Amwaabile Bamwi Nzyobabulide
1 Jehova ulacita bubambe kutegwa atwaabile nzyotuyandika munzila yakumuuya kwiinda “[mu]muzike” musyomesi. (Mt. 24:45-47) Bunji bwazipego eezi bulabikkilizya amabbuku, ma Bbaibbele, mabbuku aamamagazini, mavidiyo, makkaseeti aakalekkodwa alimwi ama computer disks akuvwuntauzizya makani aa Bbaibbele. Jehova lyoonse ulaabila zintu zitukkwenyi kakunyina zyeelede kusoogwa. Ulangila kuti twaabilane abantu bamwi akubona kuti boonse bagwasyigwa bweelede.
2 Kuyandika mali manji kutegwa zintu zili boobu zyoonse zibambwe. Mali aaya aabelesyegwa azwa kubunyina bwanyika yoonse. Eeci camasimpe akaambo kakuti kuzwa ciindi mbunga noyakatalika kubelesya bubambe bwakwaabila mabbuku kakunyina muulo, tusyoma buyo azipego zyakusanga buya cakulisungula ikugwasyilizya mulimo ooyu. Kuyungizya waawo, mitabi minji ilabweza zintu eezi kuzwa ku Sosaiti kutegwa bakwesu bakonzye kujana zintu nzyobayandika kubelesya kumiswaangano alimwi amumulimo wamumuunda nokuba kuti tabajisi mali manji aakusanga.
3 Mbotunga Twagwasya: Tulakonzya kutobela kukulwaizya kwa Paulo kujatikizya kwaabila bamwi ‘nzyobabulide.’ (Balo. 12:13, Ci) Iciindi notusanga kumulimo wanyika yoonse, tuli mukwaabana cacigaminina zintu nzyotujisi abakwesu munyika yoonse mbwiizulwa. Kwiinda mukubikkila maano kukaambo aaka, bamwi basala kubikka aambali mali aali mbwaabede aakusanga kumulimo wanyika yoonse mwezi amwezi, mbubwenya mbobacita nobasanga mali aakugwasyilizya kubbadelela ziyandika ku Ŋanda ya Bwami. Balizi kuti mali aaya taabelesyegwi buyo kumulimo wakubamba mabbuku pe, pele alimwi alabelesyegwa akumilimo imbi. Amweezyeezye buyo lugwasyo lutalikomeneni ibunyina bwanyika yoonse mbwiizulwa mbobakonzya kujana ikuti naa banji kabatola lubazu mukwaabila munzila eeyi lyoonse.
4 Kunze lyaboobo, tulakonzya kwaabana zintu abakwesu kwiinda mukutabaa muuya wabu syaacivwulemwangu lyoonse notuyanda kooda zintu eezyo nzyotujisi kale. Ikooda buyo zintu eezyo nzyotuyandika kupa kuti bakwesu mumasena aambi bakonzye kutambula zipego zyakumuuya abalo nzyobayandika kutegwa bayumizyigwe alimwi bacikonzye kutolaambele mulimo wakukambauka makani mabotu kubusena nkobabede munyika.—Heb. 13:16.
5 Tweelede kukabikkila maano kaambo aaka, ikapati notulomba zintu eezyo Sosaiti mpoibelesya mali manji kutegwa zipangwe. Eezi zibikkilizya mavidiyo, ma CD-ROMs, mabbuku mapati akuvwuntauzizya alimwi amabbuku aamamagazini. Muciindi cakooda cintu cimugeme umwi aumwi mumukwasyi, mbuti kuti boonse buyo mumukwasyi kababelesya cintu comwe buyo? Ikuti naa twacesya zintu nzyotubweza, abalo bamwi bayoobaa coolwe cakuzyijana nzizyona zintu zibotu eezyo nzyotujisi.—Flp. 2:4.
6 Mali aayandika kubamba mabbuku aayo ngotumwaya mumuunda alakonzya kubbadelelwa munzila iimwi azyakusanga kumulimo wa Sosaiti wanyika yoonse eezyo nzyotusanga ku Ŋanda ya Bwami alimwi azipegwa abaabo ibajisi luyandisisyo ibatambula mabbuku eesu. Nokuba boobo, imabbuku aayo aawodwa kutegwa swebo lwesu tubelesye, kubikkilizya mabbuku aanyimbo, ma Yearbook, ma Bbaibbele aacivwumbyo citeteete alimwi azimwi-zimwi buyo, tatweelede kulangila bantu batali Bakamboni kuti batubbadelele pe. Babelesi ba Jehova balyaabide mbabeelede kugwasyilizya ikapati mukusanga mali aayandika. Kwiinda mukubikkila maano kukaambo aaka, basikumwaya banji balasola kweezyeezya mbwaakonzya kuulwa mabbuku aaya ikuti naali kubambilwa kusambalwa, mpoonya balasanga bweelede. Mucikozyanyo, Bbaibbele lyacivwumbyo citeteete libikkidwe ngolida mumbali-mbali lilakonzya kuulwa K80,000.00 naa kwiinda waawo, imabbuku aakuvwuntauzizya alakonzya kaali amuulo wa K160,000.00 akwiindaawo, kkalenda yakubwaanda iizekaudwe kabotu ilakonzya kuulwa amuulo uusika ku K20, 000.00, encyclopedia iili mu CD-ROM ilaulwa kutalikila aa K200,000.00 kusikila ku K400,000.00 naa kwiinda waawo, makkaseeti aakuteelela aajisi inyimbo kanjikanji aulwa amuulo uusika ku K80,000.00 alimwi mavidiyo aamwi kanjikanji aulwa amuulo wiinda waawo. Kwaalilwa kusanga mali aayandika kugwasyilizya zintu zyoonse ziyandika kulakonzya kucesya kapati eezyo mbunga nzyoikonzya kuzuzikizya mukutolaambele mulimo wanyika yoonse.
7 Jesu wakaamba kuti basikwiiya bakwe bakasimpe bayoozyibwa kabotu-kabotu aluyando ndobajisi kuli umwi amweenzinyina. (Joh. 13:34, 35) Ibwaabi mbotujisi bwakupa zintu zyakumubili alimwi akwaabana abantu bambi eezyo nzyobabulide, masimpe ninzila mbotu yakusinizya kuti tuli Banakristo beni-beni.