Mulakonzya Kuba Bayi!
1. Ino ncoolwe nzi cilibedelede ncobajisi basikumwaya boonse ba Bwami?
1 Cibeela comwe cikkomanisya kapati camulimo wamumuunda nkuyiisya muntu kasimpe. Kubona mbwatambula mulumbe wa Bwami alimwi akumugwasya kuti abe acilongwe a Mwami wabubumbo boonse ncintu ncotukkomanina kapati. (Jak. 4:8) Kuyiisya muntu uuyanda kuzyiba kasimpe alimwi akubona kuti watalika kucinca bube bwakwe, mbwazibona zyintu alimwi ambwalilemeka ceelede kuba nembaakani yabasikumwaya boonse ba Bwami.—Mt. 28:19, 20.
2. Ino nkaambo nzi bamwi ncobawayawaya kweendelezya ciiyo ca Bbaibbele, alimwi ino ncinzi ciyoobagwasya kulwana penzi eeli?
2 Amusyome Muli Jehova: Mumazuba aamusyule, babelesi basyomeka tiibakalimvwa kuti bakali kukonzya kucita mulimo Jehova ngwaakabapede. Kusyoma muli Jehova kwakagwasya Musa, Jeremiya, Amosi alimwi abamwi bantu buyo kuti bakuzunde kulidooneka naa kutalisyoma alimwi bakacikonzya kuucita mulimo wakali kuyandika kapati. (Kul. 4:10-12; Jer. 1:6, 7; Am. 7:14, 15) Mwaapostolo Paulo awalo “[wa]kaba akaanzambwene.” Muunzila nzi? Wakaamba kuti “wakaba akaanzambwene muli Leza wesu,” naa kuti Leza nguwakamuyumya-yumya. (1 Tes. 2:2) Masimpe, toonse tulakonzya kusyoma muli Jehova kuti atupe lugwasyo, busongo alimwi anguzu nzyotuyandika kutegwa tweendelezye ziiyo zya Bbaibbele zizwidilila.—Is. 41:10; 1 Kor. 1:26, 27; 1 Pet. 4:11.
3, 4. Ino ndwiiyo nzi lwakabambilwa kutugwasya notuyiisya Jwi lya Leza?
3 Amuzumine Kuyiisyigwa: Mwiiyi wesu Mupati, Jehova Leza, ulatuyiisya kwiinda mukubelesya pulogilamu yalwiiyo lwamu Bbaibbele iicitwa lyoonse kutegwa tucikonzye kuba bamayi basungu. (Is. 54:13; 2 Tim. 3:16, 17) Amuzumine kuyiisyigwa kwiinda mukucita kufwumbwa nzyomukonzya kutegwa muyungizye luzyibo lwanu ilwamu Magwalo alimwi akuyaambele muluzyibo lwanu lwakuyiisya kasimpe kamu Bbaibbele. Nokuba kuti ooyu ngomulimo wa Cikolo Camulimo Weendelezyegwa a Leza alimwi a Muswaangano wa Mulimo, miswaangano yoonse yambungano ituyiisya kuti katubelesya Ijwi lya Leza notuyiisya.
4 Amusoleke kwiiya nzila zyuuba-uba nzyomukonzya kubelesya nomuyiisya makani malamfwu aakumuuya. Ibbuku lya Cikolo Camulimo, apeeji 227 lipandulula kuti: “Mweelede kukamvwisya kabotu kaambo ikuti kamuyanda kuti bantu bakamvwe.” Kwiingula lyamiswaangano kutugwasya kubikka twaambo tupati-pati mumutwe kutegwa tukaakutubelesye kumbele. Aboobo amulibambile kabotu, mpoonya muyakulisyoma nobeni kuti inga mwacikonzya kuyiisya.
5. Ino ndwiiyo nzi lumbi ndotujisi mumbungano lutugwasya kuyaambele mukuba bamayi?
5 Kuzwa kumatalikilo, tacidoonekwi buya kuti babelesi Banakristo balaiya kuzwa kuli umwi aumwi ciindi nobabeleka antoomwe mumulimo wakugwasya bamwi kuba basikwiiya. (Lk. 10:1) Ikuti kacikonzyeka, amubeleke abasikumwaya bacibwene, kubikkilizya abapainiya, baalu alimwi abalangizi beendeenda, mumulimo wakweendelezya ziiyo zya Bbaibbele. Ciindi nobapandulula kasimpe kamu Magwalo, amubone mbobabelesya zikozyanyo azifwanikiso zyuuba-uba alimwi azimwi zibelesyo zigwasyilizya mukuyiisya izijanika mumabbuku ngotubelesya notuyiisya. Amubalombe kuti bamwaambile ncobayeeya kuti inga mwacita kutegwa mube bayi bacibwene. (Tus. 1:5; 27:17) Amulumbe akaambo kalwiiyo oolu ndobapa bakwesu alimwi abacizyi, nkaambo luzwida kuli Leza.—2 Kor. 3:5.
6. Ino ncinzi ciyandika kapati kuti mube bayi ba Jwi lya Leza?
6 Amusyome muli Jehova kutegwa mugwasyigwe alwiiyo ndwapa. Amukupailile kuyaambele kwanu. (Int. 25:4, 5) Andinywe mulakonzya kujana lukkomano luboola akaambo kakugwasya muntu umwi kuba mwiiyi wa Jwi lya Leza mbuli ndinywe.