Jehova Ulatuyiisya Kutegwa Tuubeleke Mulimo Ooyu
1. Ciindi Jehova napa bantu mulimo, ncinzi cimbi ncacita?
1 Ciindi Jehova napa bantu mulimo, ulabapa alugwasyo ndobayandika kutegwa baubeleke mulimo ooyo. Mucikozyanyo, ciindi Jehova naakaambila Nowa kuti apange bwato, cintu Nowa ncaatakalinacitide, wakaambilwa bwakucita. (Matl. 6:14-16) Ciindi mweembezi mubombe moyo Musa naakapegwa mulimo wakusikila bapati ba Israyeli alimwi a Farao, Jehova wakamusyomezya kuti: “Njooba amulomo wako, njookwiisya mboelede kwaamba.” (Kul. 4:12) Caboola kumakani aamulimo wesu wakukambauka makani mabotu, Jehova wakatupa malailile aatondezya mbotukonzya kuucita. Ulatuyiisya mulimo ooyu kwiinda mu Cikolo Camulimo Weendelezyegwa a Leza alimwi amu Muswaangano Wamulimo. Ino inga twagwasyigwa buti mulwiiyo oolu?
2. Mbuti mbotukonzya kugwasyigwa mu Cikolo Camulimo Weendelezyegwa a Leza?
2 Cikolo Camulimo Weendelezyegwa a Leza: Amubalile limwi ciyakubandikwa kamutanaunka kumuswaangano uuli woonse. Mpoonya mwabona basicikolo mbobabelesya twaambo ootu mumakani aabo, muyoozumanana kwiiya mbomukonzya kuyiisya. (Tus. 27:17) Kamuletelezya abbuku lyanu lya Cikolo Camulimo kumuswaangano alimwi kamulibelesya. Ciindi mulangizi wacikolo nabala mubbuku lya Cikolo Camulimo sicikolo naamana kupa makani, amweenge twaambo ntomuyanda kubelesya, alimwi amubelesye busena buli mumbali-mbali kulemba twaambo. Pele nzila mbotu njomunga mwagwasyigwa mucikolo eeci, nkutola lubazu. Sena mwakalilembya? Mwatambula kapepa kamakani, amulibambile kabotu alimwi akubelesya lulayo ndomwapegwa. Nomuli mubukambausi, amuzibelesye nzyomwakaiya.
3. Ncinzi ciyootugwasya kujana mpindu mu Muswaangano Wamulimo?
3 Muswaangano Wamulimo: Tuyoocikonzya kuyeeya twaambo tupegwa mumuswaangano ooyu ikuti twabalila limwi twaambo tuyoobandikwa alimwi akulibambila kutola lubazu. Ikuti katupa bwiinguzi mubufwaafwi, banji bayootola lubazu. Amubikkile maano kuzitondezyo, alimwi amubelesye nzila nzyomubona kuti inga zyagwasya mumulimo wanu wakukambauka. Ikuti mu Mulimo Wesu wa Bwami kamuli zibalo zikonzya kumugwasya mumulimo wanu, amuziyobole.
4. Nkaambo nzi ncotweelede kulubelesya kabotu lwiiyo lweendelezyegwa a Leza?
4 Mbubwenya mbuli milimo yakapedwe kuli Nowa a Musa, mulimo wesu wakukambauka makani mabotu munyika yoonse ulakatazya. (Mt. 24:14) Tulakonzya kuzwidilila kuti twasyoma Jehova, Mwiiyi wesu Mupati, alimwi akulubelesya kabotu lwiiyo ndwatupa.—Is. 30:20.