Atumulemye Jehova Kwiinda Mubukkale Bwesu—Cibeela 1
1 Musyule omu twakapegwa lulayo lunji lujatikizya bukkale bwamumukwasyi. Pele twaambo tumwi tuyandika kwiindulula kutegwa boonse bagwasigwe kubikkilizyaa bapya banji bakaziba kasimpe mumyaka misyoonto buyo yainda.—2 Pet. 1:12.
2 Ino lukwatano tululanga buti? Lukwatano mbubambe bulemekwa mbutwakabikkilwaa Jehova kacili cintu cibotu alimwi ceelede kubana bakwe baanyika. Nokuba boobo, Ibbaibbele talitondezyi kuti kukwatana alimwi akuzyala bana ncecintu ciyandika kapati pe. (Muk. 12:13; Mk. 12:30) Jesu kwiina naakakwata pe, aboobo eeci cakamupa kubikkila maanu kapati kukubelesya ciindi cakwe alimwi azipego mumulimo. Awalo Johane Mubbapatizi tanaakakwata pe. Aboobo, sena ncamaanu kutalemeka bakwesu abacizi Banakristo babelekela Jehova kabatakwete naa kukwatwa?
3 Icipa kuyeeya kuli boobo ikutali kwamumagwalo nkutobela zilengwa zimwi zyalo zikulwaizya kuti kukwata akuzyala bana ncintu ceelede kucitwa ziyume zitete. Mumasena manji, ikukwataa kuzyala bana kubonwa kuti mbobuumi bweelede. Aboobo aabo batakwete naa batakwetwe alimwi batajisi bana babonwa kuti kuli cilubide mumibili yabo. Ikutelaika nzyotusyoma, masimpe kuyoopa kuti bakwesu abacizi baleke kusungilizya alimwi akusampaula bana babo naa bakubusi bali mumbungano batakwete naa kukwatwa.
4 Kubbuku lya Matayo 19:11, 12, Jesu wakakulwaizya kutakwata naa kutakwatwa kuli baabo ibakonzya kupona buumi buli boobo. Wakatondezya kuti makanze akucitila boobo ngakuti kutabi cintu cimunyonganya Munakristo oyu mumulimo wakwe kuli Leza. Jesu wakatukulwaizya kulumba Bwami. Kwakali kwiindana kupati mukuyeeya mumazubaa Jesu mbubwenya mbuli mbokubede mazubaano kujatikizya kaambo kakubikka mulimo wa Leza a Bwami Bwakwe kumbelaa lukwatano. Muntu wakali kuyandika kubaa luyando lunji ncobeni kuli Jehova alimwi akukanza kulwana mizeezo yazilengwa ezi ziyume zitete kutegwa azwidilile. Ikubaa miyeeyo ya Kristo mumakani aaya kulakonzya kugwasya Munakristo kutegwa awalo azwidilile katakwete naa kukwatwa.
5 Leza takasyi kukwata naa kukwatwa pe; aboobo aabo ibatakukkomanini kutakwata naa kukwatwa naa aabo ibakonzya kweenwa akutalilemeka kwakoonana, cili buyo kabotu kuti bakwate naa kukwatwa. (1 Kor. 7:8, 9, 28, 32-34, 38) Nokuba boobo, Ibbaibbele talikulwaizyi kufwaambana kukwata naa kukwatwa ccita kuti umwi wainda aciimo cabukubusi, ciindi ikulombozya koonana nokutacili ncecintu cipa kuti muntu abaa kusala kuli boobo. Alimwi lyaambila limwi kuti lukwatano loonse lulijisi mapenzi alimwi lulacesya ciindi ca Munakristo cakubeleka mumulimo wa Jehova. Ikutegwa aabo bakwatana bazyibile limwi kuti bayoojana mapenzi, imwaapostolo Paulo wakaambila limwi kuti kuli mapenzi aajanika mulukwatano.—1 Kor. 7:28.
6 Bamwi balakonzya kuzumanana kabatakwete naa kutakwatwa kwaciindi cili mbocibede alimwi bamwi mubuumi bwabo boonse buya. Akati kabaaba, kuli bakwesu abacizi babeleka canguzu kabali bapainiya naa babelekela kumaandaa Beteli. Ino mbuti kwaamba zyabana besu? Sena ciyoomukkomanisya ikuti naa bana banu baliimya kukwata naa kukwatwa kwaciindi cili mbocibede nokuba kulekela limwi kutegwa babeleke kusikila mpoceela mumulimo wa Jehova mbuli bwakacita Samuele, imwana musimbi wa Jefita, Timoteo alimwi abakwesu basyomeka ibasyeede bananike? Ikuti kuyeeya kwesu kakweendelanaa kwa Leza lyoonse, tuyooba bantu bakkomene kapati.