Lugwalo Luzwa Kukabunga Keendelezya
Nomuyandwa Bakwesu alimwi Abacizyi:
Tulikkomenyi kumulembela lugwalo oolu. Twamulumba kapati akaambo kaluyando alimwi akulyaaba kwanu nkomwazumanana kutondezya. Mu Yearbook yamwaka uuno, muyoobona milimo minji mibotu yakacitwa mumwaka wamulimo wamana. Mwaka wamulimo wamana, wakali mwaka aumbi motwakabeleka mawoola aayinda ku 1,000,000,000 mumulimo wakukambauka akuyiisya alimwi akubakulwaizya bantu cakubagama buya kuti babe acilongwe cini-cini a Jehova. Sena tacili cintu cikkomanisya kuba babelesinyina a Leza wesu uulemekwa alimwi Tateesu wakujulu?—1 Kor. 3:9.
Notulanga mulimo ngotujisi, tulaa lusyomo kuti muyoozumanana kwiiya busungu alimwi alusyomo lwababelesi ba Leza, mbubwenya mbokwaambidwe mu Bbaibbele. Mucikozyanyo, imwaapostolo Paulo wakalilisungude ikubeleka canguzu kuti atole ambele makani aa Bwami bwa Leza. Cakutadooneka, wakali mwaka wamamanino kukkala mu Efeso naakalemba lugwalo lwakwe lwakusaanguna kumbungano ya Banakristo mu Korinto. Kabandika makanze ngaakajisi, wakalemba kuti: “Ndakala omuno mu-Efeso kusikila kuciindi ca-Pentekoste, nkaambo ndajalwidwa mulyango mupati wakucita milimo mibotu, alimwi nkubali banji bakazya.”—1 Kor. 16:8, 9.
Paulo wakakanzide kuunka ku Makedoniya alimwi aku Korinto. Pele, wakabona kuti wakalijisi coolwe cakucita milimo iiyandika kapati kwiinda mukukkala mu Efeso kwaciindi cili mbocibede. Paulo wakali muntu uunyoneka; wakabona bukkale bubotu mwaakali kukonzya kutola ambele makani aa Bwami mumonya mu Efeso, aboobo wakaucinca mulongo wakwe. Imulyango mupati wakucita milimo mibotu wakajalulwa kulinguwe, alimwi Paulo wakalilibambilide kucibelesya kabotu ciindi eeci kutegwa abeleke milimo eeyi.
Ikucita boobo wakali mulimo mupati uujatikizya kukambauka makani mabotu alimwi akuyumya-yumya mbungano mu Efeso. Kumbele, Paulo wakalemba boobu kubaalu bamumbungano yakali mumunzi ooyo kuti: “Nsikamusisilide akaniini kumwaambila aamweelede, ndakamwiisya mukati kabantu akunjilauka mumaanda. Ndakali kulungulwida ba-Juda aba-Helene kuti basandukile kuli-Leza, basyome Mwami wesu Jesu Kristo.”—Inc. 20:20, 21.
Mbubwenya buyo, ibunji bwanu nobakwesu abacizyi muli mukubeleka muzibeela zyamulimo zijalukide kulindinywe. Mumwaka wamulimo wainda, mweelwe waakati-kati wabasikumwaya ibali 798,938 bakacikonzya kucinca bukkale bwabo kutegwa bakonzye kutola lubazu mucibeela cimwi camulimo wabupainiya. Nobamwi muli mumasena aali kule kutegwa mubeleke kamuli bamisyinali. Muli mukumwaya makani mabotu cabusungu alimwi akuyumya-yumya mbungano. Ibamwi bakaiya mwaambo aumbi kutegwa bagwasye bantu bakanana myaambo yakumasi aambi ibakkala kubusena nkomubede. Alimwi bambi bakacita bubambe bweelede kutegwa bacikonzye kubeleka mucilawo citabelekwi-belekwi naa kuyoobelekela kubusena bubulide. Bamwi mane bajana kuti mulyango mupati wakucita milimo ulijalukide kucikolo, kumulimo nkobabeleka, naa mubukkale bumwi mobakambaukila kabotu bantu, mbuli kubelesya luwaile. Zyakuluula munyika yoonse zitondezya kuti bantu ba Leza, bana alimwi abapati, balisungweede kuyandaula alimwi akujana ciindi cakwaambila bantu luzibo lwakasimpe kufwumbwa kubusena nkobabede.
Amusyome kuti Jehova ulibwene alimwi ulikkomene kapati amulimo ngomubeleka canguzu. Ibbaibbele lyaamba kuti: “Leza tali sikampenda, takonzy[i] kuluba milimo yanu akuyanda nkomwatondezya nkaambo kezina lyakwe.” (Heb. 6:10) Amuzumanane kubikkila maano kukucibelesya kabotu ciindi ncomwajana kutegwa mutole ambele bukombi bwakasimpe. Bamwi akati kanu balakonzya kuyungizya ciindi cakubeleka mumulimo. Toonse tulakonzya kusolekesya kuubeleka kabotu mulimo.
Kunyina notubeleka mulimo wesu wabukambausi kakunyina kukazyigwa pe. Amuyeeye kuti Paulo naakaamba zyamulyango mupati wamulimo wakajaludwe kulinguwe, wakalemba kuti: “Nkubali banji bakazya.” Bantu bakali kukazya Paulo bakali kubikkilizya aba Juda aba Helene. Bamwi bakali kumukazya cigaminina kakuli bambi bakali kumulwana buya kwiinda mukubelesya nzila zyabucenjezu.—Inc. 19:24-28; 20:18, 19.
Andiswe tulasikilwa bukkale bukozyenye mazubaano. Mbotuyaabuswena kulunyonyooko lwabweende bwazintu oobu, tulakulangila kukazyigwa kuti kuyoozumanana. Saatani uli “abukali bupati,” alimwi bukali oobu bugamikidwe kapati kuli baabo ibabelekela Leza. (Ciy. 12:12) Mutalubi pe kuti Saatani ngo “Mwami wenyika.” Jesu wakabaambila basikwiiya bakwe kuti: “Nomwali bayeeyi inyika, inyika neyali kuyanda bayo, kwalo nkaambo tamuli bayeeyi nyika, pele ndakamusala kuzwa kunyika, nkakaambo ako inyika nciimusulide.”—Joh. 14:30; 15:19.
Tulikanzide kuti tutazumizyi muntu kutola ansi lusyomo lwesu naa kutulengaanya mumulimo wesu wabukambausi. Tulizyi kuti bantu batulwana cigaminina alimwi abaabo bacita boobo cabucenjezu bayoozumanana. Nokuba boobo, tuyoozumanana kukambauka makani mabotu aa Bwami, katusyomede kuti Jesu uyoonyonyoona Saatani amakamu-makamu aakwe muciindi Jehova ncabikkide. Basikukazya kunyina nobakazwidilila mukumukazya mwaapostolo Paulo; alimwi tiibacikonzya pe kulesya babelesi ba Jehova mazubaano kucita mulimo wabo. Nokuba kuti Saatani ulinyemede kapati alimwi ayalo nyika ilitusulide, muuya wa Jehova uli mukubeleka canguzu kubantu Bakwe. Elo kaka cilakondelezya kapati kuzyiba kuti mweelwe mupya waatala wabaabo bakambauka makani mabotu wakasika ku 6,304,645!
Tulamupailila kuti muzumanane kucibelesya kabotu ciindi kuti mutole ambele makani aa Bwami butaliboteli bwa Jehova. Amusyome kuti tulimubikkilide maano lwanu kumugama mbotubeleka antoomwe “calukamantano” mumulimo wa Leza Mupatikampatila, Jehova.—Zef. 3:9, NW.
Tobakwenu,
Kabunga Keendelezya ka Bakamboni ba Jehova