Mulongo Wamiswaangano Yamulimo

Nsondo Iitalika mu October 13

Lwiimbo 4

10 min: Zyakwaambilizya zyambungano azyakwaambilizya zisalidwe mu Mulimo Wesu Wabwami. Amubakulwaizye boonse kuti bakatwiinduluke twaambo ntobakalemba kumuswaangano. Ikwiinda mukubelesya mibuzyo ijanika apeeji 1, amulibambile makani amubandi abaswiilizi kujatikizya Pulogilamu ya Muswaangano wakuti, “Amumulemeke Leza” iiya kucitwa nsondo iiboola mu Muswaangano Wamulimo. Kwiinda mukubelesya nzila zili apeeji 8, amucite zitondezyo zyobile zigwasya izitondezya mboinga yaabilwa Ngazi Yamulindizi yamu November 1 mucilawo cambungano. Amubelesye nzila zyakusaanguna zyobile. Mucitondezyo comwe, amutondezye mbomukonzya kujokelela kumuntu ngomutolela mamagazini lyoonse. Amumutondezye zili mukabbokesi kakuti “Mukumwaya Kutobela” kutegwa mukatalikile mpawo mwaakumuswaya ciindi ciboola.—Amubone Mulimo Wesu Wabwami wamu October 1998, p. 8 munc. 7-8.

20 min: “Amubelekele Jehova Cakukondwa.”a (Boonse beelede kuti kabajisi pepa lyamukati lya Mulimo Wesu Wabwami wa January 2002 ciindi makani aaya naabandikwa.) Mwamana kubandika muncali wa 4, amwaambe kuti, mu November tuna kumwaya broshuwa ya Ncayanda abbuku lya Luzibo. Mubufwaafwi amwiinduluke nzila yomwe yakabelesyegwa mupepa lyamukati lya Mulimo Wesu Wabwami wa January 2002. Mpoonya amwaambe mbucakatondezyegwa. Amubakulwaizye boonse kuti kabalibambila kabotu nobaya mumuunda.

15 min: Kweendelezya Ziiyo zya Bbaibbele Kuletela Bulumbu. Makani amubandi abaswiilizi. Amwaambe zyakuluula zisyoonto zilembedwe mumabbuku eesu zyakuba aziiyo zya Bbaibbele iziyaambele. (w99-CG 1/1 p. 4; yb98 pp. 55-60) Amubalombe baswiilizi kuti baambe ncotwiiya kukuluula ooku alimwi abulumbu mbotujana notweendelezya ziiyo zya Bbaibbele.

Lwiimbo 9 amupailo wakujala.

Nsondo Iitalika mu October 20

Lwiimbo 13

5 min: Zyakwaambilizya zyambungano.

40 min: “Miswaangano Yacooko aya Masi Itukulwaizya Kumulemeka Leza!” Apegwe amwaalu. Mwamana kwaamba majwi aantalisyo aatasiki kuminiti yomwe, amubandike abaswiilizi pulogilamu yakali kumuswaangano kwiinda mukubelesya mibuzyo iili mucibalo. Ikutegwa mibuzyo yoonse ibuzyigwe akwiingulwa kabotu, imwi mibuzyo mulakonzya kuzumizya buyo muntu omwe kwiingula. Taali oonse magwalo aayelede kubalwa muciindi cipedwe; abikkilwa buyo kuti cuube-ube kujana bwiinguzi. Bwiinguzi inga bwagwasya kuti kabutondezya bulumbu mbotunga twajana kuti twazitobela nzyotwiiya.

Lwiimbo 11 amupailo wakujala.

Nsondo Iitalika mu October 27

Lwiimbo 23

12 min: Zyakwaambilizya zyambungano. Lipooti yamaakkaunti. Amubayeekezye basikumwaya kuti bape malipooti aabo aamumulimo wamumuunda aamu October. Amubakulwaizye boonse ikutwiinduluka twaambo ntobakalemba mumwaka wamulimo wainda mupulogilamu yamuswaangano waalubazu kutegwa balibambile Muswaangano Wamulimo wansondo iiboola. Kwiinda mukubelesya nzila zili apeeji 8, amucite zitondezyo zyobile zigwasya izitondezya mboinga yaabilwa Ngazi Yamulindizi yamu November 1. Amubelesye nzila zyamamanino zyobile. Mucitondezyo cimwi acimwi, amutondezye nzila ziindenyi-indenyi mbuli mbomukonzya kuzumanana kubandika asikutyompya mubandi waamba kuti “Tandiyandi.”—Amubone bbuku lya Kukambitsirana apeeji 16.

20 min: Amubelesye Ipanga lya Kumuuya. (Ef. 6:17) Mubandi abaswiilizi uzwa mubbuku lya Cikolo Camulimo amapeeji 143-4. Amubalombe baswiilizi kuti baingule mibuzyo eeyi: (1) Nkaambo nzi ncotubelesyela Bbaibbele notwiingula mibuzyo? (2) Ino zina lyakuti Bakamboni ba Jehova litondezya nzi kujatikizya ndiswe? (3) Ino Jesu wakapa cikozyanyo nzi, alimwi mbuti mbotukonzya kumwiiya? (4) Mucilawo ncomubelekela, ninzila nzi zikonzya kubeleka kabotu ikutalisya twaambo twamu Bbaibbele? (5) Ino nkaambo nzi ncokuyandika kubala buya mu Bbaibbele nokwayandika? (6) Ino mbuti baalu mbobakonzya kukulwaizya bamwi kulibelesya kabotu Bbaibbele? Amube acitondezyo calibambilwa kabotu icizwa apeeji 144 citondezya mbuli sikumwaya uucibwene mbwabelesya lugwalo mukwiingula mubuzyo. Amubakulwaizye boonse kuti ibe mbaakani yabo ikubelesya Bbaibbele ciindi nobacita bumboni.

13 min: Zyakuluula zyakacitika nkomukkala. Amubalombe baswiilizi baambe zintu zyakabakkomanisya akaambo kakujanika kumuswaangano wacooko naa nibakali kucita bukambausi bwamukwiizya kumulimo, kucikolo naa kuli koonse nkobakabede.

Lwiimbo 20 amupailo wakujala.

Nsondo Iitalika mu November 3

Lwiimbo 6

5 min: Zyakwaambilizya zyambungano.

15 min: Amubandike lipooti yacisi yamulimo wamumuunda ya June. Amwiiyezyanisye alipooti yamulimo wamumuunda iili mu Mulimo Wesu Wabwami wa October 2002. Amulumbaizye mwakacitwa kabotu alimwi akukulwaizya oomo muciyandika kuyaambele. Amwaambe mbuli kutelaika aalugwalo lwamwaka alimwi amakani ngolubandika mbokutugwasya kuba acilongwe a Leza eelyo notujatikizyidwe lyoonse mumilimo ya Bunakristo mbuli kukambauka makani mabotu alimwi akujanika kumiswaangano. (Jak. 4:8) Amutondezye kuyaambele kunga kwacitika nkomuzwa. Amwaambe mweelwe wabasikumwaya, wabasikumwaya bapya (kuti kabaliko), wabapainiya, bapainiya bagwasilizya alimwi amweelwe wabaabo bakabbapatizyigwa kumuswaangano wacooko.

25 min: Amube Bavwubi Mukumana Milimo Mibotu. (1 Tim. 6:18) Kwiinda mukubelesya mibuzyo iibikkidwe, imwaalu asololele mubandi ooyu abaswiilizi uujatikizya makani aakali kumuswaangano waalubazu wamumwaka wamulimo wainda. Amubabuzye bajanika kuti baambe mbobasoleka kucita nzibakaiya. (Mbomuyanda kuti bakaingule, inga mwabaambilida limwi.) Amwaambe zyakali mupulogilamu mucibeela ca: (1) “Milimo Mibotu Iileta Mpindu Zitalivwulili.” (Muk. 2:11) Ino nkaambo nzi babelesi ba Leza ncobacitila milimo mibotu yaambwa mu Jwi lya Leza kwiinda kucita milimo yanyika eeyi yabuyo? (2) “Amube Bavwubi Kuli Leza.” (Mt. 6:20) Mbuti bamwi ‘mbubaliyobweda lubono kujulu,’ alimwi nimpindu nzi njibajana? (3) “Amuyaambele Mumulimo Wanu Kwiinda Mukuba a Ciiyo ca Bbaibbele.” (om p. 91) Ino ncinzi cinga catugwasya ikutalisya akweendelezya ciiyo ca Bbaibbele? (4) “Milimo Mibotu Muciindi Cino Cakutebula.” (Mt. 13:37-39) Ino mmilimo nzi mibotu njobakacita Banakristo bakusaanguna, alimwi ino mbuti mulimo wa Bwami mbuwaya ambele mazuba aano? (5) “Milimo Yanu Mibotu Aimutembaule Jehova.” (Mt. 5:14-16) Mbuti bamwi mbubacita kuti ‘mumuni wabo umunike’? (6) “Ikulumbaizya Bakubusi Mumilimo Yabo Mibotu Yakutembaula Jehova.” (Int. 148:12, 13) Ino Banakristo bakubusi bali mubbazu lyesu bamutembaula buti Jehova? (7) “Amuzumanane Kucita Milimo Mibotu Akutebula Zilongezyo zya Jehova.” (Tus. 10:22) Notujata bubi mukucita milimo mibotu, mbulumbu nzi mbotujana tobeni, mumukwasyi, mumbungano alimwi amumbunga yanyika yoonse?

Lwiimbo 5 amupailo wakujala.

Bupanduluzi buyungizidwe