Icintu Ciyandika Kapati Kulindiswe
1. Ino mbuti Jesu mbwaakatondezya kuti mulimo wakukambauka wakali kuyandika kapati kulinguwe?
1 Imulimo wakukambauka wakali kuyandika kapati kuli Jesu. Wakabeleka canguzu, wakeenda misinzo minji mucisi coonse ca Palestine, wakabakambaukila bantu banji kweelana ambwaakali kukonzya. Wakali kupona buumi ibwakali kupa kuti akonzye kuba aciindi cinji cakubikkila maano kumulimo wakukambauka. (Mt. 8:20) Bantu nibakasola kumukkazyika kutegwa aponye bantu ibakali kuciswa, wakati: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.”—Lk. 4:43.
2. Ino nkaambo nzi mulimo wakukambauka ncowakali kuyandika kapati kuli Jesu?
2 Ino nkaambo nzi mulimo wakukambauka ncowakali kuyandika kapati kuli Jesu? Akaambo kakuti wakali kuyanda kusalazya zyina lya Jehova. (Mt. 6:9) Wakali kumuyanda Usyi wakujulu alimwi wakali kuyanda kuzuzikizya makanze aakwe akutobela milawo yakwe yoonse. (Joh. 14:31) Kuyungizya waawo, wakali kubabikkila maano kapati bantu alimwi wakali kuyanda kubagwasya.—Mt. 9:36, 37.
3. Ino inga twatondezya buti kuti mulimo wakukambauka ncecintu ciyandika kapati kulindiswe?
3 Amumwiiye Jesu: Ikubikka mulimo kuba cintu ciyandika kapati kulindiswe mbuli mbwaakacita Jesu cilakonzya kutukatazya akaambo kakuti munyika kuli zyintu zinji zitumanina ciindi alimwi zikonzya kutunyonganya. (Mt. 24:37-39; Lk. 21:34) Aboobo tweelede kuzizyiba zyintu ziyandika kapati, akubikka ciindi cakulibambila akutola lubazu mumulimo wakukambauka lyoonse. (Flp. 1:10) Tulazumanana kupona buumi bukonzya kutupa kuti katutabelesyi zyintu zyamunyika cakumaninina.—1 Kor. 7:31.
4. Ino nkaambo nzi lino ncotweelede kuzumanana kucita zyintu ziyandika kapati?
4 Kuti naa ciindi caceya, imuntu musongo usaanguna kucita zyintu ziyandika kapati. Mucikozyanyo, ikuti naa wamvwa kuti kuli guwo liboola likonzya kuIeta ntenda, ulabikkila maano kukulibambila kukwabilila mukwasyi wakwe akucenjezya basimukobonyina. Izyintu zitayandiki kapati kucitwa inga zyalindila. Kwasyaala buyo ciindi cisyoonto kuti Amagedoni isike. (Zef. 1:14-16; 1 Kor. 7:29) Ikutegwa tulifwutule antoomwe abaabo batuswiilila, tweeIede kulilingula akubikkila maano kukuyiisya kwesu, notuli mumulimo wakukambauka amumbungano. (1 Tim. 4:16) Inzya, lufwutuko lwesu luyeeme akubikka mulimo wakukambauka kumpela.