Ncinzi Cakamukkomanisya?

Nomulanga-langa twaambo tupati-pati kuzwa mukubala Bbaibbele kwa mvwiki, maminiti aali one alapegwa kubaswiilizi kutegwa batole lubazu nobalombwa kwiingula mubufwaafwi. Ibakwesu bapegwa cibeela eeci beelede kubelesya bupampu. Tabeelede kubuzya mibuzyo iigaminide iipa kuti cibayumine bantu kwiingula. Kulomba baswiilizi kwaamba twaambo mubufwaafwi ntobakakkomanina inga kwagwasya. Ikuti kakunyina baingula antela mwaambi kayanda kugamika baswiilizi kucibalo cimwi, ambweni mibuzyo iili apeeji 48 mubbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza inga yabelesyegwa kaili mibuzyo iiyungizyidwe. Kufwumbwa mibuzyo iibelesyegwa yeelede kutalisya mubandi uupa kuti bantu banji baanguluke kutola lubazu.