Lugwalo Luzwa Ku Kabunga Keendelezya
“AMUBE aluzyalo aluumuno luzwa kwa-Leza Taateesu aku-Mwami wesu Jesu Kristo.” Ooku kwakali kwaanzya Paulo nkwaakabelesya mumagwalo ngaakalembela mbungano zinji. Kwaanzya ooku kwaamba ncotuyanda kuti nyoonse mube acalo.—Ef. 1:2.
Tulikkomene kaka akaambo kaluzyalo luzwa kuli Jehova kwiinda mucipaizyo cacinunuzyo ca Kristo Jesu! Kwiinda mucinunuzyo, twaba abukkale mbwazumina Leza. Notwatakabujana kwiinda munguzu zyesu tobeni nokuba kuti twaliiya buti Bbaibbele, tukambauka makani mabotu naa kubeleka milimo imwi mibotu. Tulalekelelwa zibi akupegwa buumi butamani ikutali kuti nkubbadela milimo yesu, pele nzipego zitondezya luzyalo lwa Jehova kwiinda muli Jesu Kristo.—Rom. 11:6.
Paulo wakalembela basyominyina kuti: “Tulamukumbila, kuti luzyalo lwa-Leza ndumutambwide lutabi lwabuyo. Nkaambo wati, Kuciindi ceelede ndakakuswiilila, akubuzuba bwalufutuko ndakakugwasya. Lino amubone, ciindi ceelede nkukuti sunu, abwalo buzuba bwalufutuko nkukuti sunu.” Kwakali ‘ciindi ceelede’ kautananyonyoonwa munzi wa Jerusalemu mumwaanda wamyaka wakusaanguna. Bantu babombemyoyo ibakali kumuyanda Jehova bakafwutulwa kumuuya. Eeci cakasololela kuti boonse bakali kusyomeka ibakatija kuzwa mu Jerusalemu kautananyonyoonwa mumwaka wa 70 C.E., bafwutulwe kumubili.—2 Kor. 6:1, 2.
Mazubaano andiswe tukkede “kuciindi ceelede” alimwi “akubuzuba bwalufutuko.” Aabo Jehova mbazumina kuba babelesi bakwe alimwi bali mukufwutulwa kumuuya, bajisi bulangizi bwalufwutuko lwakumubili mu “buzuba bupati bwa-Jehova” buli aafwaafwi kapati mazubaano.—Zef. 1:14.
Kuboola kwabuzuba bwa Jehova kutupa mukuli mupati. Tuleelede kucenjezya bantu kujatikizya buzuba oobu alimwi akugwasya babombemyoyo kugwasyigwa aluzyalo lwa Jehova kutegwa abalo bakafwutulwe. Paulo wakaluuzyi mbowakali mupati mukuli ooyu. Wakalemba kuti: “Maawe kulindime nintakambauka Makani Mabotu.” Alimwi wakaamba mbwaakali kulimvwa mumajwi aaya: “Ndijisi ceelelo cakucitila boonse . . . nibaba basongo nibaba bataiyide. Nkaambo kaako mebo ndayandisya kumukambaukila Makani Mabotu.”—1 Kor. 9:16; Rom. 1:14, 15.
Jehova uyootupa mulandu ikuti twawuunduluzya mulimo mupati wakucenjezya bantu. Tulizyi Jehova ncaakaambila musinsimi Ezekiele: “O mwana amuntu, ndakubika kuti ubede luzubo lwa-Israyeli mulindizi. Uyooswiilila majwi aakumulomo wangu, lino uleelede kubacenjezya muzina lyangu. Kufumbwa ciindi nindaambila sizibi kuti, Ncobeni ulafwa, na wabula kumucenjezya, na toambi ijwi lyakucenjezya oyo sizibi kuti aleke inzila yakwe yabubi akujana buumi, lino oyo sizibi uyoofwa mukati kamilandu yakwe, pele bulowa bwakwe ngumulandu wako.”—Ezk. 3:17, 18.
Mazubaano aakumamanino alakatazya. Tacili cuuba-uba kulanganya twaambo twamumukwasyi, mulimo wakumubili, mulimo wambungano alimwi akukambauka. Kuyungizya waawo, nobanji mulapengana akuciswa, kutyompwa, bucembele, nokuba kukazyigwa. Bunji bwenu ‘mulilemenedwe.’ Tulamufwida lubomba kweelana amajwi aakaamba Jesu kuti: “Amuboole kulindime nyoonse nomukatede nomulemenwa, ndime enti kamulemunune.” (Mt. 11:28) Tulamulumba kapati nyoonse nomusoleka kuzumanana kubelekela Jehova cakusyomeka nomuba mumapenzi mapati amasyoonto.
Akaambo kabusungu bwenu mumulimo wakukambauka akuyiisya alimwi akaambo kacilongezyo ca Jehova, mweelwe waakati-kati wabantu bali 4,762 balabbapatizyigwa ansondo nyika yoonse. Mumwaka wamulimo wamana, mbungano zipya izili 1, 375 zyakatalisyigwa. Tulasyoma alimwi tukombela kuti ibbuku lipya lya Ino Ncinzi Cini Bbaibbele Ncoliyiisya?, lyalo liliko lino mumyaambo yiinda ku 120, liyoogwasya tuulunzuma twabantu kugwasyigwa aluzyalo aluumuno luzwa kuli Jehova muciindi ecino ‘cakubuzuba bwalufwutuko.’
Kabunga Keendelezya kalamuyanda akumupailila. Alimwi tulamulumba akaambo kakutupailila.
Tobanyoko,
Kabunga Keendelezya ka Bakamboni ba Jehova