“Kofwambaana Kwaamba Ncoyanda!”
1 Sena kuli nomwakalijene muciimo cakunyonganizigwa makani aanu ngomwakalibambilide kabotu asiŋanda wakaamba kuti: “Ncinzi ncoyanda? Kofwambaana kwaamba!” Ino inga twaiya nzi kuli ceeci?
2 Ibantu banji sunu tabakkaziki moyo. Bayanda kuziba naa ndiswe bani alimwi ancotuyanda. Nobaziba kuti kaambo ncotwaswaila nkubandika Bbaibbele, inga bakaka kuswiilila. Ikubala Bbaibbele alimwi akubandika zintu zyakumuuya tazili zintu zipati mubukkale bwabantu banji. Ino inga twabakulwaizya buti aaba basiŋanda kutupa ciindi cakubandika ambabo makani aamu Bbaibbele?
3 Icigwasya Kapati: Icintu ciyandika kapati nkumupandulwida siŋanda mumajwi buyo masyoonto kuti Bbaibbele litondezya nzila zyakumana mapenzi aamupenzya. Inzila zigwasya kapati zyakutalisya makani nzizeezyo zijatikizya kubuzya mubuzyo uupa kuti siŋanda azinzibale kuyeeya, kwamana nkubala lugwalo ilwiingula mubuzyo oyo. Ambweni inga mwayanda kusola nzila ezi zimwi. Nzyakutugwasya kufwambaana ‘kwaamba kaambo’ nkotuyanda kwaamba alimwi akukulwaizya siŋanda kuswiilila makani.
4 Muzilawo bantu mobaamba kuti tabayandi kuswiilila, amubuzye mubuzyo uubajatikizya balo lwabo:
◼ “Mbotwaamba kunjila mumwaanda wamwaka umbi, sena mulijisi bulangizi bwakuti zintu ziyooba kabotu naa muladooneka? [Amulindile bwiinguzi.] Ibbaibbele lyakasinsima kuti zintu zinoonyongene mbweena mbuli mbozibede sunu alimwi aciyoocitika kuzwawaawo.” Amubale 2 Timoteo 3:1, 2, 5 alimwi a Tusimpi 2:21, 22.
◼ “Muno mucisi bantu bajisi bubi kuyandaula nzila zyakusilika malwazi. Sena mulizi kuti Leza usyomezya kuti uyooagwisizya limwi malwazi oonse?” Amubale Ciyubunuzyo 21:3, 4.
◼ “Muunzila nzi njomuyeeya kuti bantu bamumunzi motukkala inga bagwasigwa kuti boonse nobali kutobela njiisyo zyamu Bbaibbele?” Amubale Matayo 22:37-39.
5 Mbwaanga mulimo ngotwakapegwa ngwakukambauka makani mabotu aa Bwami kufwumbwa ciindi nokwakonzeka tweelede kwaamba ncobuyoocita Bwami. Inga mwaamba kuti:
◼ “Sena mulizi kuti bbuku lyakaindi kwiinda mabbuku oonse munyika Ibbaibbele lyakasinsima kuti kuyooba mfwulumende yomwe iinooyendelezya nyika yoonse?” Amubale Daniele 2:44.
◼ “Ikuti Jesu Kristo naali ngonguwe uulela nyika, ino muyeeya kuti izintu nozyali buti?” Amubale Intembauzyo 72:7, 8.
6 Muzilawo bantu mobayandisisya kukomba, inga mwasola intalisyo yamakani yomwe akati kazeezi:
◼ “Ibantu banji balasalululwa akaambo kakuba basimbi naa basankwa naa bacikombelo cisiyene antela akaambo kakubaa lukanda lusiyene. Ino muyeeya kuti Leza ulimvwa buti amuzeezo oyu?” Amubale Incito 10:34, 35.
◼ “Tulizi kuti Jesu Kristo wakacita maleele manji ciindi ncaakali ansi. Ikuti mwalimulombede kucita cintu comwe camaleele, ino ncinzi ncomunga mwayanda? Amubale Intembauzyo 72:12-14, 16.
7 Ikuti naa siŋanda ulawayawaya kujula mulyango, inga mwatalisya mubandi amajwi aakuti:
◼ Ibunji bwabantu sunu bakatala kwiide kumvwa zyamapenzi. Bayanda kumvwa zintu zinga zyamana mapenzi. Ndisyoma kuti eco ncomuyanda andinywe? Pele ino nkuukuli nkotunga twajana lugwasyo lwini-lwini lwakumana mapenzi eesu?” Amubale 2 Timoteo 3:16, 17.
8 Sena Inga Tamukonzyi Kusola? Bunji bwaziindi icintu ciyandika kukulwaizya siŋanda kuswiilila makani eesu nkubuzya mubuzyo mufwaafwi muuba-uba. Umwi mukaintu watakajisi luyandisisyo lwakasimpe wakatamba bacizi bobile muŋanda yakwe umwi wabo naakabuzya mubuzyo wakuti: “Sena inga mwabwaamba Bwami mbomupailila mu Mupailo wa Mwami?” Oyu mukaintu wakamukonda mubuzyo oyu, elyo wakazumina kwiiya Bbaibbele. Lino mmubelesi wa Jehova uulyaabide!
9 Nomukanana asiŋanda, amusinizye nzyomwaamba. Kamuzikanana amoyo woonse. Ibantu balalangilwa kumvwa nobaziba kuti tulababikkila maanu.—Inc. 2:46, 47.
10 Mulimo wakukambauka makani mabotu tauliyumini sunu. Bamwi basiŋanda balayoowa beenzu. Ibamwi bajisi bubi aboobo tabajisi ciindi. Nokuba boobo, atuzibe kuti kucili bantu ibeelede ibayanda lugwasyo. (Mt. 10:11) Inga twazwidilila mukusola nkotusola kubayandaula kuti naa makani eesu aantalisyo twaafwiinsya alimwi twafwambaana “kwaamba” makani eesu!