Sena Muli Mukuliyumya?
1 “Taakwe kubotelwa kumbi nkunjisi kupati kwiinda oku . . . kuti bana bangu baleenda mulusinizyo.” (3 Joh. 4) Ikuliyumya kwabana ba Johane bakumuuya kwakamupa kukondwa kapati. Elo kaka cilamukonda kapati Taateesu wakujulu ikubona tuulunzuma twabaabo ibalangilwa kuba bana bakwe ‘kabeenda mulusinizyo!’—Tus. 23:15, 16; 27:11.
2 Nokuba kuti ibantu ba Leza boonse balazumanana kubeleka cabusungu mumulimo wa Bunakristo, ibamwi bucebuce bajokela munsi. Nokuba kuti bantu aaba balakonzya kuti bakali basungu eelyo nobakaiya kasimpe ciindi cakutaanguna, mukuya kwaciindi babaa cilengwa cakubeleka buyo kwakaindi kasyoonto naa kutola lubazu muziindi buyo zimwi mumulimo wakugwasya bantu kuba basikwiiya.
3 Ibamwi mbuli cilengwa balakonzya kujoka munsi akaambo kakwaalilwa kucita zintu alimwi akucembaala. Nokuba boobo, tweelede kubalumba kukuliyumya kwabo nkobatondezya. Balabeleka mbuli mbobakonzya. Pele umwi aumwi iwakaaba buumi bwakwe kuli Leza weelede kulibuzya kuti: ‘Sena ndatalika kubikkila maanu kapati kuzintu nzyondiyanda ndemwini mubuumi bwangu icakuti zintu zya Bwami zijisi buyo kaindi kaniini mubuumi bwangu? Sena ndaba muntu ‘ulaamoyo upya buyo aniini,’ naa sena ‘ndicisolekesya’ kubeleka canguzu?’ (Ciy. 3:15, 16; Lk. 13:24) Atuyeeye cakuzinzibala ali zyeezyo nzyotucita alimwi akuyaambele mumbazu motubwene kuti kuyandika kucita boobo kumwi katuzi kuti Jehova usyomezya “bulemu akulemekwa aluumuno kuliboonse bacita bubotu.”—Rom. 2:10.
4 Mbotunga Twaliyumya: Ncinzi cakamupa kuliyumya Jesu? Ulapandulula Paulo naamba kuti: “Nkaambo kalukondo ndwaakabikilwa kunembo, wakazyandamana [acisamu cakupenzezya, NW] wakaubaula buusu, eno sunu ulikede kululyo lwacuuno ca-Leza.” (Heb. 12:1-3) Ilukondo ndwaakabikilwa kumbele Jesu lwakali kuyandika kapati kwiinda misunko yakaindi buyo kasyoonto mwalo mwakeelede kwiinda. Andiswe tulakonzya kuliyumya ikuti naa twayeeya lukondo ndotubikkilidwe kumbele lyesu. (Ciy. 21:4, 7; 22:12) Ikuti katusyoma muli Jehova kuti atupe nguzu kwiinda muciiyo cesu tobeni, ikujanika lyoonse kumiswaangano alimwi akukakatila mumupailo, ciyootugwasya ikuliyumya mumulimo ngwatupede kuti tuucite.
5 Jehova ulakondwa mukuliyumya kwabaabo ibasyomeka kulinguwe. Aboobo atuyungizye lukondo lwakwe kwiinda mukuzumanana ‘kweenda mulusinizyo.’