Zilongezyo zya Jehova Zilatuvwubya
1 Kusumpuka kwamuntu kanjikanji kulabonwa kwiinda mumali ngavwola. Nkakaambo kaako ibunji bwabantu ncobayeeyela kuti aabo ibajisi mali manji mbabakkomene alimwi akukkutila abuumi. Nokuba boobo, ibantu aabo ibayeeya kuti mali alakonzya kubaletela lukkomano balilubide kapati. (Muk. 5:12) Aabo “bayandisya kuvuba” munzila yakumubili, taakwe buya nobajisi lukkomano lyoonse pe. (1 Tim. 6:9) Mukwiimpana, ibabelesi ba Jehova balikkomene kapati alimwi mbabantu bavwubide nyika yoonse mbwiizulwa. (Tus. 10:22; Ciy. 2:9) Munzila nzi?
2 Bumboni Bwabuvwubi Bwesu: Tulaa luzibo lunji kapati munzila yakumuuya alimwi tulalimvwisya Jwi lya Leza, Ibbaibbele. Kwiinda mumbunga yakwe yaanyika, Jehova ulatuyiisya lyoonse kujatikizya nguwe alimwi a Mwanaakwe kutegwa tugwasigwe. Luzibo lwini-lwini lutugwasya kuti tucikonzye kuswenenena kuli Jehova alimwi akubaa cilongwe cibotu anguwe. (Jak. 4:8) Ikuziba kwaandaanya cibotu kucibi alimwi akutobela milawo ya Leza, kulatukwabilila kumalwazi aamwi alimwi akuntenda. Tulaalusyomo lwakuti Jehova uyootugwasya, aboobo eci ncecitupa kukkutila kwabunaleza alimwi akukkazika myoyo.—Mt. 6:33.
3 Tulaa luumuno alimwi alukamantano mukati kabunyina bwesu bwakumuuya akaambo kakuti tukomezya mucelo wamuuya wa Leza. Katukamantene aluyando luyumu, tatweelede kulimvwa kuti Jehova naa ibakwesu tabatubikkili maanu ciindi notujanika mumapenzi.—Gal. 6:10.
4 Buumi bwesu bulaampindu kapati alimwi bulijisi mulimo. Tulaa coolwe cibotu kapati cakutola lubazu mukukambauka makani mabotu kucitwa munyika yoonse mbwiizulwa. Eeci cilatuletela lukkomano lunji kapati notugwasya bamwi ikubaa cilongwe cibotu a Leza alimwi anotubeleka antoomwe ambabo mubukombi busalala. Mulimo wesu mubotu uutakonzyi kweelanisigwaa cintu cili coonse umuletela bulemu Jehova alimwi utupa lukkomano notutola lubazu mukusalazya zina lyakwe. Tulazumanana kubaa lusyomo, katuzi kuti bulangizi bwesu bwakumbele buyoozuzikizigwa ino-ino.
5 Ikutondezya Kulumba Kwesu: Atuzumanane kumulumba Jehova akaambo kazilongezyo zyakwe zyalo zitupa kuba bantu bavwubide kwiinda munyika yoonse mbwiizulwa. (Tus. 22:4) Ikubaa ciindi buzubaa buzuba cakuzinzibala kuyeeya ali zyeezyo nzyotujisi cilatukulwaizya kumulumba Jehova akaambo kaluyando lwakwe lwabwaabi alimwi akuzumanana kumukomba walo alikke.