Basicamba, Pele Basiluumuno
1 Bantu banji mbotukambaukila balaamba nzyobasyoma eezyo ziteendelani akasimpe kamu Bbaibbele. Nokuba kuti tweelede kukambauka cabusicamba, tuyandika kuba ‘basiluumuno kubantu boonse’ alimwi tatuyandiki kubanyemya. (Rom. 12:18; Inc. 4:29) Ino mbuti mbotukonzya kuba basicamba pele katuli basiluumuno notukambauka mulumbe wa Bwami?
2 Amujane Kaambo Nkomukonzya Kuzuminana: Muntu siluumuno tabusyi mazwanga pe. Ikukazya nzyasyoma uuli aŋanda kuyoopa kuti atauswiilili mulumbe wesu. Ikuti naa waamba kaambo kalubide, ambweni inga cabupampu twaamba kaambo nkotukonzya kuzuminana. Kwiinda mukukankaizya nzyotusyoma toonse, tulakonzya kupa kuti alikwaye alimwi akumusika amoyo.
3 Ikuti naa tiitwakabikkila maanu kaambo kalubide nkaamba uuli aŋanda, sena tuzuminizya buyo naa tuubya-ubya kasimpe? Peepe. Mulimo wesu mbotuli babelesi Banakristo tauli wakukazya kaambo kali koonse kalubide, pele ngwakukambauka makani mabotu aa Bwami bwa Leza. (Mt. 24:14) Muciindi cakunyema ciindi nokwaambwa kaambo kalubide, tulakonzya kucibona kuti nceciindi cakuziba nzyayeeya muntu.—Tus. 16:23.
4 Amumupe Bulemu Uuli Aŋanda: Kuli ziindi notweelede kuba basicamba alimwi basungu notukazya kuyiisya kutaluzi. Nokuba boobo, mbotuli bantu basiluumuno, tatusampauli nokuba kubelesya majwi aakuubaula kupandulula baabo basyoma akuyiisya twaambo tutaluzi. Kulisumpula kupa bantu kutabikkila maanu, pele kulibombya alimwi akuba aluse kupa baabo bakayanda kasimpe kuti baswiilile. Kubalemeka batuswiilila alimwi akulemeka nzyobasyoma kubapa bulemu, calo cipa kuti cibaubile kuutambula mulumbe wesu.
5 Mwaapostolo Paulo wakazibikkila maanu nzyobakali kusyoma mbaakakambaukila alimwi wakayeeya kubakambaukila makani mabotu munzila iikonzya kubanjila mumyoyo. (Inc. 17:22-31) Wakalisungula kuba ‘mbubakabede bantu boonse’ kutegwa akonzye ‘kufwutula bamwi.’ (1 Kor. 9:22) Tulakonzya kucita mbubwenya kwiinda mukuba basiluumuno notukambauka makani mabotu cabusicamba.