Ino Ncinzi Ncomubikka Mubusena Butaanzi?
1 Zikombelo zinji zibikkila kapati maano mukucita milimo yakugwasya, mbuli wakuyaka antela kusanga mali kuzikolo naa kuzibbadela. Pele Bakamboni ba Jehova nokuba kuti ‘tabalubide kucita kabotu alimwi akugwasyanya,’ babikkide maano kapati kugwasya bantu kumuuya.—Heb. 13:16.
2 Citondezyo Camumwaanda Wamyaka Wakusaanguna: Jesu wakacita milimo minji mibotu naakali anyika, pele mulimo wakwe mupati wakali wakupa bumboni kukasimpe. (Lk. 4:43; Joh. 18:37; Inc. 10:38) Wakalailila basikumutobela kuti, “kamuya mukabaiisye bantu bamisyobo yoonse.” (Mt. 28:19, 20) Alimwi wakaamba kuti, aabo basyoma mulinguwe ooyu mulimo ngwaakatalisya bayoowucita mumasena manji kapati. (Joh. 14:12) Jesu wakabikkila maano kapati kumulimo wabukambausi akaambo kakuti ugwasya bantu kwiiya nzila yalufwutuko.—Joh. 17:3.
3 Imwaapostolo Paulo, imulimo wakukambauka wakaubona kuti mmulimo ‘ngwatakonzyi kukaka,’ nkokuti icintu ciyandika ncaatali kukonzya kuyabaizya buyo. (1 Kor. 9:16, 17) Wakalilisungude kulyaaba munzila yoonse, kuliyumya mumasukusyo aali oonse antela nokuba kwiinda mumapenzi aali woonse kutegwa azuzikizye mulimo. (Inc. 20:22-24) Imwaapostolo Petro alimwi abeenzinyina abalo bakatondezya muuya nguwenya ooyu. Noliba leelyo nobakabikkwa muntolongo alimwi akuumwa kapati, “tabakalekede kwiisya akukambauka muntempele amumaanda kuti Jesu ngo-Kristo.”—Inc. 5:40-42.
4 Ino mbuti swebo? Sena tulabikkila maano kapati kumulimo wa Bwami wakukambauka makani mabotu alimwi akugwasya bantu kuba basikwiiya? Mbubwenya mbuli Jesu, sena tulabikkila maano ncobeni kuli baabo ‘ibakatede akumwaika mbuli mbelele zitakwe mweembezi’? (Mt. 9:36) Zintu zili mukucitika mazubaano munyika alimwi abusinsimi bwamu Bbaibbele zilatondezya kabotu-kabotu kuti mamanino aabweende bwazintu oobu bubyaabi alaafwaafwi! Ikuyeeya lyoonse mbouyandika mulimo wabukambausi kuyootukulwaizya kuzumanana kukambauka cabusungu.
5 Amubulange-Lange Bukkale Bwanu: Mbwaanga kanjikanji bukkale bulakonzya kucinca, cilayandika kapati kuti ciindi aciindi katulanga-langa bukkale bwesu akubona naa kuli mbotukonzya kucinca kutegwa tujane ciindi cinji cakutola lubazu mumulimo wabukambausi. Mucizyi umwi wakali mupainiya waciindi coonse mumyaka yakuma 1950, 1960 alimwi a 1970 pele wakazyoocileka akaambo kakuciswa-ciswa. Nokuba boobo, mukuya kwaciindi buumi bwakwe bwakaba kabotu. Mumyaka misyoonto buyo yainda, wakabulanga-langa bukkale bwakwe akubona kuti inga wacikonzya kucita bupainiya alimwi. Elo kaka wakakkomana kujanika ku Cikolo Camulimo Cabapainiya kajisi myaka iili 90! Ino mbuti nywebo? Sena mulaafwaafwi kucileka mulimo antela kumanizya cikolo? Ikuti naa bukkale bwanu bwacinca, sena muyoocikonzya kucita bupainiya?
6 Iciindi Jesu naakabona kuti Marta “wakalikataazya akubambisya cakulya,” wakamwaambila caluzyalo kuti wakali kuyoojana zilongezyo zitalivwulili ikuti naa waubya-ubya zintu. (Lk. 10:40-42) Sena mulakonzya kuubya-ubya bukkale bwanu? Sena ncintu ciyandika kapati kuti boonse mulumi amukaintu kababeleka? Ikuti naa kwaba kucinca, sena inga kabajana zintu ziyandika mubuumi ikuti kakuli muntu buyo omwe uubeleka? Ibanji bagwasigwa kumuuya kwiinda mukucinca kutegwa kabajana ciindi cinji cakutola lubazu mumulimo.
7 Toonse atutobele cikozyanyo ca Jesu alimwi abaapostolo bakwe. Cakutadooneka, tuyoojana zilongezyo zya Jehova akaambo kamilimo yesu njotucita cabusungu kutegwa tubeleke kusikila aagolela nguzu zyesu mumulimo ooyu uuyandika kapati wakukambauka makani mabotu aa Bwami.—Lk. 9:57-62.