Atumulemye Jehova Kwiinda Mubukkale Bwesu—Cibeela 3
1 Ikutegwa tuzumanane katutajisi kabala, tweelede kweeleba micito iiletwaa bweende bwazintu bwa Saatani. Mbwaanga twakalyaaba kuli Jehova akuba zibelesyo zimutembaula, ikuba zilenge zikonzya kusumpula busalali bwakwe alimwi abululami, sena inga aciindi cimwi twalilekela kubaa tumpenda naa tubala tutondezya kuti taakwe notweenda camoyo woonse mubusalali bwa Leza? Atulange-lange mapobwe abwiinga.
2 Lukwatano, Ciko Alimwi Azilengwa Zyicitwa Abazyali: Ncilengwa buya kubazyali kuyanda kubona kuti bana babo kabapona buumi buli kabotu. Muzisi zimwi, kuli ciyanza cakuti bazyali beelede kuyandaula musimbi weelela wakuti mwanaabo akwate. Zimwi ziindi ibazyali bayandika kubuzya mwanaabo akumvwa naa ulaazuminizya makani. Kumunakristo, eeci taceelede kuba penzi ikuti bazyali alimwi amwanaabo kabali mukasimpe. Bazyali Banakristo bayanda kuti mwanaabo akwate “muna-Kristo,” aboobo bayooyandawida mwanaabo mukaintu wakukwata mumbungano ya Bunakristo. (1 Kor. 7:39) Ikuti naa mwana musankwa kali mukasimpe, pesi ibazyali bakwe kabatali mukasimpe, balakonzya kuyanda kuti mwanaabo akwate kunze, aboobo eeci inga caleta penzi kumwanaabo. Weelede kubaa makanze akukwata uusyoma, ulyaabide alimwi uubbapatizidwe. Weelede kubapandulwida bazyali bakwe kujatikizya cilongwe ncajisi lino a Jehova Leza alimwi akuti uyookwata buyo uusyoma, ulyaabide alimwi uubbapatizidwe. Lino atubandike makani aaciko.
3 Makani azintu zipegwa kubazyali banabwiinga akalembwa mu Bbaibbele. Nokuba boobo, ŋombe naa mali aaciko aabbadelwa tayelede kwiindilila, noziba zintu nzyobayanda baacisyanyina musimbi mbuli mbobacita mumikowa imwi antela eezyo nzyobayanda basazinyina. Wisi Munakristo ulijisi nguzu nzyaakapegwaa Leza mukulela bana bakwe, aboobo ulijisi nguzu zyakweendelezya makani aabwiinga bwamwanaakwe musimbi. (Ef. 5:1) Tayelede kulekela basazinyina bambi ikuti babweze busilutwe bwamukwasyi wakwe akweendelezya makani aalukwatano lwabana bakwe. Ikuti naa kuli musazinyina iwakagwasilizya mukuyiisya musimbi ooyo alimwi akuti bausyi musimbi bayanda kutondezya kulumba kulugwasyo lwakapegwa kumwanaabo, akuti lino bayanda kucita boobo kwiinda mukwaabana ciko, eeco cili kuli mbabo. Pele eeco taceelede kuba nkakaambo kakwaambila mali manji naa ŋombe zinji zyaciko. Wisi Munakristo aumwi weelede kubona kuti mwanaakwe musimbi ulisimide munzila yakumuuya kwiinda mukukwatwa mukasimpe. (Flp. 1:10) Bazyali basongo bayandaula sikukwata uuyanda Jehova, munkutwe alimwi uupona munzila yakasimpe mubuumi bwakwe bwabuzubaa buzuba. Imukwesu uukkalikene alimwi usimide walo weendelezyegwaa kasimpe ulakonzya kuba mwaalumi mubotu nokuba kuti inga katajisi mali manji naa ŋombe zinji zyaciko.—Amubone cibalo caamba kuti “Ikubandika Makani aa Ciko Ceelede” mu Ngazi Yamulindizi yamu October 1, 1998.
4 Tacaambi kuti balikwetene kale kusikila mane lukwatano lwabo lukalembesegwe akusaina cizuminano boonse bobile mumeso aabakamboni alimwi kakuli umwi ambali uujisi nguzu. Aboobo, taakwe muntu uujisi lwaanguluko lwakoonanaa mukaintu ngwayanda kuyookwata kusikila mane lukwatano lukalembesegwe kwiinda mumulawo. Ikoonanaa mwanakazi uutali mukaintu wako mbwaamu, aboobo muntu uucita ceeci ulibikka mumapenzi aakugwisigwa mumbungano ya Bunakristo. (1 Kor. 6:9, 10) Taakwe bazyali, mwaalumi naa mukaintu uunga wayanda kuti cintu cili boobu cicitike.
5 Bazyali Banakristo kubikkilizyaa bana babo basankwa alimwi abasimbi bayoobikkila maanu kubona bwiinga bwabo mbobutiikabe. Magwalo atukulwaizya kuti: “Kufumbwa zintu nzimucita, nikuba kulya nikuba kunywa niciba cintu cimwi, amuzicite zyoonse cakuti kube bulemu kwa-Leza.” (1 Kor. 10:31) Sena bwiinga buyoopa kuti Jehova atembaulwe alimwi ‘akulemeka lwiisyo lwa Kristo’ naa buyoosampaula Jehova alimwi ambungano ya Bunakristo kubikkilizyaa kutyompya bamwi? Ino mbuti kuti kwaba budakwi alimwi akukolwa abwiinga kubikkilizyaa nyimbo alimwi akuzyana kutaluzi zyalo zitondezya kutalilemeka?—Amubone cibalo caamba kuti “Bwiinga Bwalukkomano Ibupa Bulemu Kuli Jehova” mu Ngazi Yamulindizi yamu May 1, 2000.
6 Bakwatana buyo, banabubili Banakristo beelede kusoleka kapati kweenda mukasimpe kalo kanununa baalumi kuziyanza zitali zyabuleza. Banakristo beni-beni bajisi luyando alimwi alubomba kubasimukobonyina alimwi ikapati kubasazinyina. (Ef. 4:32; Kol. 3:12; 1 Kor. 13:4) Sena tacikazyanyi abube oobu bwa Bunakristo ikuti naa katucitobela ziyanza zikasya mukamwana ikubonanaa bausyi zyala? Ino inga twaba buti alubomba kuli bamwi ikuti katucitobela ziyanza zikasya kubonanaa basazima bamwi, kubandika ambabo, kwiinda afwaafwi ambabo alimwi akutakkala muŋanda yomwe naa kutabelesya nzila yomwe ambabo?
7 Leza uyooluzuminizya lukwatano ikuti boonse bobile mulumi alimwi amukaintu kabasalala. (Heb. 13:4) Ciyoobaubila-ubila banabubili ikusyomana mulukwatano lwabo alimwi amukukomezya bana babo kweendelanaa malailile aa Jehova alimwi akuzumanana boonse bobile kabasyomeka mubukombi busalala kabatajisi kabala kuzwa kunyika. Muyoobaa zilongezyo zinji kuti naa mwazileka ziyanza zitali zyabunakristo izicita buzike.