Tukkobili Tobilo Tujisi Mpindu Nsyoonto

Nzila mpati njotubelesya kugwasyilizya kutolaambele ziyandika zya Bwami nkwiinda mukusanga mali kumulimo wakukambauka wanyika yoonse. Ino kuti katutajisi mali manji?

Aciindi cimwi Jesu wakabona mukamufwu mucete kabikka tukkobili tobilo tujisi mpindu nsyoonto mucibikkilo camali mutempele. Akaambo kaluyando ndwaakajisi kuli Jehova, ‘mubucete bwakwe, wakabikka oonse ngaakajisi, ngaakali kuponena.’ (Mk. 12:41-44) Akaambo kakuti Jesu wakaamba makani aaya, cakali kutondezya kuti kusanga nkwaakacita, kwakajisi mpindu kapati kuli Leza. Mbubwenya buyo, abalo Banakristo bamumwaanda wamyaka wakusaanguna tiibakaubona mukuli wakusangila mulimo wakukambauka kuba buyo wa Banakristo bavwubide. Mwaapostolo Paulo wakapa cikozyanyo cabana Makedoniya, balo, nokuba kuti bakali ‘bacete citaambiki . . . bakazumanana kulomba akukombelezya kuti bazumizyigwe kuba acoolwe cakupa.’—2 Ko. 8:1-4.

Aboobo, kuti naa tukonzya buyo kusanga ‘tukkobili tobilo tujisi mpindu nsyoonto,’ tweelede kuzyiba kuti zyakusanga nokuba kuti nzisyoonto-syoonto zilakonzya kuvwula kuti zyabikkwa antoomwe. Ikupa kwesu kuzwa ansi aamoyo kuyoomukkomanisya Taateesu wakujulu mwaabi, nkaambo “Leza uyanda muntu uupa kumwi kakkomene.”—2 Ko. 9:7.