Amumwiiye ‘Leza Wesu Uukkomene,’ Jehova
1 Masimpe, Jehova uyanda kuti bantu kabakkomana. Ijwi lyakwe litupa kulangila zilongezyo zibotu kapati nzyabambilide bantu. (Is. 65:21-25) Ceelede kulibonya kuli bamwi kuti tulakukkomanina kubakambaukila ‘Makani Mabotu aabulemu bwa-Leza uukkomene.’ (1 Tim. 1:11) Mbotubandika kujatikizya mulumbe wa Bwami kweelede kutondezya luyando ndotujisi kukasimpe alimwi akubikkila maanu kwini-kwini nkotucita kubantu mbotubandika limwi.—Rom. 1:14-16.
2 Masimpe, ziindi zimwi cilakonzya kutukatazya kuba bantu baseka-seka. Muzilawo zimwi, tulajana bantu basyoonto baswiilila mulumbe wa Bwami. Kulakonzya kuba mazuba amwi notucitikilwa mapenzi mubuumi bwesu. Kutegwa katukkomene lyoonse, tweelede kutelaika mbociyandika kapati kuti bantu bali mucilawo cesu baswiilile akumvwisya makani mabotu aa Bwami ngotukambauka. (Rom. 10:13, 14, 17) Kuzinzibala kuyeeya ali ceeci kuyootugwasya kuzumanana kwaambilizya calukkomano bubambe bwalufwutuko bwaluzyalo lwa Jehova.
3 Amubandike Kapati Azintu Zibotu Ziyoocitika Kumbele: Alimwi tweelede kuzibikkila maanu eezyo nzyotwaamba. Nokuba kuti inga twatalisya mubandi kwiinda mukwaamba penzi naa kaambo kaambwa muli sikapepele naa mumuteende ikali mumizeezo yabantu, tatweelede kubandika buyo zintu zityompya pe. Mulimo wesu ngwakuleta “makani mabotu loko.” (Is. 52:7; Rom. 10:15) Makani mabotu aaya mmulumbe uuyeeme azisyomezyo zya Leza zyabukkale bubotu kapati buyooba kumbele. (2 Pet. 3:13) Kamukayeeyede kaambo aaka, amwaabelesye Magwalo kutegwa ‘mwaange batyokede mumyoyo.’ (Is. 61:1, 2) Eeci ciyoomugwasya aumwi wandiswe kukkomana lyoonse alimwi akuba bantu bakulwaizya.
4 Masimpe, bantu bayootubona mbotukkomene notutola lubazu mumulimo wakukambauka. Aboobo, lyoonse notukambauka makani mabotu aa Bwami kubantu bamucilawo cesu, katutelaika kujatikizya bube bwa ‘Leza wesu uukkomene,’ Jehova.