Mbotugwasyigwa a Cikolo Camulimo Weendelezyegwa a Leza
1 Bantu ba Jehova balijisi coolwe cilibedelede cakuyiisyigwa anguwe. (Is. 54:13; Joh. 6:45) Nokuba boobo, kugwasyigwa nkotujana kuyeeme akusolekesya nkotucita. Sena mulakonzya kubona mbuli Cikolo Camulimo Weendelezyegwa a Leza mbocamugwasya kumuuya?
2 Twaambo Tukulwaizya: Balangizi bacikolo banji babona kuti ikwiiya kukkwenyi kuzwa kumakani aazibeela zyakukanana kwabagwasya kuba basungu mumulimo wambungano nkokuti mumulimo wamumuunda. Ikuyungizya waawo, mulangizi wacikolo umwi wakabona kuti akaambo kabubambe buliko bwabaswiilizi bwakutola lubazu mutwaambo tupati-pati twa Bbaibbele, ibanji bautobela mulongo wakubala Bbaibbele. Kujatikizya Makani Na. 2, bakwesu banji baamba bubotu bwakulibambila cibalo ciyiigwa kakunyina kulibambila majwi aantalisyo alimwi aakumamanino. Aabo bapedwe cibalo eeci babikkila maano lino mbobakonzya kuyaambele mukubala.—1 Tim. 4:13.
3 Boonse Balakonzya Kugwasyigwa: Kwiingula lyamiswaangano cilakonzya kuba cintu cikkomanisya. (Tus. 15:23) Kuba amibuzyo yakwiinduluka kakucili ciindi kutupa kuti tulibambile akuya kwiingula mukwiinduluka. Ikuyungizya waawo, Ngazi Yamulindizi ya January 1, 2004, twaambo tupati-pati tuzwa mumabbuku aamu Bbaibbele zyakalibonya kweendelana acibalo ncotupedwe cakubala cili mu Cikolo Camulimo Weendelezyegwa a Leza. Eezyi zibalo zyagwasya banji kupa bwiinguzi buyaka nokulangwa-langwa twaambo tupati-pati twamu Bbaibbele.
4 Uli woonse wakalembwa mucikolo ulijisi coolwe cilibedelede cakulibambila akwaamba zibeela. Toonse tulakonzya kugwasyigwa akulumbaizya kwamulangizi wacikolo nkwacita acibumbili. Basikwiiya abalo balagwasyigwa alulayo lwamulangizi wacikolo ndwakonzya kupa kumbali wamana muswaangano. Zyakucita ziliko kumamanino aacibalo acimwi cabbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza zilijisi zibeela zyakukanana zipa lugwasyo alumbi.
5 Nomwapegwa malailile aamu Magwalo aagwasya nomucita cikolo naa nocamana, amuzilembe mubbuku lyanu lya Cikolo Camulimo. Amuzinzibale kuyeeya kuli zyeezyo nzyomwaiya, amubone mbuli mbazu eezyi zyalwiiyo luzwa kuli Leza mbozyimugwasya kumuuya.