Mbomukonzya Kulibelesya Kabotu Bbaibbele
1. Ino Ibbaibbele litugwasya buti?
1 Ikubelesya kabotu Jwi lya Leza kupa kuti tucikonzye kukambauka akuyiisya bantu kasimpe alimwi akuyubununa njiisyo zyakubeja atunsiyansiya twabantu.—2 Tim. 2:15; 1 Pet. 3:15.
2. Ino ncinzi cikonzya kutugwasya kuti katwaajana kufwambaana Magwalo mu Bbaibbele?
2 Amulizyibe Kabotu Bbaibbele: Kutegwa tucibelesye kabotu cintu, tweelede kuzyiba mbocibelesyegwa. Ikulibala Bbaibbele lyoonse kuzwa ku Matalikilo kusikila ku Ciyubunuzyo kulakonzya kumugwasya kuzyiba mutwe wamakani aamu Bbaibbele. Alimwi ikucita boobo kulakonzya kumugwasya kwiibaluka magwalo akuzyiba mpaajanika. Ikwaazyiba kabotu Magwalo kulakonzya kumupa kuti mubakambaukile bamwi cakutayoowa nomwiizya anomuli mumulimo wamumuunda.—1 Tes. 1:5.
3, 4. (a) Ninzila nzi zimwi zikonzya kutugwasya kulizyiba kabotu Bbaibbele? (b) Sena kuli nzi azimwi zimugwasya kwaazyiba kabotu Magwalo?
3 Amube acilengwa cakumutobelezya mwaambi nabala Bbaibbele kumiswaangano yambungano. Nomucita ciiyo canu nobeni anomulibambila miswaangano yambungano, kamubala Magwalo aali mucibalo akuyeeya mbomukonzya kwaabelesya. Bantu banji bacibona kuti kulagwasya kulibala Bbaibbele lini kwiinda kulibalila a Kkompyuta naa apepa buyo alimwi kubapa kuti kabaajana kufwambaana magwalo nobali mumulimo wamumuunda.—Joh. 14:26.
4 Mumikwasyi imwi bajisi bubambe bwakupeta naa kuyeeya zibalo zyamu Bbaibbele. Balakonzya kucita oobu kwiinda mukulemba majwi aali mulugwalo akapepa mpoonya nkokali kunze, balemba lugwalo mobazubulula majwi aayo. Balaakwiinzyanya kubala kutegwa babone naa balakonzya kulujana lugwalo mpolubede mu Bbaibbele akwaamba majwi aali mulugwalo. Ikubandika mbomukonzya kutalika kubandika amuntu uumukazya kwiinda mukubelesya Bbaibbele naa uumubuzya mubuzyo, akwalo kulakonzya kumugwasya.
5. Ino nkaambo nzi ncotweelede kuba aluzyibo lwamu Bbaibbele?
5 Ibbaibbele ndebbuku liinda kugwasya alimwi lilakonzya ‘kusongwaazya bantu akubapa kufwutulwa.’ (2 Tim. 3:15) Mbwaanga bantu banji ibali muzilawo zyesu tabazyizyi njiisyo ziyandika kapati zili mu Bbaibbele, tweelede kuyungizya luzyibo lwesu akubagwasya kuzyiba makani aamu Bbaibbele.—Tus. 2:1-5.