Sena Mwanaanu Ulakonzya Kusala Cabupati?
1. Ndusyomo luli buti bana ba Bakamboni ndobajisi kujatikizya kubelesya bulowa? Amupe cikozyanyo.
1 Kusala cabupati ikujatikizya nzi? Kubikkwa bulowa. Mbuli mbokutondezyedwe mucibalo cijisi mutwe wakuti “Yendani Monga Momwe Mwalangizidwa ndi Yehova” mu Ngazi Yamulindizi ya Chichewa ya June 15, 1991, bana ba Bakamboni ba Jehova bakeelede kuba alusyomo lutazungaani kutegwa batondezye kuti kuyanda kwabo kwa kutobela mulawo wa Leza uujatikizya bulowa ncintu ciyandika kuli mbabo mbubwena mbocibede akubazyali babo. Sena acalo eeco inga cayandika ku mwanaanu?
2. Mulawo nzi nkuta imwi ngoyakapa kumwana wakakaka kubikkwa bulowa, alimwi ino bazyali Banakristo abana babo baiya nzi kuzwa kuli ceeci?
2 Milawo Iilemeka Nguzu Zyakulisalila: Kucisi ca United States, kuli nkuta mpati yeendelezya mulawo wabana bapati wakukaka kubikkwa bulowa itegwa Illinois Supreme Court. Noyakali kulanga-langa kaambo kamucizyi Kamboni wamyaaka yakuzyalwa iili 17, nkuta eeyi yakalailila kuti: “Ikuti bumboni bulasalala alimwi bulasinizya kuti mwana ulisimide mukuzyiba zikonzya kutobela kuntaamu njaabweza [alimwi] kuti kakonzya kusala cabupati, nkokuti zyeelelo zyamwana zilamupa kulisalila kuzumina naa kukaka busilisi.” Aboobo, mukulanga-langa naa mwana ulisimide kutegwa alisalile mwini, bama dokotela naa nkume-kume balakonzya kumubuzya-buzya mulwazi kuti bamumvwe ncakakila kubikkwa bulowa. Mukubusi inga wayandika kumvwisya kabotu-kabotu mbobuyandika kapati busilisi bwakwe azikonzya kumucitikila kukusala busilisi oobo alimwi akwaamba cakusalazya acabusicamba eeco ncasyoma kujatikizya mulawo wa Leza waamba bulowa.
3. Mibuzyo nzi bazyali njobeelede kukkalaansi kuyeeya kutegwa bailange-lange, alimwi ino nkaambo nzi?
3 Ncinzi Mwanaanu Ncayooamba? Sena bana benu balilibambilide kwaamba mbobalimvwa kumulawo wa Leza uujatikizya bulowa? Sena balasyoma amoyo wabo woonse kuti mmalailile aazwa kuli Leza ‘aakulikasya kubulowa’? (Inc. 15:29; 21:25) Sena balakonzya kupandulula nzyobasyoma kuzwa mu Magwalo? Sena bayookonzya kuba basicamba mukukwabilila kusala kwabo kujatikizya bulowa ikuti bama dokotela basyoma kuti buumi bwabo buli muntenda, nokuba kuti bazyali babo tabako? Mbokunga ‘toonse tulasikilwa ziindi zyalufu azyamapenzi,’ mbuti mbomunga mwayiisya bana benu kuliyumya kumasunko aalusyomo lwabo aatayeeyelwi?—Muk. 9:11; Ef. 6:4.
4, 5. (a) Mmukuli nzi bazyali ngobajisi, alimwi mbuti mbobakonzya kuuzuzikizya? (b) Mbubambe nzi buliko bwakugwasilizya bazyali?
4 Nobazyali, Ncinzi Ncomukonzya Kucita? Mujisi mukuli wakuyiisya bana benu oobo mbwabulanga bulowa Leza. (2 Tim. 3:14, 15) Bupanduluzi bulimvwisya bulajanwa mubbuku lya Kukambitsirana, mapeeji 313-317. Amuliiye kabotu bbuku eeli aantoomwe amukwasyi wenu. Kubelesya cibeela caamba kuti “Ngati Wina Anena Kuti—” amapeeji 317-319, amuziinduluke-induluke abana benu kutegwa mubagwasye kuba aluzibo mukupandulula nzyobasyoma akaambo ncobazisyomena. (1 Pet. 3:15) Azimwi zigwasya kutuyiisya kujatikizya makani aabulowa zibikkilizya broshuwa yakuti Kodi Mwazi Ungapulumutse Motani Moyo Wanu? alimwi a Ngazi Yamulindizi ya July 1, 2004, mapeeji 8-18. Kuyungizya waawo, mapulogilamu aavidiyo aakuti Transfusion-Alternative Health Care—Meeting Patient Needs and Rights alimwi ayakuti No Blood—Medicine Meets the Challenge, aaliko lino a DVD iijisi mutwe wakuti Transfusion Alternatives—Documentary Series, alapa twaambo tulimvwisya kujatikizya mbobuli bwamaanu ambobugwasya busilisi akwaandulwa kwakutabelesya bulowa. Sena mukwasyi wenu wakazilanga-langa kale zibelesyo eezi caino-ino?
5 Amubagwasye bana benu ‘kusimpikila makani ngaayanda Leza, makani mabotu aatambulika aalondokede’ kujatikizya bulowa. Aboobo balakonzya kusala cabupati kwalo kupa cilongezyo ca Jehova.—Rom. 12:2.