Ibantu Bakkomenyi Kapati Anyika
1 “Bali acoolwe bantu bajisi Jehova kuba Leza wabo!” (Int. 144:15) Aaya majwi aamba Bakamboni ba Jehova kuti mbabantu bakkomenyi kapati anyika. Taku kumbi kukkomana kukonzya kwiinda ali kooko kujanika mukubelekela Leza mwini-mwini uupona, Jehova. Mbwaanga ngu ‘Leza uukkomenyi,’ abaabo bamukomba balakutondezya kukkomana kwakwe nkwajisi. (1 Tim. 1:11) Ino nimbazu nzi zyabukombi bwesu zitupa kuti katukkomana?
2 Itwaambo Itupa Kuti Katukkomenyi: Jesu wakatusyomezya kuti kukkomana kulajanika kwiinda ‘mukuyandisya zintu zyesu zyakumuuya.’ (Mt. 5:3) Ikwiiya Bbaibbele alimwi akujanika kumiswaangano Yabunakristo lyoonse kulagwasya. Ikwiiya kasimpe ka Jwi lya Leza kwatwaangulula kubukombi bwabo bwakubeja alimwi akukulubizya nkobacita. (Joh. 8:32) Aalo Magwalo atuyiisya nzila mbotu yakupona. (Is. 48:17) Akaambo kaceeci, tulakkomana cakuyanzana abakwesu Banakristoma bakkomenyi.—1 Tes. 2:19, 20; 1 Pet. 2:17.
3 Tulajana lukkomano lunji kwiinda mukuccilila zyeelelo zisumpukide zya Leza, nkaambo tulizyi kuti cilatukwabilila alimwi cipa kuti Jehova akkomane. (Tus. 27:11) Simubweza twaambo wakacibona eeci naakati: “Nokuba kuti zyeelelo zyabo zyoonse zili sumpukide, Bakamboni ba Jehova tababoneki kuba bantu batakkomenyi. Muciindi caboobo, ibana alimwi abapati [ibali akati kabo] balibonya kuba bantu bakkomenyi alimwi bakkalikenyi.” Ino mbuti mbotukonzya kugwasya bantu kuti abalo kabakkomenyi?
4 Amubagwasye Bantu Kuti Bajane Lukkomano: Munyika kunyina lukkomano alimwi bantu bali mumudima caboola kumakani aambuli mbobabubona buumi bwakumpela. Nokuba boobo, tulijisi bulangizi bubotu alimwi tulizyi kuti buzuba bomwe buyo ikuusa ooku kuliko ciyakuba cintu cakale. (Ciy. 21:3, 4) Aboobo, cabusungu tulatola lubazu mumulimo kulangaula babombe myoyo mbotukonzya kwaambila kujatikizya bulangizi alimwi anzyotusyoma kujatikizya Jehova.—Ezk. 9:4.
5 Mucizi umwi mupainiya wakati: “Taku cintu ciinda kubota ikwiinda kugwasya bantu kuti bazyibe Jehova alimwi akasimpe kakwe.” Atusoleke mbuli mbotukonzya kukulwaizya bantu abamwi kuti babe aluyandisisyo lwakubaa ziiyo zya Bbaibbele zyaaŋanda. Ikubelekela Jehova akulyaaba kwesu kugwasya bantu kutegwa bamubelekele abalo, eeci citupa kukkomana kapati.—Inc. 20:35.