Lugwalo Luzwa Ku Kabunga Keendelezya
MBOTULI afwaafwi akunjila mubukkale bupya, cilayandika kapati kuti katulindila Jehova lyoonse. (Zef. 3:8) Musinsimi Daniele wakati: “Leza . . . uuyubununa makani aasisidwe. Ngonguwe wazibya . makani aayooba kumamanino aaciindi.” (Dan. 2:28) Ncoolwe cipati ikupona kumamanino aciindi eeco cakasinsimwa alimwi akumvwisya maseseke Jehova ngali mukuyubununa mazuba aano.
Kwiinda mu “muzike musyomesi uucenjede,” Jehova asyoonto-syoonto wayubununa makanze aakwe aakubunganya “inkamu impati” yanyika yoonse yabakombi “kumazuba aakumamanino” aano aakataazya. (Mt. 24:45; Ciy. 7:9; 2 Tim. 3:1) Isaya 2:2, 3 yaamba kuti kubunganya ooku kucitwa anyika yoonse kucitika “kumamanino aaciindi.” Mwaka amwaka kubunganya ooku kulazumanana mukati kamanyongwe alimwi alunya luzwide munyika eeyi.
Mu mwaka wa 2004, twagwasyigwa kubona mbokuyandika kuccilila majwi aa Jesu aakuti: “Amulangile . . . amulibambe.” (Mt. 24:42, 44) Masimpe, zicitika munyika zilijisi bupanduluzi buyandika kapati ku Banakristo bazyi “zitondezyo zyasunu” alimwi ibabweza ntaamu yeelede. (Mt. 16:1-3, Ci) Mukuzuzikizya Ijwi lyakwe, Jehova uyoozumanana kuba abantu bakwe mbeendelezya kucita mulimo wakwe nokuba kuti balakazyigwa.
Nokuba kuti bamwi balasoleka kukasya kukambauka Bwami, bakwesu bazumanana kukanana kasimpe akuswaangana antoomwe. (Inc. 5:19, 20; Heb. 10:24, 25) Kucisi ca Russia mu June 2004, nkuta iinduluka lubeta ku Moscow yakazuminizya kukosola nkoyakacita nkuta nsyoonto kwakukasya mulimo wa Bakamboni ba Jehova alimwi akujala mbunga iizumizidwe amulawo mu dolopo eeyo. Nokuba boobo, bakwesu kunyina nobatyompwa; balizyi Leza ncayanda kuli mbabo alimwi balamumvwida kali Mweendelezi wabo kwiinda bantu. (Inc. 5:29) Tulisinizyide kuti Jehova uyoobasololela babelesi bakwe nokuba kuti kuli mulawo uukasya.
Mucisi ca Georgia mumyaka yainda, bakwesu bakasweekelwa mpasya, bakalwanwa ankamu yabantu alimwi mabbuku aabo akaumpwa kabalangilila. Pele kunyina cilwanyo niciba comwe cabambilwa kubalwana cazwidilila. (Is. 54:17) Mumwaka wamulimo wa 2004, Bakamboni ba Jehova bakazumizyigwa alimwi mucisi ca Georgia. Miswaangano yakacitwa kakunyina kunyonganizyigwa alimwi mabbuku alanjila mucisi kakunyina penzi. Kwakali mweelwe waatala wabasikumwaya awabaabo bakajanika ku Ciibalusyo.
Muzisi zya Armenia, Eritrea, Korea, Rwanda, alimwi a Turkmenistan, bakwesu bakaangwa akaambo kakusyomeka kwabo. Nokuba kuti balapenzyegwa, balizyi kaambo kamu Magwalo kabapa kuti kabapenga, aako kabagwasya kusyomeka nobalindila lufwutuko kuzwa kuli Jehova.—1 Pet. 1:6; 2 Pet. 2:9.
Nomulanga-langa Lipooti Yamwaka wa Mulimo ya 2004 mu Ngazi Yamulindizi ya February 1, 2005, muyookondwa abubotu bwa Jehova. (Int. 31:19; 65:11) Tusyoma kuti lipooti eeyi iyoomukulwaizya kuzumanana kweenda munzila ikkomanisya Leza.—1 Tes. 4:1.
Kusolekesya kwazumanana kucitwa kutegwa bantu bamisyobo yoonse bamvwe kasimpe. Mucikozyanyo, mavidiyo, ma DVD alimwi amabbuku mumwaambo wakutambaika amabbuku aaboofu abambwa kutegwa agwasye basicuulutwi abataboni kuyaambele kumuuya. Basikumwaya banji bayiiya myaambo iikananwa abamuzwakule bakkala mucilawo cambungano yabo.
Kuyungizya waawo, kwabambwa tubunga tunji muzilawo zikatazya kusika. Mutabi umwi ulijisi tubunga twiinda ku 300 tujisi basikumwaya bainda ku 7,000. Eeci citondezya kuti mbungano zipya zilalangilwa kubambwa. Kuyungizya waawo, akati kabantu basika ku 16,760,607 bakajanika ku Ciibalusyo mumwaka wamulimo uno, bantu bainda kutuulunzuma tuli 10 tiibakali Bakamboni. Eeci citondezya kuti kucili butebuzi bupati.
Tulumba Jehova akaambo kazilongezyo zyakwe aluyando ndwatondezya kuli ndiswe abuzuba. (Tus. 10:22; Malk. 3:10; 1 Pet. 5:7) Notuya buyaambele katukamantene “kumamanino aaciindi,” lusyomo lwesu luli muli Jehova. Kunyina makani amapenzi ngotukonzya kujana, atulutobele lugwalo lwamwaka wa 2005 lwakuti: “Lugwasyo lwangu lulazwa kuli-Jehova.” (Int. 121:2) Twamupa mooni wesu waluyando alimwi tulamupailila.
Tobanyoko,
Kabunga Keendelezya ka Bakamboni ba Jehova