Icikolo Citugwasya Kuba Bantu Balibambilide Mumilimo Iiyandika Kapati Mubuumi
1 Ibantu balaiya muzikolo kutegwa bajane luzibo ilukonzya kubagwasya kuzuzikizya mbaakani nzyobalombozya mubuumi. Nokuba boobo, sena kuli cimbi cilombozyegwa kwiinda mbaakani yakutembaula Sikupa buumi alimwi akugwasya bantu kwiiya makanze aakwe alimwi anzila zyakwe? Kunyina pe. Imakanze aa Cikolo Camulimo Weendelezyegwaa Leza ngakutugwasya kuba bantu balibambilide kuyiisya bamwi zintu nzyotusyoma. Aboobo, mbotuya buzumanana kujanika kucikolo nsondo ansondo, tujana luzibo iluyootugwasya kuba bantu balibambilide mumilimo iiyandika kapati mubuumi.
2 “Mulongo Wamakani Mucikolo Camulimo Weendelezyegwaa Leza Wamu 2003” wakapegwa mwezi wamana mu Mulimo Wesu Wabwami. Imulongo ooyu ulijisi makani aatondezya cikolo mbociya kweendelezyegwa. Cilakonzya kumuubila kuyobola mulongo ooyu mubbuku lyanu lya Amugwasigwe Alwiiyo Lujanwa Mucikolo Camulimo Weendelezyegwaa Leza, ibbuku ndyomweelede kuletelezya nsondo ansondo Mucikolo Camulimo Weendelezyegwaa Leza. Amulange-lange zibeela zimwi zya Mucikolo Camulimo Weendelezyegwaa Leza camu 2003.
3 Cibeela Cakukanana: Kutalikila mu January, lyoonse buyo icikolo cinoootalika amakani aamaminiti aali musanu kujatikizya cibeela cakukanana antela cibeela cakubala, kwiiya naa kuyiisya. Mulangizi wacikolo uyookanana makani aaya aantalisyo, ikuti naa wayanda ulakonzya kusala mwaalu uumbi weelela kukanana makani aaya. Mwaambi ulakonzya kubandika ncocipandulula cibeela cakukanana eeco alimwi ambociyandika. Mpoonya inga wayungizya makani aakwe kwiinda mukubandika zitondezyo zyamu Magwalo akutondezya mbocinga cabelesyegwa cibeela cakukanana eeco, kabikkila maano kapati kukaambo ikucita boobo ncokukonzya kutugwasya kuyaambele mumulimo wesu wamumuunda.
4 Makani No. 1: Alimwi bakwesu bapedwe kukanana makani aamalailile bakulwaizyigwa “kutondezya mbwaakonzya kugwasya ncobeni makani aayo aabandikwa.” Eeci caamba kutondezya bantu mumbungano mbobanga baabelesya makani aayo. Ikuti naa mwapegwa makani aaya, amulange bbuku lya Cikolo Camulimo amapeeji 48-9 kujatikizya nzila mbokulibambilwa alimwi akwiiya makani aatondezyedwe mumulongo wamitwe yazibalo zili mubbuku akabeela kakuti, “Mbwaakonzya kugwasya makani.”
5 Mulongo Wakubala Bbaibbele: Ikuti naa musyule cali kumwaalila kubutobela bubambe bwakubala Bbaibbele nsondo ansondo, ino nkaambo nzi ncomutakanzi kucita boobo mwaka uuno? Aabo ibayoocita boobo bayoomanizya kwaabala Magwalo aa Bunakristo aa Cigiliki kumamanino amwaka uuno. Ibubotu bwakutalika pulogilamu yakubala Bbaibbele kwiinda mukusaanguna kubala Magwalo aa Bunakristo aa Cigiliki bulaambidwe apeeji 10, muncali 4 mubbuku lya Cikolo Camulimo.
6 Kunomoona Twaambo Tupati-Pati Kuzwa Mukubala Bbaibbele: Ciindi cipedwe kucibeela eeci cakayungizyigwa, aboobo lino cijisi maminiti aali kkumi ikutegwa baswiilizi kabakonzya kutola lubazu mukwaamba twaambo twakabagwasya mukubala zibalo zyamu Bbaibbele zyansondo eeyo. Aabo bapedwe cibeela eeci beelede kucitobela ciindi ncobapedwe. Cibeela eeci ciyookananwa nsondo ansondo kubikkilizya ayeeyo nokuli mubandi wakwiinduluka nzyotwakaiya musyule. Eelyo nomuli mukubala zyaandaano zipedwe, amubikkile maanu kutwaambo tukonzya kumugwasya muciiyo camukwasyi, mumulimo wanu naa mubuumi bwanu. Ino mbube nzi bwa Jehova bwakatondezyegwa naakali kweendelezya bantu alimwi azisi? Ino ncinzi ncomwakaiya icakayumya lusyomo lwanu alimwi akulumba nkomujisi kuli Jehova? Mulaangulukide kubandika akaambo kali koonse ikali muzyaandaano zipedwe, nomuba mutupango ituyoobalwa lya Makani No. 2 mbwaanga mukwesu uuyoobala cibeela eeci kunyina naya kupandulula tupango ooto.
7 Makani No. 2: Cibeela casikwiiya wakusaanguna nsondo ansondo cinooli cakubala kubuleya. Zibeela zyamakani aaya oonse, kunze buyo lyaceeco ciyoobalwa kumamanino aamwezi umwi aumwi ayoozwa mukubala kwa Bbaibbele kwansondo. Kubala kwansondo yamamanino mumwezi kuyoozwa mu Ngazi Yamulindizi. Sikwiiya weelede kubala buyo makani ngapedwe kakunyina kupa makani aantalisyo naa aamamanino. Munzila eeyi, ulakonzya kubikkila maano kapati mukuyaambele mukubala kwakwe.—1 Tim. 4:13.
8 Makani No. 3 Alimwi a No. 4: Bunji bwamakani aaya anoozwa mubbuku lya Kukambitsirana; amwi anoojisi buyo mutwe wamakani. Aabo bapedwe makani aajisi buyo twaambo tusyoonto naa aajisi buyo mutwe wamakani bayoobaa coolwe cakujana makani aayandika kucibeela eeci kwiinda mukuvwuntauzya mumabbuku eesu aa Bunakristo. Eeci ciyoobaubila bacizi kweendelanya makani aabo kuli basikubagwasilizya.
9 Mbwaayelede Kubandikwa Makani: Kweelanaa mbokutondezyedwe apeeji 45 mubbuku lya Cikolo Camulimo, mulangizi wacikolo ulakonzya kupa nzila mbwaayelede kubandikwa makani. Ikuti naa tanaacita oobo, bacizi balakonzya kusala nzila yomwe akati kazyeezyo zili mumulongo apeeji 82. Ikuti naa mucizi kabandika makani ciindi comwe kwainda myezi yobile, ciya kumutolela myaka iili yosanwe kabelesya nzila zisiyene-siyene zyoonse zili 30. Bacizi ibasala nzila ya No. 30 yakuti, “Nzila imbi yeelela buyo kubusena nkomubede,” beelede kwiilemba nzila eeyo ansi naa kumamanino lyakapepa katondezya kuti muya kukanana makani (S-89). Mulangizi wacikolo uyoolemba deeti naakabandikwa makani aasikwiiya apeeji 82 mubbuku lyakwe munsi anzila njaakabelesya mucizi. Ulakonzya kucita boobo aciindi nciconya naya kucconga foomu yalulayo ya sikwiiya.
10 Foomu Yalulayo: Foomu yanu yalulayo ilibikkilizyidwe mubbuku lyanu. Ili amapeeji 79-81. Aboobo, muyooyandika kumupa bbuku lyanu mulangizi wacikolo mwamana kukanana makani ciindi coonse nomwapegwa. Mulangizi wacikolo uyooyandika kubamba mulongo watwaambo twalulayo ooto basikwiiya ntobali mukubelekelawo.
11 Mubandi Wakwiinduluka Nzyotwakaiya: Kwiinduluka Mucikolo Camulimo Weendelezyegwaa Leza kuyoocitwa kwiinda mukubandika buyo. Kunoocitwa ciindi comwe kwainda myezi yobile alimwi kunootola maminiti aali 30. Mbuli lyoonse, mibuzyo iyoolangwa-langwa inoopegwa mu Mulimo Wesu Wabwami. Ikuti naa nsondo eeyo nomweelede kuba amubandi wakwiinduluka nzyotwakaiya kamujisi muswaangano wabbazu antela kamuswaidwe amulangizi wabbazu, makani aamunsondo iitobela ayelede kukananwa musondo eeyo, mpoonya mubandi wakwiinduluka nzyotwakaiya weelede kutolwa munsondo iitobela.
12 Zikolo Zimbi: Mumbungano oomo basikwiiya bakalilembya mucikolo mobali banji kwiinda a 50, baalu balakonzya kucita bubambe bwakuba azikolo zimbi. “Bubambe oobu bulakonzya kubelesyegwa kumakani oonse abasikwiiya naa kumakani buyo No. 3 alimwi a No. 4.” (Cikolo Camulimo, p. 285) Muzeezo ooyu wabili ulakonzya kubeleka mumbungano oomo bacizi mobali banji pele izijisi buyo bakwesu basyoonto bakonzya kulanganya makani aakubala. Baalu beelede kusala bakwesu beelela ibakonzya kusololela zikolo eezi.
13 Sikugwasilizya Mukupa Lulayo: Mbuli mbokutondezyedwe mumulongo Wamakani Mucikolo Camulimo Weendelezyegwaa Leza, sikugwasilizya mukupa lulayo weelede kusalwa akabunga kabaalu kutegwa kapa lulayo lwakumbali kubaalu alimwi abakutausi ibabandika makani aakunomoona twaambo tupati-pati mu Bbaibbele alimwi akukanana makani aamalailile. Imukwesu uupedwe kulanganya cibeela eeci weelede kali muntu uusimide alimwi uukonzya kupa lulayo ndobakonzya kutambula baalunyina. Lulayo lwakwe lweelede kaluli loolo luyaka, uulumbaizya kukanana kubotu alimwi anzila zibotu zyakuyiisya alimwi akupa kaambo komwe naa tobile kuli umwi aumwi kujatikizya mbwakonzya kuyaambele. Takuyandiki pe kupa lulayo kumukwesu uukanana kwaziindi zinji kufwumbwa makani ngaakanana. Pele sikugwasilizya mukupa lulayo weelede kupakamana akuziba kuti nobaba bakwesu aabo lino bakanana makani aabuleya balakonzya kugwasyigwa kutegwa bazumanane kuyaambele.—1 Tim. 4:15.
14 Ncobaya Kubikkila Maanu Basikupa Lulayo: Ino ncinzi cikonzya kumugwasya sikupa lulayo kubona mbwaakananwa makani? Kabbokesi katatu muzibalo zinji zili 53 eezyo zijisi manamba mubbuku lya Cikolo Camulimo kajisi twaambo mubufwaafwi tweelede kubikkilwa maano. Alimwi mulangizi wacikolo weelede kubikkila maano kuziibalusyo zimwi naa inzila zigwasya izili mubbuku eezyo zikonzya kumugwasya kulanga-langa cakufwambaana mbuli twaambo mbotwakananwa cakutobelana kabotu alimwi ambuli mbwaakananwa kabotu makani. Mucikozyanyo, amubone mulongo wamibuzyo iili atala lyapeeji 55 alimwi atwaambo tuli mumuncali wamamanino apeeji 163.
15 Amulembe Twaambo Mumasena Aatalembedwe: Kunze lyazibeela zipati zili mumbali-mbali lyamapeeji, ibbuku lya Cikolo Camulimo lilijisi masena aali mbwaabede aatalembedwe cintu aakasiilwa kuti kamulemba twaambo nomucita ciiyo canu alimwi aleelyo nomuli kumuswaangano Mucikolo Camulimo Weendelezyegwaa Leza. (Amubone mapeeji 77, 92, 165, 243, 246 alimwi a 250.) Mweelede kubona kuti mwalitolelezya bbuku lyanu nsondo ansondo. Amutobelezye eelyo makani aamatalikilo naali mukukananwa. Kamulijalude bbuku lyanu mane muswaangano wacikolo woonse umane. Amubikkile maano kunzila zikonzya kugwasya eezyo zipegwaa mulangizi wacikolo. Amuzibikkile maano nzila zyakuyiisya, mibuzyo, zitondezyo, inzila zimbi zyakwaamba zintu, zikozyanyo, kubelesya mamaapu, zifwanikiso, maccaati azintu buyo zimbi alimwi akwaandaanya zintu kucitwaa baambi. Kwiinda mukulemba twaambo tugwasya, muyoocikonzya kutuyeeya twaambo tubotu kapati ntomuyoojana mucikolo alimwi akutubelesya.
16 Jesu Kristo wakalizyi kuti kukambauka makani mabotu aa Bwami bwa Leza ncecoolwe citaliboteli ncakonzya kupegwa muntu uuli woonse. Ngowakali mulimo wakwe mupati. (Mk. 1:38) Mboobu mbwakaamba: ‘Ndileelede kukambauka Makani Mabotu aa Bwami bwa Leza, nkaambo ncondakatuminwa.’ (Lk. 4:43) Mbotuli baabo ibakazumina kumutobela, andiswe tujisi bubi kukambauka makani mabotu alimwi lyoonse tuli mukusolekesya kutegwa tutolaambele “cipaizyo [cesu] cakulumba.” (Heb. 13:15) Ikutegwa tuzwidilile amakanze aaya, toonse atubikkile maanu kutola lubazu lyoonse Mucikolo Camulimo Weendelezyegwaa Leza, eeco iciyootugwasya kutegwa tube bantu balibambilide mumilimo iiyandika kapati mubuumi.