Kabbokesi Kamubuzyo

◼ Ino mbuti Munakristo mbwakonzya kucita ikuti tanaajana muntu wakukwatana limwi uumweelede?

Ibanji bajana lukkomano lwini kabali babelesi ba Leza batakwete naa kukwatwa. (Mt. 19:11, 12; 1 Kor. 7:7) Nokuba boobo, aabo bayanda kukwata naa kukwatwa, eeci cababeda cintu cipati kapati mumizeezo yabo. Bamwi buya inga balaambilizya mumuteende kutegwa bajane wakukwatana limwi. Sena eeci cileelede?

Mbwaanga Jehova Ngosikutalisya lukwatano, weelede kuti ulibikkide zyeelelo zyakweebana zyalo zyikonzya kuleta lukkomano. Malailile aa Paulo kubabelesi boonse balyaabide ba Leza ngakuti, beelede kukwatana “kufumbwa buyo kuti lukwato oolo kaluli mu Mwami.”—1 Bako. 7:39, Ci.

Cabusongo, tatweelede kweebana kakunyina bulemu pe. (1 Kor. 15:33; Tus. 10:23) Sena ncamaano kubelesya muntu wakunyika uutajisi luyando kulindiswe alimwi ngotuzyi buya kuti uuyanda buyo mali?

Ikwaambilizya kucitwa mumuteende kulakonzya kutupa kucita cintu citayandiki alimwi akujila mumapenzi aatali kulangilwa. Cilakonzya kupa kuti bamwi bacicite kubikkilizya abana-bana, akutalika kwaamba kuti taku mpotwiindenyi abantu bakunyika eeyi caboola kumakani aakweebana, cakusisikizya cilakonzya kubapa kuti abalo batalike kuyanzana abantu batajisi zyeelelo mbuli nzyobajisi zyakulilemeka, ambweni kubabikka muntenda buya.—Matl. 34:1, 2; Tus. 22:3.

Ikweebana Banakristo bakubona kuti taali makani aakuubya-ubya pe. Lulayo lubotu kumakani ayandika kapati aali boobu, lulakonzya kujanwa kubantu batuyanda ncobeni alimwi ibayanda zintu nzyotuyanda zyakumubili alimwi azyakumuuya, lulakonzya kujanwa mububambe bwambungano ikutali mumuteende pe.—Int.119:9; Is. 32:1, 2; Tit. 2:3.