‘Amukkale Muluumuno Abantu Boonse’
1. Ndulayo nzi lwamu Bbaibbele ndotukonzya kutobela ciindi bamukamwini ŋanda nobanyema kapati?
1 Bantu ba Jehova balaluyanda luumuno, alimwi awalo mulimo wesu ngwaluumuno. (Is. 52:7) Nokuba boobo, zimwi ziindi bantu balanyema akaambo kakubaswaya aŋanda yabo. Ino ncinzi cikonzya kutugwasya kubamba luumuno mubukkale buli boobu?—Lom. 12:18.
2. Nkaambo nzi ncociyandika kuzyiba bukkale mbobajisi bantu?
2 Amubuzyibe Bukkale Mbobajisi Bantu: Nokuba kuti bamwi balanyema akaambo kakutayanda kasimpe, ibamwi balacita oobo akaambo katwaambo tumbi buyo tutajatikizyi mulimo wesu wakukambauka. Ambweni twabaswaya aciindi citali kabotu. Mukamwini ŋanda ulakonzya kanyemede akaambo kamapenzi ngajisi. Nokuba kuti makani mabotu ngaamupa kuti anyeme, tweelede kuyeeya kuti ambweni wanyema akaambo kakuti kuli bakamwaambila twaambo tutaluzi kujatikizya ndiswe. (2 Ko. 4:4) Kuzyiba bukkale mbobajisi bantu kuyootugwasya kukkazyika moyo alimwi akuzyiba kuti tabanyemeni ndiswe kutugama.—Tus. 19:11.
3. Mbuti mbotukonzya kumupa bulemu mukamwini ŋanda?
3 Amutondezye Bulemu: Bantu banji balijisi njiisyo nzyobasyoma kapati. (2 Ko. 10:4) Balijisi nguzu zyakuzumina naa kukaka kuswiilila. Akaambo kakuti swebo tuzyi zinji kujatikizya Bbaibbele kwiinda mbabo, tatweelede kubafwubaazya akaambo kazyintu nzyobasyoma naa kubapa kulimvwa kuti kunyina ncobazyi. Ikuti naa batutanda aŋanda yabo, tweelede kubasiya cabulemu.
4. Ino caamba nzi kubandika cakukkazyika moyo?
4 Amubandike Cakukkazyika Moyo: Nokuba kuti baamba zyintu zibi, tatweelede kwiingula munzila iitali kabotu. (Kol. 4:6; 1 Pe. 2:23) Muciindi cakutalika kukazyanya, tweelede kusola kujana kaambo kamwi nkotuzuminana. Ambweni cakukkazyika moyo tulakonzya kumubuzya mukamwini ŋanda kaambo ncatazuminini. Pele kutegwa mutabaindizyi kunyema, zimwi ziindi cilagwasya kuuleka buyo mubandi.—Tus. 9:7; 17:14.
5. Mbubotu nzi buboola akaambo kakuba basiluumuno mumulimo wakukambauka?
5 Ikuti katuli basiluumuno, mukamwini ŋanda ulakonzya kuyeeya mbotwakacita, alimwi ulakonzya kuyooswiilila ciindi muntu uumbi aakumuswaya kuti amukambaukile. (Lom. 12:20, 21) Nokuba kuti ulibonya kuti talangilwi kucinca, bumwi buzuba ulakonzya kuyooba mukwesu. (Gal. 1:13, 14) Kunyina makani naa wakakilalimwi kasimpe, ikuti twazumanana kulijata alimwi akutondezya kuti tuli basiluumuno, tuyoomulemeka Jehova alimwi akubotezya njiisyo zyesu.—2 Ko. 6:3.