Amwiibikkile Maanu Milimo ya Leza Iigambya
1 Twakalaa ciindi cibotu notwakabungene kwamazuba otatwe ku Muswaangano Wacooko wa “Basikucita Zyaambwa mu Jwi lya Leza.” Twakaleka milimo yabuzubaa buzuba akugamika mizeezo kumilimo ya Jehova iigambya. Ipulogilamu yakabambilwa kuti itugwasye kuyungizya lusyomo lwesu muli Leza alimwi amu Jwi lyakwe, ikuyumya cilongwe cesu anguwe alimwi akutukulwaizya kusungwaala mumulimo. Ino mbuti mbotuli mukugwasigwaa zintu nzyotwakayiisigwa?—Joh. 13:17.
2 Nomikwasyi Amutobele Jwi lya Leza: Makani aakusiilana aakuti “Amutobele Jwi lya Leza” akatugwasya ikulanga-langa bukkale bwamikwasyi yesu munzila yakumuuya. Ibana balayanda kwiiya. Aboobo, ibazyali bakomba bakakulwaizigwa kucita ciiyo ca Bbaibbele camukwasyi kuti cibe nentalisyo yakuyaka mukwasyi muyumu munzila yakumuuya. Basilutwe bamikwasyi banji bali mukubandikaa bana babo broshuwa lipya lya Mulakonzya Kuba Mulongwe wa Leza! Broshuwa eeyi liyoobagwasya ikubaa cilongwe cibotu alimwi ciyumu a Jehova. Nobazyali, amubayiisye bana banu ikubikkila maanu akuti bazibe mbwalimvwa Leza. Amulutondezye luyando ndomujisi kulinguwe alimwi akumilimo yakwe. (Int. 103:2) Amubelekele antoomwe ikubikka alimwi akujana mbaakani zyakumuuya mpoonya akutola lubazu luzwide mukubelekela Jehova.
3 Jwi lya Leza Lilatumunikila Munzila Yesu: Twakakkomana kapati ikutambula bbuku lipya lya Isaiah’s Prophecy—Light for All Mankind I. Ino musikidaali mukubala volyumu eeyi yakusaanguna? Bbuku lya Isaya lisinsima zyalubeta lutakkomanisyi kubantu batakombi alimwi azilongezyo zya Bwami zikkomanisya kubantu ba Leza. (Is. 34:2; 35:10) Alimwi lilayumya lusyomo alusinizyo muli Jehova alimwi ambwazyeendelezya zintu.—Is. 12:2-5.
4 Nomubala bbuku lya Isaiah’s Prophecy I, mulakonzya kubona kuzwa kumatalikilo Isaya mbwaakazumanana kusyomeka kuli Jehova nokuba kuti wakali zingulukidwe abubi. Eelyo naakatambwa kuti abe mutumwa wa Leza, Isaya wakavwiila kuti: “Mpendi! Unditume mebo!” (Is. 6:8) Ikuzinzibala kuyeeya muuya wakwe wakulisungula ciyoomugwasya ikuzumanana kukambauka makani mabotu, ikutola lubazu luzwide mukupa ‘bukamboni kumisyobo yoonse.’—Mt. 24:14.
5 Kwiinda mukubikkila maanu kwesu kumilimo ya Jehova, tuyoosumpula bupati bwakwe. Aboobo amucikkomanine coolwe cakuba basikucita zyaambwa mujwi lya Leza!