Ibuvwubi Bulakonzya Kuba Bwanu!
1. Ino nkaambo nzi ncomweelede kulanga-langa naa inga mwaubeleka mulimo wabupainiya bwaciindi coonse?
1 Sena mubuumi bwanu muyandaula cintu cikonzya kumukkomanisya kapati antela kumukkazyika moyo? Sena cilamukondelezya akumukkazyika moyo ikugwasya bantu? Sena mulalombozya kutola ciindi cinji mulimo wanu ngomubelekela Jehova? Ikuti naa bwiinguzi bwanu mbwakuti inzya kumibuzyo eeyi, nkokuti inga mwacikonzya kubeleka mulimo wabupainiya bwaciindi coonse. Masimpe, mikuli yamukwasyi alimwi amikuli imwi yamu Magwalo kubikkilizya abuzumi akulezya kumwi ziyandika kulangwa-langwa.
2. Amwaambe lubono lumwi lwakumuuya ndobajana bapainiya baciindi coonse.
2 Makani aakalemba Solomoni kwiinda mukusololelwa amuuya alakuswaanganya kulongezyegwa a Jehova alubono lwakumubili. (Tus. 10:22) Mazuba aano, kulongezyegwa a Jehova kusaanguna kuletela buvwubi bwakumuuya. Buvwubi buli boobu mmaalamaala akati kabapainiya baciindi coonse. Mucikozyanyo, balajana lukkomano lutaambiki kwiinda mukupa nobagwasya bantu kwiinda ‘mukubelesya ciindi’ ncobali kulangilwa kucita zyintu zibageme. (Kol. 4:5; Inc. 20:35) Milimo njobacita caluyando Jehova ulaibona alimwi ulabalumba. Oolu “lubono [iluli] kujulu” kunyina noluyoomana bulemu pe. (Mt. 6:20; Heb. 6:10) Kunze lyaboobo, bapainiya nobazumanana kuba ‘aliso lyabuuya’ akusyoma Jehova kuti abape nzyobayandika, cilongwe ncobajisi anguwe cilayuma kapati.—Mt. 6:22, 25, 32; Heb. 13:5, 6.
3. Ino ndwiindano nzi luliko akati kakuyandisya lubono lwakumuuya alimwi akuyandisya lubono lwakumubili?
3 Ikuyandisya kujana lubono lwakumubili kunjizya “muzisusi zibi zinji zyabufubafuba.” (1 Tim. 6:9, 10; Jak. 5:1-3) Kulongezyegwa a Jehova kunyina nokuletela zili boobu pe. Kubelesya ciindi cili mbocibede mumulimo kulabagwasya bapainiya baciindi coonse kuzumanana kubikkila buyo maano kuzyintu ziyandika kapati. (Flp 1:10) Mukwesu umwi wakauleka mulimo wakwe wabusyaabupampu mumincini walo wakali kumumanina ciindi ikutegwa atalike mulimo wabupainiya. Wakaamba kuti: “Mulimo wakumubili wakali kundipa kukatala kapati. Pele mulimo wabupainiya tuundipi kukatala boobu pe. Mazuba aano ndilakonzya kugwasya bantu alimwi akubayiisya kasimpe. Eeci cilakkazyika moyo alimwi cilakondelezya kugwasya bantu kuzumina kasimpe.”
4. Ino mbuti bapainiya baciindi coonse mbobalongezyegwa ciindi nobagwasya bantu?
4 Zilongezyo Kubantu: Mazuba aano, aumwi nakkede ulasikilwa “ziindi zikataazya.” (2 Tim. 3:1) Nyika yoonse bantu babulila misozi ibulangizi. Basikwaambilizya ba Bwami balakkomana nobalibonena kuti bantu bakatyompedwe balakonzya kwiiya alimwi akuzumina makani mabotu. Elo kaka bapainiya baciindi coonse balakkomana kapati, balo babelesya mawoola aayinda ku 800 amwaka mumulimo ooyu wakufwutula maumi aabantu!—1 Tim. 4:16.
5, 6. Ino ncinzi cikonzya kumugwasya kuba mupainiya waciindi coonse?
5 Sena kuli nomukkala aansi kuyeeya naa inga mwacita bupainiya bwaciindi coonse? Kulakonzya kuyandika ‘kujatisya loko ciindi’ kwiinda mukuziyumbila ambali zyintu zitayandiki kapati. (Ef. 5:15, 16) Ibanji mbobacita oobo, aboobo baubya-ubya bukkale bwabo, calo capa kuti cikonzyeke kucesya ciindi ncobabeleka mulimo wakumubili ikutegwa babelesye ciindi cinji kumilimo ya Bwami. Sena inga mwalibambila kutegwa mube limwi?
6 Amulombe busongo kuli Jehova kutegwa mukonzye kubamba mulongo uukonzya kumugwasya. (Jak. 1:5) Ino nzilongezyo nzi nzyomukonzya kulangila? Lubono lunji lwakumuuya luyooba lwanu! Alimwi Jehova uyoomupa azyintu zyakumubili nzyomuyandika. (Mt. 6:33) Aabo bamusola Jehova munzila iili boobu bayoojana “coolwe cakufwasuka loko.”—Malk. 3:10.