Kasimpe Kajatikizya Zintu Mboziyooba Kumbele Aamazuba
Sena kuli nomwakalibuzyide kale kujatikizya mbozinoobede zintu kumbele aamazuba? Bbaibbele lilatwaambila kujatikizya zintu ziyandika kapati iziyoocitika ino-ino alimwi iziyoobajatikizya bantu boonse anyika.
Jesu wakapandulula ‘mbotuyoozyiba kuti Bwami bwa Leza bulaafwaafwi.’ (Luka 21:31) Wakasinsima kuti akati kazintu zimwi iziyoocitika, kunooli nkondo, mizuzumo yanyika mipati, nzala alimwi azilwazi, izintu nzyotubona mazuba aano.—Luka 21:10-17.
Kuyungizya waawo, Bbaibbele litwaambila kuti cintu cimwi iciyoocitika “kumazuba aamamanino” aabweendelezi bwabantu ncakuti, bantu bayoolilemeka munzila iitali kabotu. Mulakonzya kubala kujatikizya mbobanoobede kulugwalo lwa 2 Timoteyo 3:1-5. Ciindi nomubona zintu eezyi mazuba aano, cakutadooneka mulazumina kuti businsimi bwamu Bbaibbele oobu buleendelana azicitika lino.
Ino eeci caamba nzi? Caamba kuti ciindi cili afwaafwi cakuti Bwami bwa Leza bucince zintu calo iciyoopa kuti buumi munyika bubote kapati. (Luka 21:36) Mu Bbaibbele, Leza usyomezya zintu zibotu iziyoocitika munyika alimwi akubantu ibayookkala mulinjiyo. Nzyeezyi zintu zimwi.
BWEENDELEZI BUBOTU
“Mpoonya [Jesu] wakapegwa bweendelezi, bulemu, alimwi abwami, kuti bantu boonse, zisi zyoonse alimwi abantu bamyaambo yoonse bamubelekele. Bweendelezi bwakwe mbweendelezi bwalyoonse alyoonse oobo ibutakamani, abwalo bwami bwakwe mbwami butakanyonyoonwi.”—DANIELE 7:14.
Ncocaamba: Muyookkomana abuumi bubotu mubweendelezi bwamfwulumende iisumpukide kapati njayoobikka Leza, yalo Mwanaakwe njanooyendelezya kali Mwami.
BUUMI BUBOTU
“Taakwe muntu naba omwe uukkala munyika uuyakwaamba kuti: ‘Ndaciswa.’”—ISAYA 33:24.
Ncocaamba: Kunyina nomuyoociswa naa kulemana; muyoopona kukabe kutamani kakunyina kufwa.
LUUMUNO LWINI-LWINI
“Ulamanizya nkondo munyika yoonse mboizulwa.”—INTEMBAUZYO 46:9.
Ncocaamba: Kunoonyina limbi nkondo alimwi amapenzi aaboola akaambo kanjiyo.
NYIKA IYOOZULA BANTU BALI KABOTU
“Bantu babi tabakabi limbi pe . . . Babombe myoyo bayookona nyika.”—INTEMBAUZYO 37:10, 11.
Ncocaamba: Kunoonyina limbi bantu babi, kunooli buyo bantu ibayandisya kumvwida Leza.
NYIKA YOONSE IYOOBA PARADAISO
“Bayooyaka maanda akukkala mulingawo, bayoosyanga myuunda yamisaansa akulya micelo yanjiyo.”—ISAYA 65:21, 22.
Ncocaamba: Nyika yoonse iyoobota citaambiki. Leza uyakuuzuzikizya mupailo wesu wakuti kuyanda kwakwe kucitwe “ansi aano.”—Matayo 6:10.