Milimo Iitondezya Lusyomo Luyumu!
1. Nzyintu nzi zibyaabi zyakasinsimwa a Jesu?
1 Baapostolo bakali kuswiililisya Jesu naakali kubaambila kubako kwakwe amazuba aamamanino. Zyintu zibyaabi zyakali kuyoobacitikila bantu—nkondo, nzala, mizuzumo amalwazi. Kumane Jesu wakaamba kuti basikumutobela baya kusulwa, kupenzyegwa akujaigwa. Wakaamba kuti kuya kuba basinsimi bakubeja alimwi bayooena banji. Luyando lwabantu banji lwakali kuyoomana.
2. Nkaambo nzi ncocikkomanisya kuti makani mabotu alakambaukwa munyika yoonse?
2 Akaambo kazyintu eezyo nzyaakaamba, kweelede kuti bakagambwa baapostolo Jesu naakaamba kuti makani mabotu aa Bwami bwa Leza aya kukambaukwa munyika yoonse. (Mt. 24:3-14) Mazuba aano tulakubona kuzuzikizyigwa kwabusinsimi oobu bukkomanisya. Nokuba kuti tupona muziindi zikatazya, Bakamboni ba Jehova cabusungu balakambauka makani mabotu. Luyando munyika noluya bumana, luyando lwesu lulakomena. Nokuba kuti ‘misyobo yoonse’ yabantu tabatuyandi, tulabakambaukila boonse.
3. Myeelwe iili iikulwaizya njomwabona mulipooti yanyika yoonse?
3 Elo kulakulwaizya ikulingula mulimo wa Bakamboni ba Jehova mumwaka wamulimo wamana kweelana ambokutondezyedwe accaati iili amapeeji 3 kusikila ku 6! Amwaka mumyaka iili 16 yainda, bakabeleka mawoola ainda ku bbiliyoni yomwe mumulimo wakukambauka akugwasya bantu kuba basikwiiya. Eeci citondezya kuti tujisi lusyomo luyumu. Kwakali kuyungizyigwa kwabapainiya a 5.8 pasenti, basikumwaya a 3.1, ziiyo zya Bbaibbele a 4.4 pasenti. Mumwaka wamulimo wainda, bantu bakabbapatizyigwa bakayungizyigwa a 20.1 pasenti. Elo cilakkomanisya ikuzyiba kuti bantu batandila kutuulunzuma tuli ciloba balamubelekela Jehova cakusyomeka—kwiinda kaindi! Nomulanga-langa accaati, ncinzi ncomwabona cimukulwaizya kapati?
4. Mapenzi nzi muntu umwi ngaakazunda naakali kayanda kubbapatizyigwa?
4 Nokuba kuti myeelwe eeyi ilakkomanisya, tweelede kubona kuti iiminina bantu ibatondezya lusyomo lwabo. Amulange cikozyanyo eeci. Guillermo wakakomenena ku Bolivia. Wakazyalwa mu 1935, alimwi kuzwa naakali amyaka iili fwuka wakali kubelekela mumuunda wa coca, cisyango cijisi matewu aabelesyegwa kupanga musamu uukola uutegwa cocaine. Kuzwa kubwana, wakali kulya matewu aa coca aakola mbuli lubanje kutegwa katakali kufwambaana kumulimo ngwaakali kubeleka muyumu. Kumane wakatalika kunywa bukoko kapati akufweba. Naakatalika kwiiya nzyayanda Jehova kuli nguwe, Guillermo wakacileka kufweba akunywa. Penzi lipati lyakaceede lyakali lyakulya matewu aa coca. Mupailo wakamugwasya kuleka cilengwa eeci. Naakacileka kunywa akufweba, wakabbapatizyigwa. Waamba kuti: “Lino ndasalala alimwi ndilikkomene.”
5. Ino muyanda nzi?
5 Masimpe Jehova ulabayanda bantu. Uyanda kuti bantu boonse beempwe. (2 Pet. 3:9) Andiswe eeco ncotuyanda. Tukulwaizyigwa kubeleka kusika mpotugolela kutegwa tuzumanane kugwasya babombe myoyo kumuzyiba akumuyanda Jehova mbuli mbotumuyanda.