Cikolo Camulimo Weendelezyegwaa Leza Camu 2002
1 Ibantu banji taakwe nobakuyeeyela abuniini kucikonzya kwaambaula nkobajisi. Nokuba boobo, ikucikonzya kwaambaula ncipego cizwa kuli Jehova. Cipa kuti tucikonzye kubandika abamwi alimwi akubazyibya miyeeyo yesu alimwi ambotulimvwa. Iciyandika kapati ncakuti, tulakonzya kutembaula Leza wesu.—Int. 22:22; 1 Kor. 1:4-7.
2 Baalumi, bamakaintu alimwi abana balayiisyigwa Mucikolo Camulimo Weendelezyegwaa Leza ikulwiida bamwi izina lya Jehova. (Int. 148:12, 13) Ipulogilamu ya Cikolo camu 2002 ilijisi makani aasiyene-siyene aamu Bbaibbele aakonzya kutugwasya umwi aumwi wesu alimwi ngotukonzya kubelesya mumulimo. Kwiinda mukulibambila makani aamucikolo alimwi akutola lubazu, tulakonzya kuyungizya luzyibo lwesu mbotuli bamayi ba Jwi lya Leza.—Int. 45:1.
3 Amulibale Bbaibbele Abuzuba: Ikuti Bbaibbele katulibikka afwaafwi ampotubede, tulakonzya kulibelesya kufwumbwa ciindi. Ibunji bwandiswe tulijisi maminiti masyoonto abuzuba aayo ngotukonzya kubelesya mukubala Bbaibbele. Cilagwasya kaka ikubala peeji lyomwe abuzuba, eeci calo ciyootugwasya ikutobela pulogilamu yakubala Bbaibbele iibikkidwe mumulongo wacikolo!—Int. 1:1-3.
4 Ikucizyiba kubala Bbaibbele kabotu kulakonzya kutugwasya ikwaamba makani aakonzya kubanjila mumoyo ibaswiilizi besu alimwi akubakulwaizya kutembaula Jehova. Ibakwesu ibakanana Makani aa No. 2 mucikolo beelede kwiinduluka-induluka ikubala makani aabo cakupozya. Mulangizi wacikolo uyoopa kulumba alimwi amalailile aakonzya kumugwasya kuyaambele mukubala.
5 Amubelesye Bbuku lya Kukambitsirana: Makani No. 3 alimwi a No. 4 azwa mubbuku lya Kukambitsirana. Ibunji bwesu atusoleke ikubelesya cibelesyo eeci cigwasya mumulimo wamumuunda bunji bwazyiindi. Ibacizyi beelede kusala inzila iibeleka mucilawo mobabelekela. Mulangizi wacikolo weelede kubikkila maanu kapati kukuyiisya kwabo alimwi ambobaabelesya Magwalo.
6 Atugwasyigwe toonse a Cikolo Camulimo Weendelezyegwaa Leza ikuzumanana kubelesya cipego cakwaambaula ncaakatupa Leza ikulwiida bamwi makani mabotu alimwi akutembaula Jehova Leza wesu mupati!—Int. 34:1; Ef. 6:19.