Tukambauka Makani Mabotu
1 Tulaa coolwe cipati kapati ikuba bakambausi ba “makani mabotu.” (Rom. 10:15) Tujisi mulumbe uukatalusya kuli baabo bali mumapenzi abaabo batyompedwe. Ino inga twabagwasya buti ikubona kuti tubaabila “makani mabotu loko”?—Is. 52:7.
2 Amulibambile Makani Aalimvwisya Kabotu: Tuyoobaa mibandi iigwasya mumulimo ikuti naa twabikkila maanu kuzintu zikulwaizya. Aboobo eelyo notulibambila nzyotutikaambe anotwiinduluka bbuku naa magazini yakumwaya njotujisi, tweelede kubikkila maanu kumakani aayo aakondelezya. Kwiinda mukuyiisya makani aabulangizi bwamu Bbaibbele calusyomo alimwi abusungu, tuyookulwaizigwa kapati anzyotuyoojana.—Tus. 25:11.
3 Nokuba kuti tuleetezyegwa ibantu nobatwaambila mapenzi ngobajisi akaambo kakubija kwazintu munyika, tweelede kubaambila makani aa Bwami bwa Leza kuti bulikke mbobutiikaamanizye ncobeni mapenzi aabantu boonse. Noliba leelyo notubandika makani aa “buzuba bwakuliya inkoto” bwa Jehova obo buboola, tuyanda kuti tubatondezye ncaali ‘makani mabotu bacete.’ (Is. 61:1, 2) Tweelede kubasyomezya bantu mbotukambaukila kuti zintu zyoonse Jehova nzyayoocita ziyootukkomanisya kapati alimwi nzintu ziyoozwidilila ncobeni.
4 Amubandike Kasimpe Cakukondwa: Bantu nobabona mbotukkomene alimwi anotwaambaula cakusyomeka, ibunji bwaziindi balayandisisya kuswiilila nzyotwaamba. Ikuti katuboneka kuba bantu balaa bulangizi bwazintu zibotu kumbele, aabo batuteelela bayoobona kuti ‘tulabukkomanina bulangizi obo.’ (Rom. 12:12) Aboobo balakonzya kubaa luyandisisyo lwakuti baswiilile makani mabotu. Inzya, tulijisi kaambo kabotu ncotweelede kuba bantu bakkomene lyoonse mumulimo uuli oonse ngotucita.
5 Mbotuli babelesi bamakani mabotu, tujisi mulimo mupati kunze lyakuzibya buyo bantu. Bukambausi bwesu bupa bulangizi busyomeka bwabuumi bubotu lino alimwi akumbele. (1 Tim. 4:8) Notusikila muntu amuntu, imoyo wesu mubotu uyoolibonya muzintu nzyotwaamba alimwi eci ciyoogwasya bantu kuti baatambule makani mabotu. Kwiinda mukubikkila maanu kuzintu nzyotwaamba ambotuzyaamba, atubakulwaizye babombe myoyo kutambula makani mabotu aakondelezya ngotukambauka!