Sunu, ‘iziindi zyalufwu azyamapenzi’ kanjikanji zileta bukkale buyandika lugwasyo lwabasilisi cakufwambaana kubikkilizya apenzi lyakusinikizigwa kubikkwa bulowa. (Muk. 9:11) Ikutegwa katulibambilide kabotu ikujanika mumapenzi aali boobu, Jehova watupa lugwasyo munzila zinji kwiinda mumbunga yakwe, pele ulangila kuti aswebo tubeleke mulimo wesu. Ansi awa kwalembwa zintu zikonzya kumugwasya.

• Kamubwezelezya Advance Medical Directive/Release card yakono ciindi coonse.

• Amubone kwaamba kuti bana banu balabwezelezya Identity Card yakono.

• Amulilange-lange alimwi pepa lyamukati lya Mulimo Wesu Wabwami wa January 1995, akwiindulula-indulula kubona mbomukonzya kubandika abamadokotela alimwi ababetesi kujatikizya busilisi bwamwanaanu.

• Amulange-lange zibalo zibandika zintu zijanika mubulowa alimwi azintu zimbi zikonzya kubelesyegwa muciindi cabulowa. (Izyakulwaizigwa: Ngazi Yamulindizi ya October 1, 1994 CN peeji 31; June 1, 1990 CN peeji 30-1; March 1, 1989 CN peeji 30-1; Awake! December 8, 1994 peeji 23-7; August 8, 1993 peeji 22-5; November 22, 1991 peeji 10; alimwi amapepa aamukati aa Mulimo Wesu Wabwami, January 1995 a September 1994. Amwaabikke mufailo kutegwa kacitakatazyi kwaayandaula.)

• Amusale cabusongo ikuti naa mulakonzya kuzumizya kuti kubelesyegwe muncini uuzingulusya bulowa bwazwisigwa mumubili naa ikukonzya kutambula misamu iijisi zintu zijanika mubulowa.

• Ikuti kacikonzyeka, kamutanaunka kucibbadela amubazibye baalu kutegwa bamugwasilizye alimwi akwaambila ba Hospital Liaison Committee (HLC) kuti kakuyandika. Ikuti naa mmwana waciswa, amwaambile baalu kuti babazibye kufwambaana ba HLC.

Amucisalazye Kuti Tamuyandi Kubikkwa Bulowa: Imalipooti atondezya kuti ibakwesu abacizi bamwi balalindila mane kusika kumamanino nobaya baambile dokotela uubasilika kuti tabayandi kubikkwa bulowa. Eci tacibagwasyi pe basilisi alimwi cimubikka muntenda nywebo yakusinikizigwa kubikkwa bulowa. Ikuti naa bamadokotela bazizyiba zintu nzyomusyoma alimwi anzyomuyanda kuti mucitilwe zyalo zigwasilizigwaa mapepa aasainidwe aatondezya malailile eeni-eni, cilabagwasya kapati kuyaambele kakunyina akusowa ciindi alimwi kanjikanji cilabagwasya kulanga-langa nzila zimbi zyabusilisi zitajatikizyi bulowa.

Mbwaanga ntenda iiyandika lugwasyo lwabasilisi cakufwambaana ilakonzya kutucitikila kufwumbwa ciindi ikanjikanji aciindi notutayeeyeli, amubweze ntaamu lino kutegwa mulikwabilile nywebo abana banu kubusilisi bujatikizya kubikkwa bulowa.—Tus. 16:20; 22:3.