Amuzulile Azintu Nzyomujisi
1 Magwalo atulailila kujanina banamukwasyi nzyobayandika munzila yakumubili. Pele kucita boobu takweelede kuba nembaakani mubuumi bwesu pe. Izintu zyakumuuya nzyezyeelede kuba mubusena bwakusaanguna. (Mt. 6:33; 1 Tim. 5:8) Kucita zintu munzila yeelede, kakunyina akuwida kulubazu lomwe, ncintu ciyumu kapati ‘muziindi eezi zikataazya.’ (2 Tim. 3:1) Ino ncinzi ciyootugwasya kutegwa tucikonzye?
2 Amutobele Ncolyaamba Bbaibbele: Ijwi lya Leza litucenjezya kuti kuyandaula buvwubi kulakonzya kuleta lunyonyooko munzila yakumuuya. (Muk. 5:10; Mt. 13:22; 1 Tim. 6:9, 10) Muciindi cino cikatazya kapati, kulitakata kapati kumilimo yakumubili naa kuyandaula mali kulakonzya kutubikka muntenda nkaambo zintu zyakumuuya tulazyibikka mubusena bwabili mubukkale bwesu zyalo eezi zibikkilizya miswaangano, ciiyo cesu tobeni alimwi akuunka mumulimo wamumuunda. (Lk. 21:34-36) Mukwiimpana, Ibbaibbele litulailila kuti: “Kufwumbwa twanoojisi cakulya acakulivumba, nciconya eco mbubo ncinji.”—1 Tim. 6:7, 8.
3 Eeci tacaambi kuti Banakristo beelede kubaa bukkale bwakulicetaazya acaali. Pele lulayo oolu lulatugwasya kubona zintu nzyotubulide ncobeni munzila yakumubili mbuli cakulya, zyakusama alimwi aŋanda yeelede yakukkala. Ikuti katuzijisi zintu ziyandika mubuumi, tatweelede pe kuzumanana kuyandaula zintu zinji zyamuulo waatala kapati. Iciindi notuyeeya zyakuula cintu naa kutalika mulimo uumbi kunze lyayooyo ngotujisi kale, cili kabotu kulibuzya kuti: ‘Sena eeci ciyandika ncobeni?’ Kucita boobo kuyootugwasya kutobela lulayo lwakasololelwaa muuya lwakuti: “Buumi bwanu butabi bwakuyanda mali, pe, mutabi basyaacivulemwangu.”—Heb. 13:5.
4 Ikuti katusyoma muli Jehova, uyootulongezya. (Tus. 3:5, 6) Nokuba kuti tweelede kubeleka canguzu kutegwa tujane zintu ziyandika buzuba abuzuba, tatuciindizyi pe kubikkila maano kuzintu eezi. Tacikwe makani naa tujisi zintu zisyoonto naa zinji, tusyoma Jehova kuti ulatwaabila zintu nzyotuyandika. (Flp. 4:11-13) Akaambo kakucita boobo, tulakkutila azintu zyatupa Leza kubikkilizya azilongezyo zinji azimwi.
5 Amwiiye Lusyomo Ndobajisi Bamwi: Imuzyali uuli alikke iwakakomezya mwanaakwe musimbi munzila yakasimpe wakazumanana kuubya-ubya bukkale bwakwe. Nokuba kuti mukaintu ooyu wakali kukkala muŋanda mbotu, wakalongela muŋanda nsyoonto kwiinda njaakali kukkala mpoona kuzwawaawo wakalongela mukaanda kaniini. Eeci cakamugwasya kucesya mawoola ngaakali kusowa kumulimo waaŋanda kutegwa kabaa ciindi cinji mumulimo mumuunda. Naakakomena mwaanakwe alimwi akukwatwa, banyina bakaleka mumulimo wabo wakumubili myaka yakuleka kubeleka kaitana kukkwana, nokuba kuti kucita boobo kwakali kuyoocesya mali ngobakeelede kujana. Lino mucizi wesu ooyu uli mumwaka waciloba kali mupainiya waciindi coonse. Alimwi kucita boobo kunyina nikwamujola munsi pe akaambo kakuliimya zintu zyakumubili nkwaakacita kutegwa abikke zintu zya Bwami mubusena butaanzi mubukkale bwakwe.
6 Imwaalu amukaintu wakwe bakabeleka mulimo wabupainiya kwamyaka minji kumwi kabakomezya bana botatwe. Boonse mumukwasyi bakaiya kukkomana azintu nzyobakali kujana ziyandika muciindi cakuyandaula zintu zitayandiki kapati. Imukwesu wakaamba kuti: “Twakali kupona munzila nguuba-uba. Nokuba kuti kuli ziindi notwakali kubaa mapenzi, Jehova lyoonse wali kutwaabila nzyotwakali kuyandika. . . . Ikuti ndalanga mbuli mukwasyi wangu mbouli mukubikka zintu zyakumuuya mubusena bwakusaanguna, ndilimvwa kuti zintu zyoonse zili mukucitwa buyo munzila iiluzi alimwi ndilimvwa kuti ndazwidilila.” Mukaintu wakwe uyungizya kuti: “Nondibona [mulumaangu] kakutauka milimo yakumuuya, ndilimvwa kukkomana kapati.” Bana abalo balikkomene kuti bazyali babo bakasala kubelekela Jehova mumulimo waciindi coonse.
7 Kulibaabo boonse ibasala kukomba Leza muciindi cakuyandaula zintu zyakumubili, Ibbaibbele libasyomezya zilongezyo zyabuumi zitalikomeneni lino alimwi akumbele.—1 Tim. 4:8.