Amumugwasye Mukamwini Ŋanda Kumvwisya Kaambo
1. Ninzila nzi yabukambausi iibeleka kabotu mumulimo wamumuunda?
1 Ninzila nzi iikonzya kubeleka kabotu mumulimo wamumuunda—kuba sinkazi naa kugwasya mukamwini ŋanda kumvwisya kaambo akuzyiba ciluzi? Mwaapostolo Paulo wakabelesya nzila yabili naakali kubandika aba Juda ku Tesalonika, alimwi “akaambo kaceeci, bamwi akati kabo bakaba basyomi.” (Mil. 17:2-4) Ncinzi cibikkilizyidwe mukugwasya bantu kumvwisya kaambo?
2. Mbuti mbotukonzya kwiiya cikozyanyo ca Paulo ciindi notukambauka makani mabotu?
2 Kuzyiba Bukkale Ambobalimvwa Bantu: Ikugwasya bantu kumvwisya kaambo cilabikkilizya akuzyiba mbobalimvwa bantu bali mucilawo. Paulo wakatalika kubandika aba Giliki ku Aleyopagi kwiinda mukwaamba zyintu nzyobakazyi alimwi nzyobakali kuzumina. (Mil. 17:22-31) Aboobo, ciindi nomulibambila nzila njomuyanda kuyoobelesya, amuzibikkile maano njiisyo nzyobasyoma alimwi anzyobasulaika bantu bamucilawo canu. (1 Ko. 9:19-22) Ikuti mukamwini ŋanda wabuzya mubuzyo, amusole kujana kaambo nkomuzumizyanya anguwe, alimwi akuzumanana amubandi wanu akaambo aako.
3. Ino kubelesya mibuzyo cabupampu inga kwatugwasya buti ciindi notugwasya bamwi kumvwisya kaambo?
3 Amubelesye Mibuzyo Cabupampu: Tatukonzyi kupa malailile kumuntu uuli alweendo kuti asike kubusena nkwaya ccita kuti katuzyi abusena mpabede. Mbubwenya buyo, tatukonzyi kugwasya mukamwini ŋanda kuzyiba kasimpe ccita kuti twazyiba mbwayeeya. Katanamugwasya muntu kumvwisya kaambo, kanji-kanji Jesu wakali kubuzya mibuzyo kutegwa azyibe ncayeeya muntu. Mucikozyanyo, ciindi muntu umwi naakabuzya Jesu kuti, “Ino ncinzi ncondeelede kucita kutegwa ndikakone buumi butamani?,” Jesu wakayanda kuzyiba muntu ooyu mbwaakali kuyeeya katanamwiingula. (Lk. 10:25-28) Cimwi ciindi Petro naakapa bwiinguzi butaluzi, Jesu cabupampu wakabelesya mibuzyo kumululamika mbwaakali kuyeeya. (Mt. 17:24-26) Aboobo, ikuti mukamwini ŋanda wabuzya mubuzyo naa waamba muzeezo uutaluzi, tulakonzya kubelesya mibuzyo kumugwasya kumvwisya kaambo.
4. Nkaambo nzi ncotweelede kusoleka kugwasya mukamwini ŋanda kumvwisya kaambo?
4 Ciindi notugwasya mukamwini ŋanda kumvwisya kaambo, twiiya Mwiyi Mupati, Jesu, alimwi abakambausi bakacibwene kabotu bamumwaanda wamyaka wakusaanguna. Tulamulemeka mukamwini ŋanda. (1 Pe. 3:15) Akaambo kaceeci, ulakonzya kutuzumizya kuti tukapilukile.