Kutobela Ncaamba Magwalo Kujatikizya Malila-Cibeela 2
Kwiinda Mukusama Akulibamba
1. Ncinzi ncobalangila bantu bamwi kujatikizya nsamino ciindi camalila?
1 Iciindi nokuli malila, banamukwasyi, bamukowa alimwi abeenzinyina ziindi zinji inga basama zisani zitondezya kuti baluuside. Bamakaintu basama ziteenge, zitambala naa ntaulu alimwi amapata-pata, nomuba mumasena mobatasami boobo lyoonse. Basankwa abamakaintu baambilwa kutasama mbuli mbobasama lyoonse, pele kabalibonya tombe-tombe. Bamwi balabuzya kuti, ‘Sena eeci tacaambwi mu Magwalo?
2. Nkaambo nzi ncobakali kusamina zisani zyamasaka kaindi?
2 Bamwi bayeeya kuti cilengwa eeci cilikozyenye acilengwa ncobakali kusama zisani zyamasaka kaindi. Nokuba kuti masimpe kuti masaka akali kusamwa abantu bali mubuumba, pele akali kubelesyegwa munzila zinji kunze lyaciindi camalila. Bakali kubelesya cikutu campongo kusuma masaka azibbeeke, mbuli ziya nzyobakali kubikkila maila. Kaindi, beembezi bakali kusama zisani zyamasaka akaambo kakuti tiizyakali kudula alimwi zyakali kukkala kwaciindi cilamfwu. Bamwi bakali kusama masaka kutondezya kweempwa. (1 Bam. 21:27; Jon. 3:6-8) Daniele wakali kusama zisani zyamasaka naakali kupaila kuli Jehova. (Dan. 9:3) Basinsimi bana Hebrayo ziindi zinji bakali kusama zisani zyamasaka banooamba milumbe yakucenjezya bantu. (Is. 20:2) Lyoonse nobakali kusama zisani zyamasaka, bantu ba Leza tiibakali kusama akaambo kakusyoma mizimo yabantu bafwide. Alimwi tiibakali kusama mukuyanda kuti micito yabo naa zilengwa zyabo zyeelane azyakali kucitwa abantu bakali kukkala muzisi zyakabazingulukide. Aboobo, twanoosala zyakusama kumalila mazuba aano, kuli njiisyo ziyandika nzyotweelede kulanga-langa.
3. Mbuti bamwi mbobakonzya kujatikizyigwa ambotusama ciindi camalila?
3 Kulanga-langa Njiisyo: Cakusaanguna, bantu ba Jehova tabalibonesyi ciindi camalila mbuli mbobacita zimwi ziindi bantu “batajisi bulangizi.” (1 Te. 4:13) Cabili, tatuyandi kucita cintu cili coonse cikonzya ‘kutyompya bamwi.’ (2 Ko. 6:3) Kujatikizya njiisyo eeyi, tulakonzya kulibuzya kuti: ‘Sena kusama zisani zimwi naa zilibonya mbuli kuti ndilaaŋanda naa ziyaukide cilakonzya kutondezya kuti lusyomo lwangu amicito tazyeendelani ancolyaamba Bbaibbele? Sena inga catyompya baabo bazyi ncobasyoma ancobayiisya Bakamboni ba Jehova kujatikizya bafwide? Sena nzyondisama inga zyabatyompya bakombima? Sena kusama kuli boobo kulakonzya kutyompya bakwesu bakakaka kucita oobo alimwi ambweni bakapenzyegwa akaambo kakusala kwabo?’—Amubone Ngazi Yamulindizi yamu August 1, 1998, amapeeji 18-21; Yearbook yamu 1998, peeji 203, muncali 1.
4. cinzi ncotutayandi kucita?
4 Pele akati kanjiisyo zyeelede kulangwa-langwa, iiyandika kapati njeeyi: Tacikonzyi kuba camaano kucita cintu cili coonse cikonzya kunyemya Jehova. (Tus. 27:11; Kol. 1:9, 10) Tweelede kwiindana abantu banyika eeyi. Tatukonzyi kuzyiba mbozyakatalika zilengwa zyoonse zyaadilwe. Nokuba boobo, tulizyi kuti zilengwa zinji ziliswaangene akusyoma kuti bantu bafwide bacipona. Aboobo, tweelede kulangisya mbocikonzya kujatikizyigwa cilongwe cesu a Jehova kwiinda mukutobela zilengwa zimwi. Tatukonzyi “kunoolida ‘atebulu lya Jehova’ alimwi aatebulu lyamadaimona.”—1 Ko. 10:21, 22.
5. Ino ninjiisyo nzi zikonzya kutugwasya notusala zisani zyakusama kumalila?
5 Kusama Cabulemu Kumalila: Nzisani zili buti nzyotukonzya kusama kumalila? Kwamyaka minji, mabbuku aamuzike musyomesi uucenjede alatwaambila kujatikizya makani aaya.a Lyoonse tukulwaizyigwa kusama zisani zili kabotu. Zisani zili boobu inga kazitali zyamubala uumweka kapati kutegwa zyeendelane akuusa kuli “kuŋanda yadilwe.” (Muk. 7:2) Kutegwa tutatyompyi bamwi naa kubanyemya, tulakonzya kusala zisani zitabekemi naa zipa bulemu. Kufwumbwa nzyotwasala kusama, ikuzyiba kabotu ciimo cabafwide ciyoopa kuti tutondezye bulemu ciindi camalila kakunyina kutobela zilengwa zyanyika.
Kweendelezya Malila
6. Nzyintu nzi zyeelede kucitwa amalila aa Banakristo?
6 Banakristo beelede kuzikka muntu wafwa munzila yabulemu yeendelana amilawo iibikkidwe amfwulumende alimwi akutobela zyintu ziyandika kujatikizya bulondo. Ikuti malila ayendelezyegwa munzila iipa luumbulizyo lwamu Magwalo alimwi akwaamba ciimo cini cabantu bafwide, nkokuti kunyina zilengwa ziteendelani amagwalo zikonzya kucitwa. (Ef. 5:7-11) Zyintu zicitika amalila tazyeelede kunyonganya manjezyeezya abasyomima. (1 Ko. 10:32) Mbuti mbotukonzya kutobela njiisyo eezyi zyamu Bbaibbele notweendelezya malila aa Munakristo?
7. Nkaambo nzi ncotweelede kusala majwi aakwaamba notwaambaula zyabantu bafwide?—Tus. 18:21.
7 Kutembaula Muntu Ufwide: Makani aamalila apa coolwe cakwaamba mubufwaafwi mbwaakali kusyomeka muntu ciindi naakali kupona. Pele kuti ikulanga mutunta kwacitilwa kunamaumbwe naa kumbi buyo, bacibbululu abeenzinyina batali Bakamboni balakonzya kutalika kutembaula muntu wafwa. Balakonzya kwaamba kuti Leza wakamwiita muntu ooyo kujulu naa sikwaazwa ulimulweendo lwakuunka kubusena bumbi. Majwi mbuli aakuti “moone muluumuno,” “moone kabotu,” alimwi aakuti “mweende kabotu” alabelesyegwa ziindi zinji. Kubantu banji, kucita boobo babona kuti nkupa bulemu bwamamanino kumuntu wafwa. Pele tulizyi kuti muntu uufwide takonzyi kumvwa majwi aayo. Cilibilisya kapati ncakuti, majwi aayo atondezya kuti basyoma myuuya yabasikale alimwi taayelede kubelesyegwa a Banakristo beni-beni.—Is. 52:11.
8. Nguni uupedwe nguzu zyakweendelezya malila aasimukowa kweelana ambwaamba Magwalo? Amupe cikozyanyo.
8 Mukuli Wabani?: Mumasena manji, basimukowa batasyomi bazyi kuti boonse mumukwasyi naa bamwi bamukowa mbabajisi nguzu zyakusala mbwaayelede kweendelezyegwa malila abuzuba nobeelede kuzikka. Pele bubambe bwacikwati bwa Banakristo, bupa nguzu kumulumi amukaintu kupanga zyakusala zijatikizya buumi bwabo abwabana babo. Bazyali, basimukowa, alimwi abantu bali mumbungano ya Banakristo beelede kubulemeka bubambe oobu bwamu Magwalo. (Mt. 19:5, 6) Oobu mboceelede kuba caboola kumakani aakuzikka bayandwa besu bafwide. (Matl. 23:19; 35:29) Kutegwa Munakristo atanjili “mujoko lyomwe abantu batasyomi,” weelede kucisalazya kwaamba kuti zyoonse zitiicitwe ciindi camalila zileendelezyegwa kweelana anjiisyo zyamu Bbaibbele. (2 Ko. 6:14-17) Nintaamu nzi zyeelede kubwezegwa kutegwa mubone kuti eeci cacitwa?
9, 10. Ino mbubotu nzi buliko mukulemba malailile aajatikizya bubambe bwamalila aanu, alimwi nkaambo nzi ncocitondezya luyando?
9 Kusala Kwanu Akuzyibwe: Ikuti naa muntu walembela limwi malailile aajatikizya bubambe bwamalila aakwe, kubandika abamumukwasyi kulakonzya kuuba-uba, nkaambo ziindi zinji balazitobela nzyaakalemba sikwaazwa. (Matl. 50:5) Pepa lyakasainwa akamboni lilakonzya kugwasya kapati. Makani aaya alakonzya kulembwa apepa limbi kutali apepa lyaamba mbobeelede kwaabana zyintu. Aabo balibambila zyakumbele kwiinda mukubelesya luzyibo alimwi abusongo, balizyi kuti tabeelede kulindila kusikila bakacembaale buya naa kuciswa kapati nobaya bayeeye kubweza ntaamu eeyi. (Muk. 9:11) Mbolyeelede kweendelezya dilwe, buzuba nobeelede kuzikka ankobeelede kuzikkila, alimwi aweelede kubamba akulanganya makani aadilwe, makani aayelede kubandikwa muntu kacipona.
10 Bamwi bantu tabaanguluki kulemba malailile aaya apepa nokucili ciindi. Pele, ikucita boobo ncitondezyo cakusima ca Bunakristo alimwi aluyando. Aabo bajisi luzyibo lwakasimpe kamu Bbaibbele balizyi kuti kubikkila limwi bubambe oobu takukonzyi kupa kuti bafwambaane kufwa. Masimpe, malailile aamwi aalembedwe aamba kuti banamukwasyi batali Bakamboni batabwezi lubazu mububambe buli boonse bwamalila alakonzya kubanyemya. Pele cilainda kubota kuti mwatubandika twaambo kamucipona kwiinda kulekela banamukwasyi bali mubuumba, ibakonzya kusungilizyigwa kucita zilengwa nzyobatakali kusyoma naa kucita basikwaazwa. (Flp. 2:4) Kucita boobu kuyootondezya kuti mulabayanda alimwi mulababikkila maano bamwi.—Ef. 5:28, 33.
11, 12. Ikuti muntu ngotuyanda wafwa, ncinzi ncotuteelede kucita, alimwi ino eeci inga cakonzyeka buti?
11 Mbomukonzya Kucita Abanamukwasyi Batali Bakamboni: Mumasena aamwi, caba cilengwa kuba amuswaangano muntu afwa. Makanze aakuba amuswaangano ooyu nkuyandaula mali aamalila alimwi akubandika buzuba nobayoozikka ankobayoozikkila. Zyintu zicitika zyatondezya kuti aciindi eeci kulalangilwa kuti Kamboni ulakonzya kubula nguzu akusiya zyoonse mumaanza aabanamukwasyi batasyomi. Mbuli mbotwabona, Magwalo alasalazya kwaamba kuti tatukonzyi kulekela bantu batasyomi kweendelezya cibeela cimwi camalila mpoonya cimwi kucibikka mumaanza aambungano. (2 Ko. 6:14) Aboobo, ikuti muntu wafwa wakali Munakristo uusyomeka, inga tiicayandika kuzumizya banamukwasyi batali Bakamboni kubikka “kkomiti yamalila” kutegwa baambe malila mbwaatiiendelezyegwe. Abalo bamumbungano batali bamukwasyi tabeelede kujanika amiswaangano iicitwa ciindi naacitika malila nokuba kujanika nobamvwana buzuba bwakuzikka.
12 Banamukwasyi Banakristo beelede kupandulula cakukkazyika moyo alimwi munzila mbotu bubambe mbobabikka bwamalila. Ikuti banamukwasyi batasyomi bazumina kubeleka antoomwe, nkokuti mweelede kubazumizya kutola lubazu. Pele ino kuti bamwi banamukwasyi bazumanana kukakatizya kuti kucitwe zilengwa zitasalali? Cilayandika kwiima nji alimwi akupandulula cabusicamba nzyotusyoma Tobanakristo. Ncobeni, ikukazyanya takukonzyi kucitika kapati naa muntu wafwa wakalemba malailile kujatikizya mbwayanda kuti malila akacitwe.
13. Ikuti kwaba manyongwe naa kukazyanya, ncinzi ncobakonzya kucita bamwi kujatikizya malila, pele ncinzi ncotusyomezyegwa?
13 Ikuti naa banamukwasyi batali Bakamboni bazumanana kuti bayanda kweendelezya malila, banamukwasyi basyoma balakonzya kubalekela kuti balyeendelezye dilwe. Ikuti cili boobu cacitika, makani aamalila inga akananwa ku Ŋanda ya Bwami iili kubusena ooko naa busena bumwi bweelede kutegwa ‘tuumbulizyanye kuzwa mu Magwalo’ abaabo bali mubuumba akaambo kakufwidwa muyandwa wabo. (Lom. 15:4; Int. 119:50) Nokuba kuti mutunta tauko, bubambe oobu bulakonzya kuba bwabulemu alimwi bulazumizyigwa. (Dt. 34:5-6, 8) Nokuba kuti bantu batasyomi balakonzya kutunyonganya cakubula luzyalo calo cikonzya kuyungizya kubuumba mbotujisi kale, tulaumbulizyigwa mukuzyiba kuti kukakatila kwesu mukucita cintu ciluzi ulikubwene Leza, walo uukonzya kupa babelesi bakwe basyomeka “nguzu zigambya iziinda zyabantu.”—2 Ko. 4:7.
[Bupanduluzi Buyungizyidwe]
a Amubone Ngazi Yamulindizi yamu July 15, 1998, amapeeji 22-23 alimwi ayamu April 15, 1985 yamu Chingisi, amapeeji 23-25, alimwi abbuku lyakuti Mankind’s Search for God, apeeji 70.