Mutalimvwi Kuti Tamukonzyi —Kuzunda Penzi Lyakulitenga
1. Nkaambo nzi bamwi ncobawayawaya kutalisya ziiyo zya Bbaibbele?
1 Sena mulawayawaya kutalisya ciiyo ca Bbaibbele akaambo kakuti mulimvwa kuti tamukonzyi kuyiisya kabotu? Ziindi zimwi babelesi basyomeka bakaindi, mbuli Musa alimwi a Jeremiya, bakali kulimvwa kuteelela kubeleka mulimo wabo. (Kul. 3:10, 11; 4:10; Jer. 1:4-6) Aboobo, kulimvwa boobo tacili ceenzu pe. Ino kulimvwa kuliboobu inga twakuzunda buti?
2. Nkaambo nzi ncotuteelede kukkutila kucita buyo mulimo wabukambausi bwakuŋanda aŋanda akulekela bamwi kuti kabasololela ziiyo zya Bbaibbele?
2 Tweelede kuzyiba kuti Jehova kunyina natulomba kucita cintu ncotutakonzyi. (Int. 103:14) Aboobo mulimo wesu ‘wakugwasya bantu kuba basikwiiya,’ “kubayiisya,” mulimo ngotukonzya kuzuzikizya. (Mt. 28:19, 20) Eeci tacili coolwe Jehova ncapede buyo baabo bali aaluzyibo kapati naa bacibwene akati kesu. (1 Ko. 1:26, 27) Aboobo, tatweelede kukkutila kucita buyo bukambausi bwakuŋanda aŋanda akulekela bamwi kuti kabasololela ziiyo zya Bbaibbele.
3. Mbuti Jehova mbwaatupa kuti tweelele mumulimo wakusololela ziiyo zya Bbaibbele?
3 Jehova Nguupa Kuti Tweelele: Kweelela kwesu kwakugwasya bantu kuba basikwiiya kuzwa kuli Jehova. (2 Ko. 3:5) Kwiinda mumbunga yakwe watuyiisya kasimpe kamu Bbaibbele nkobatazyi nobaba bantu bayiide kapati munyika ino. (1 Ko. 2:7, 8) Wakapa kuti zilembwe nzila zyakuyiisya nzyaakali kubelesya Mwiiyi Mupati, Jesu, kutegwa tuziiye, alimwi ulazumanana kutuyiisya kwiinda mumbungano. Kuyungizya waawo, Jehova taakwe naatulekela kuti katuyiisya nzyotuyeeya kujatikizya Bbaibbele. Watupa zibelesyo mbuli bbuku lya Bbaibbele Ncoliyiisya lyalo lipandulula kasimpe munzila nguba-uba alimwi iitakatazyi kumvwisya. Kusololela ciiyo ca Bbaibbele takukatazyi mbuli mbotuyeeya.
4. Nkaambo nzi ncotukonzya kusyoma kuti Jehova uyootugwasya?
4 Musa a Jeremiya bakacikonzya kuzuzikizya milimo yabo kwiinda mukugwasyigwa a Jehova. (Kul. 4:11, 12; Jer. 1:7, 8) Andiswe tulakonzya kumulomba Jehova kuti atugwasye. Kayi ciindi notusololela ciiyo ca Bbaibbele, tuyiisya muntu kasimpe kajatikizya Jehova, alimwi eeci cilamukkomanisya Leza. (1 Jo. 3:22) Aboobo, amube aambaakani yakutola lubazu mumulimo wakusololela ziiyo zya Bbaibbele, cibeela camulimo wakukambauka icikkomanisya kapati alimwi iciletela zilongezyo zinji.