“Ikunungilila Ntambo Zyesu
1 Elo kaka cilakkomanisya ikubona ikuzuzikizyigwa kwabusinsimi bwamu Bbaibbele kumazuba aano aakumamanino! Ibusinsimi bumwi mu Zambia mbutwabona kabuzuzikizigwa mboobo mbwaakalemba Isaya naakasinsima mbuli “kakamu kaniini [mbo]kayooba cuulu, abantu bace [mbo]bayooba mukowa mupati.” (Is. 60:22) Mu 1989 eelyo mulimo wamayake aamutabi wesu uuliko lino nowakatalika, kwakali basikumwaya batandila ku 71,000 alimwi ambungano zili 1,755 mucisi. Sunu kuli basikumwaya batandila ku 120,000, afwaafwi kuti mweelwe wiinde ziindi zyobile kumweelwe wamu 1989, alimwi kuli mbungano ziinda ku 2,000. Elo kaka kulagambya kuyungizyigwa ooku!
2 Ikuzwa ciindi imayake aamutabi aaliko lino naakamanizyigwa alimwi akwaabwa mu 1993, iziyandika mumuunda wesu zyavwula kapati. Mucikozyanyo, Kabunga Keendelezya kakatalisya tukamu twabasanduluzi ba Chitonga, Cilubale alimwi a Cikaonde ikutegwa bagwasyigwe aabo bayanda kasimpe mumilaka eeyi. Kulangilwa kuti kakamu kabasanduluzi ka Cilunda akalo kayookkalikila kumbele. Ikuyaka Maanda aa Bwami mmulimo uumwi weendelezyegwa a Leza iwayaambele kuzwa mu 1993. Ikuyungizya waawo, ikuyandika kwamabbuku kwayungizyigwa kapati kwiinda kwakaliko mumuunda wesu mumyaka iili kkumi yainda.
3 Ikutegwa zijanike ziyandika akaambo kakukomena kwamuunda wesu, imayake aamutabi aaliko kale ayandika kuyungizyigwa. Kweelana abusanduluzi bwa Bbaibbele lyamu 1996, ibbuku lya Izaya 54:2 litupa lulayo lwaluzyalo lwakuti: “Kwakwabula busena bwatente lyako, landabula zisitilizyo zyatente lyako utalekezyi, nungilila ntambo zyako, kankaminisya nembe zyako.” Mulakkomana ikumvwa kuti imulimo wakuyungizya mayake eesu aamutabi wakatalika mu May 2002.
4 Imulimo Uuya Ambele: Ikutegwa kube busena bwatubunga twabasanduluzi tuyaabuvwula, icibeela cabili icaganda lyakusimbila cakacincigwa kuti cibe busena bwamaofesi. Imasena amwi aakubambila alimwi akubambuluda zintu akagusyigwa ikutegwa kube busena bwamaofesi mapya mucibeela cabili. Ibusena oobu bwakacimbaulwa kwiinda mukubelesya ncelwa zyasamende alimwi akusyingululwa asamende. Nokuba kuti eeci citola ciindi alimwi akubeleka canguzu, eeyi ninzila iibelesya zintu alimwi abantu bajisi luzyibo bamucisi.
5 Imaanda aakoona aakkwene aabasikulisungula kumutabi alayandika. Aboobo, iŋanda yamujulu iijisi zibeela zyamaanda zyone ili mukuyakwa. Iŋanda eeyi yayungizyigwa iijisi maanda aali 32 tiikaceyi mukuvwula kulangilwa kwamukwasyi wa Beteli mumyaka iili kkumi kumbele. Mukwiindana amayake aaliko alo akayakwa kwiinda munzila “yakwaanzika”— oomo zibeela zyabwaanda zipangidwe kale mozibikkwa mpozyeelede—iŋanda yakukkala mpya mbuyake bujisi bwaanda buyumu bwakayasyigwa ancelwa zyasamende alimwi akusyingululwa asamende.
6 Aamwi mayake ayoobambululwa mwakujikila, mulidwa, mubambilwa-bambilwa myootokala alimwi amuyobodwa zimbayambaya. Ikubambululwa kwamujikilwa kuyoojatikizya kucinca zibelesyo zyakujikila alimwi azyakubambila zyakulya alimwi akucinca busena bubelekelwa lino. Iŋanda mpati yakuyoboda ikubikkilizya amwakuyoboda zyakulya mutontola muyoobambwa. Mwakuyoboda zintu amumbi kubikkilizya amwakuyoboda zyakulya mutontola muyoobambwa. Eeci ciyoopa kuti iziyandika zyamukwasyi wa Beteli zijanike alimwi ciyootugwasya kuyobola zyakulya ciindi nozyipenzyede.
7 Imayake mapya aambi aaku Beteli ayoobikkilizya nzila yakwiinda iijisi ciluli akati kaŋanda yakukkala impya alimwi ayakujikila amulidwa, iŋanda mpya iivwumbidwe yakuyoboda myootokala yaamutabi alimwi azijazyo zyamagesi zilivwunga zyakuŋanda yakuyoboda zimbayambaya.
8 Imulimo Mbuuli Mukuzuzikizyigwa: Naakapegwa mukuli wakuyaka tempele, Mwami Solomoni wakasala baalumi bali 550 ikuti basololele mumulimo. Aaba bakali babelesi beelela alimwi bahaazibwene. Icikozyanyo caumwi wabaabo ngu Hiramu walo wakali haazibwene kumulimo wangolida, insiliva, mukuba, mabwe alimwi akuyaka. (1 Bam. 7:13, 14) Mbubonya buyo, bahaazibwene kumapaipi, magesi, ikuyaka alimwi akupenta bapegwa mulimo wakuyungizya mutabi wesu.
9 Icibeela cabasikuyaka lino cilijisi ibakwesu abacizyi bali 81 icibikkilizya bakwesu banyenzi bali 36, ibali 15 mbaasikulisungula bamumasi alimwi ibali 30 mbabelesi bamumasi. (Int. 110:3) Basikulisungula bamumasi balalibbadelela kuzwa mumasi aambi mbuli ku United States, Canada alimwi aku England ikuti baboole ikuzyikubeleka mulimo kwansondo zisyoonto kusikila kumyezi yotatwe. Aabo babeleka kabali babelesi bamumasi bakasalwa kuti babeleke mulimo kuno aba Cibeela Cakuzekaula Akuyaka (Design-Build Department) alimwi bazwa mumasi aali 13. Balabeleka kusikila naaya kumana mayake naa ikusikila mulimo ngobacita wamana. Kwainda nsondo zyobile, imbungano yomwe mu Lusaka ilalombwa kuti itumine basikulisungula bali mbobabede ikuzyoobeleka mulimo uuyandika mu Mujibelo. Basikulisungula aaba baboola buyo buzuba bomwe abalo baloonda mulimo mupati muciindi ncobatola kubuyake alimwi eeci ncoolwe cipati kulimbabo ikutola lubazu mukukomezya ŋanda ya Leza.
10 Ino Mbuti Boonse Mbobanga Bagwasyilizya?: Nokuba kuti bakwesu bamu Lusaka balijisi coolwe cakulisungula alimwi akugwasya, tobanabunji kunyina notuya kukonzya kutola lubazu ikubeleka cacigaminina kumayake aaya. Nokuba boobo, kuli zinji nzyotunga twacita andiswe kugwasyilizya. Imwaapostolo Paulo wakalomba basyominyina baku Korinto kuti kabamubikkilizya mukukomba kwabo ikutegwa eelyo najana buyumuyumu ayumizyigwe akumanizya mulimo wakwe. Mbubonya buyo, ikumanizyigwa kwamulimo ooyu uuyandika kapati aabe makani ngotupailila lyoonse. (2 Kor. 1:11) Amusyome kwaamba kuti inkumbizyo zyanu ziyooyingulwa.—Int. 65:2; Int. 127:1.
11 Inzila iimbi iigwasya boonse mobanga bagwasyilizya nkwiinda muzintu zyakumubili. Mbubwenya mbomunga mweezyeezya, imayake aali boobu ayandika mali manji kutegwa ayakwe. Aboobo mali manji alayandika ikutegwa amanizyigwe. Sena inga twacikonzya kwaajana mali aaya?
12 Nokwakali kuyakwa mayake aaliko kale, ibakwesu bakatondezya muuya uuli mbuli wakatondezyegwa eelyo Davida naakaambila bantu kuti basange zintu zyatempele lyakali kuyooyakwa mu Jerusalemu. Ibbuku lya 1 Makani 29:9 lyaamba kuti: “Lino bantu bakasekelela nkaambo kazipo izyakaletwa, nkaambo bakali kupa Jehova camoyo woonse.” Mbubonya buyo, ibakwesu bakali kutumina kufwumbwa ncobakonzya ikugwasyilizya kuyaka ofesi lyesu lyamutabi. Iciindi eeco, imuntu aumwi alimwi ambungano mucisi coonse zyakasanga ikugwasyilizya bukombi bwakasimpe. Ikusanga kwanu ikujatikizya mulimo wanyika yoonse kuyoogwasya kapati mukumanizya mulimo ngotujisi.
13 Impindu ziyoojanika nzinji. Ikuyungizyigwa kwamayake abasanduluzi kuyoopa kuyaambele kwakasimpe kafwutula bantu mumilaka yamucisi minji. Imaanda aakukkala alimwi amilimo imbi iibambuludwe iyoopa ziyandika zyabasikulisungula baku Beteli mbobayaabuzumanana kulanganya zintu zyeendelezyegwa a Leza ziyaambele mucisi cesu lyoonse. Amusyome kwaamba kuti Jehova ulakulongezya ikusoleka nkomucita cabunkutwe mukugwasyilizya mulimo ooyu. Toonse atube aamakanze aakutola lubazu ‘mukunungilila ntambo zyatente lyesu’ mukutembaula alimwi akupa bulemu kuzina lya Jehova.—Is. 54:2.
[Zifwanikiso izili apeeji 3]
Iŋanda eeyi iijisi maanda aali 32 tiikaceyi mukuvwula kwamukwasyi wa Beteli kulangilwa mumyaka iili kkumi kumbele
[Cifwanikiso icili apeeji 4]
Ikumanizya mulimo aamaofesi mapya aali 47
[Cifwanikiso icili apeeji 4]
Ikubikka makkapulosi
[Cifwanikiso icili apeeji 5]
Mukwiindana amayake aaliko aakayakwa kwiinda mukubelesya nzila “yakwaanzika”— oomo zibeela zyabwaanda zipangidwe kale mozibikkwa mpozyeelede—iŋanda yakukkala mpya inooyasyidwe ncelwa zyasamende alimwi akusyingululwa asamende
[Cifwanikiso icili apeeji 6]
‘Ndilabukkomanina ibunyina bwanyika yoonse mbondakali kubala buyo’
[Cifwanikiso icili apeeji 6]
“Ilukamantano lwini-lwini luboola kwiinda mukubelekela antoomwe alimwi akucita cintu cimwi toonse ncotuyeeya kuti tatukonzyi kucicita munguzu zyesu tobeni, pele buyo munguzu zyamuuya wa Jehova”
[Cifwanikiso icili apeeji 6]
“Ikubona kasimpe mbokakamantanya bantu bakakomezyegwa munzila ziindene-indene kwatuyumya kulusyomo”
[Cifwanikiso icili apeeji 6]
‘Imulimo ooyu ngwakulibambila paradaiso a Nyika’