‘Mutaubauli Bwanike Bwanu’
1. Ino nkukulwaizya kuli buti mwaapostolo Paulo nkwaakapa mukubusi Timoteo?
1 “Kutabi uubaula bwanike bwako, pele ube ciilizyo cabaabo bazumina, mukwaamba amukweenda amukuyandana amukusyoma amukusalala.” (1 Tim. 4:12) Aboobo Paulo wakayeezya Timoteo mbociyandika kubelesya nguzu zyabukubusi mumulimo wa Leza. Timoteo tanaakeelede kuubaula nguzu zyakwe zyakugwasya bamwi pele wakeelede kubelesya ciindi coonse ncaakali kukonzya kujana.
2. Nzyoolwe zili buti nzyobajisi bana mumbungano?
2 Kubakubusi banji, myaka yabo yabwanike imanina kucikolo. Ikuti kacili boobo akulindinywe, sena cikolo mucibona kuti ncilawo cenu cimugeme cabukambausi bwamukwiizya? Cakutadooneka, kubikkila maanu nkomwacita kumalailile aazwa kubazyali bakomba Leza, kumiswaangano yambungano alimwi akuciiyo cenu nobeni kwamupa luzyibo lwakumuuya lubotu cakuti naa mwalwaambila bamwi, lulakonzya ‘kumufutula nobeni, abalo bamumvwa mulabafutula.’—Tus. 1:8, 9; 1 Tim. 4:16.
3, 4. Mbuti lubomba lwamusimbi umwi mbolwakalongezyegwa alimwi sena andinywe mwakacitikilwa cintu camusyobo ooyu?
3 Kwiinda Mukupa Bumboni Kufwumbwa Ciindi: Ziindi zyakuti mubelesye zyeezyo nzyomuzyi zilajanika abuzuba. Eeci cakacitika kuli sicikolo wazina lya Esther uuli mugiledi 8 ku Cooko Cakumusanza camu Zambia. Basicikolo bamwi bakali kubona ibayi ba Esther kuti mulombwana sikuvwanyauka. Nokwakainda ciindi kuzwa nobakali kubweka mucikolo, ibayi aaba bakalomba kulekelelwa abasicikolo kubikkilizya a Esther. Bakalomba kuti, “Amundikombele kutegwa ndicince bukkale bwangu.” Kulomba ooku kwakamunjila mumoyo Esther calo cakamupa kuti aabile bayi aaba Ngazi Yamulindizi ya March 1, 2005 iijisi mutwe wakuti, “Mbuti Mbomunga Mwabamba Luumuno Abamwi?”
4 Nobakamana kubala magazini eeyi, bukkale bwabayi aaba bwakacinca alimwi bakalomba kulekelelwa lwabili abasicikolo. Lubomba lwa Esther lwakapa kuti bayi balembe kuti: “Ndalumba kapati kuli ncoondicitila. Ulakonzya kubona mbondacinca bukkale bwangu akaambo kamagazini eeyi. Ndakali kutyompwa, pele magazini eeyi yandiyumya-yumya.”
5. Nkaambo nzi ncotuteelede kuyeeya munzila iilubide kujatikizya mukuli wesu ‘wakutaba bayeeyi nyika’?
5 Kwiinda Mukuba Cikozyanyo Cibotu: Mutalubili pe, kwiima nji kukasimpe kuyoopa kuti bantu bamunyika batamukkomanini—pele ciyoomupa ziindi zibotu zyakwaambilizya “makani mabotu loko.”—Joh. 15:18, 19; Inc. 5:27-32; Is. 52:7.
6, 7. Ncinzi cikonzya kutobela kuti twabikkila maanu kukutobela njiisyo zyamu Bbaibbele?
6 Priscar uuzwa ku Cooko Caakati camu Zambia wakabbapatizyigwa kali amyaka yakuzyalwa iili kkumi aumwi. Nokwakainda buyo ciindi cisyoonto, lusyomo lwakwe lwakasunkwa. Bumwi buzuba beendelezi bacikolo bakalailila kuti basicikolo boonse bakabeleke mumpulazi nyenzi mwakasyangidwe tombwe. Priscar wakakaka cabulemu. Sicikolonyina wazina lya Masia naakamubuzya ncaakakakila kubasangana, Priscar wakapandulula kwiinda mukubelesya zibeela zyabbuku lya Mafunso Achichepere Akufunsa—Mayankho Amene Amathandiza.—yp mapeeji 272-275.
7 Sicikolo ooyu wakatambula broshuwa ya Ncayanda eelyo ciiyo ca Bbaibbele cakatalisyigwa. Ciindi cisyoonto buyo nokwakainda myezi iili cisambomwe, Masia wakali kuyiisyigwa Bbaibbele kuli Priscar, wakabbapatizyigwa. Cabota kaka cilongezyo ncaakajana musimbi ooyu akaambo kakuba cikozyanyo cibotu!—1 Pet. 5:8-10; Dan. 1:14-17.
8. Ino Jehova ukubona buti kusoleka kwenu nomumulemeka?
8 Tacigambyi pe nomuyungwa kucikolo alimwi anomuyoowa kutola lubazu mumulimo wakukambauka akaambo kakuti bamwi bayoomufwubaazya. Mbuti mbomukonzya kuyumya lusyomo lwenu kutegwa mwiime nji mumasunko aasunka lusyomo? Amusyome muli Jehova lyoonse akuyanda kumukkomanisya. (Tus. 29:25) Amulukkomanine luzibo ndomujisi mukubelesya Jwi lya Leza mumulimo wenu. (2 Tim. 2:15) Ibamwi kubikkilizya abacana-cana banji balayanda kuba abulangizi bwakumbele, eelyo Jehova uyoomubelesya kutegwa mubagwasye.—Mt. 21:15-16; 2 Bam. 5:2-4.
9. Mbuti mbomukonzya kutukazya twaambo twabamwi ‘twakuubaula bwanike bwanu’?
9 Mumyezi iiboola, muyakuba aciindi cibotu kapati cakupa bumboni—sena muyakucibelesya? Kwiinda mukuba abukkale bwa Bunakristo bubotu lyoonse alimwi akupa bumboni kufwumbwa ciindi nokweelede kucita boobo, muyooligwasya nobeni abamwi. Eelyo kunyina uuyokonzya ‘kuubaula bwanike bwanu.’—1 Tim. 4:12.